LO KOUVERTIR: AKOZ SITAN SOUFRANS? KAN I POU ARETE?

En kantite dimoun inosan i soufer!

Noelle ti en pti fiy byen zantiy ki ti kontan desinen. En zour swar pandan lete, i ti pe pronmnen deryer lakaz e dan en fason ou en lot i ti rann lapel dan basen naze. I ti noye, zis de semenn avan ki i ti pou’n ganny kat-r-an.

Charlotte, Daniel, Olivia, Josephine. . . . Sa i non serten parmi sa 20 zanfan sis ou set an ki ti parmi sa 26 viktim en fiziyad ki ti arive le 14 Desanm 2012 kot en lekol Connecticut, Leta-z-ini. Pandan en servis memoryal, Prezidan Obama ti lir non sa bann zanfan e dir avek lodyans ki ti dan en gran latristes: “Sa bann trazedi in ler pour arete!”

Bano, en fiy dizwit an ti kit Irak an 1996 e al reste Lanorvez ansanm avek son fanmir. Son bann zanmi ti abitye kriy li par son pti non Reyon Soley. Me malerezman, le 22 Zilyet 2011, Bano ti parmi sa 77 viktim ki ti ganny masakre par en ekstremis ki pli tar ti dir byen vantar: “Mon vreman dezole . . . ki mon pa’n kapab touy plis ki sa.”

I touzour annan bann nouvel parey dan lemonn antye. Zis mazin sa sagrinasyon ek douler ki i’n annan akoz aksidan, krim, lager, terorizm, dezas natirel ek lezot trazedi ankor. En kantite dimoun inosan i mor en sel kou e i annan sitan soufrans, par ler san okenn rezon.

Serten dimoun i blanm Bondye akoz zot mazinen ki nou Kreater pa enterese avek nou. Lezot i panse ki Bondye i vwar nou soufrans e i zis pa pe fatig li pour entervenir. Lezot ankor i dir ki sa bann maler ki arive ti’n fini ganny predir. Pwennvi sakenn pa zanmen fini lo sa size. Me, kote nou kapab trouv bann larepons satisfezan e diny konfyans? Dan bann lartik ki swiv, nou pou egzamin Parol Bondye pour ganny larepons konsernan lakoz soufrans e ki mannyer soufrans pou ganny eliminen.

[Portre lo paz 3]