APROS AVEK BONDYE

‘Zeova ti pardonn zot’

“Sa ki pa kapab pardonn lezot i konmsi i kas sa pon ki li menm i devret pas lo la.” Sa parol ti ganny dir par Edward Herbert, en istoryen Angle dan disetyenm syek. I montre nou en rezon akoz nou devret pardonn lezot: To ou tar, nou pou bezwen demann pardon nou osi. (Matye 7:12) Me, i annan en rezon pli enportan ankor akoz nou devret pardonn lezot. Remark sa ki Pol ti dir anba lenspirasyon dan Kolosyen 3:13.​—Lir.

Lefet ki nou tou nou enparfe, i arive ki par ler nou irit ouswa ofans lezot, e zot osi zot kapab fer parey anver nou. (Romen 3:23) Alor, ki mannyer nou kapab anpe avek nou prosen? Anba lenspirasyon Bondye, Pol ti konsey nou pour siport e pardonn kanmarad. Sa konsey i fer sans ozordi zis parey ler i ti pe ganny ekri apepre de mil an pase. Annou egzamin byen parol Pol.

“Siport kanmarad.” Sa lekspresyon “siport kanmarad” i sorti dan en mo Grek ki vedir tolere ouswa demontre pasyans. En liv referans i dir ki bann Kretyen i demontre sa kalite kan zot “pare pour siport sa bann ki zot fot ek move tre i irit zot.” Sa parol “kanmarad” i montre nou ki tou le de i devret pe fer parey. Setadir, kan nou rapel ki nou annan bann tre ki irit lezot, nou pa pou les sa bann keksoz ki nou kapab pa kontan dan lezot anpes nou gard lape antre nou ek lezot. Me, si en dimoun i fer pese kont nou?

Kontinyen “pardonn kanmarad sak fwa.” Dapre en spesyalis Labib, sa mo Grek ki’n ganny tradwir “pardonn kanmarad sak fwa” “i pa sa mo ki ti ordinerman ganny servi pour pardonnen, me en lot mo pli for ki donn sa lide pardonn avek tou nou leker oubyen volonterman e ki met lanfaz lo pardonnen san ganny forse.” En lot referans i dir ki sa mo i kapab vedir fer en faver, demontre labonte oubyen fer en bon aksyon anver lezot. Nou montre ki nou bon ler nou pare pour pardonn lezot volonterman, menm si ‘zot in ofans nou.’ Me, akoz nou devret pare pour pardonn lezot? En rezon se ki nou realize ki nou osi nou pou bezwen ganny pardonnen par sa enn ki nou’n ofanse.

“Parey Senyer [Zeova] ti pardonn zot, zot osi pardonn kanmarad.” Sa i sa rezon prensipal akoz nou devret pardonn lezot volonterman: Zeova i pardonn nou volonterman. (Mika 7:18) Mazin pour en moman kantite labonte ki Zeova i demontre ler i pardonn bann peser ki repantir. Kontrerman avek nou, Zeova pa fer pese. Pourtan, i pare e i konpletman pardonn bann peser ki repantir menm si i konnen ki zot pa pou bezwen pardonn li. Vreman, Zeova i sa enn ki pardonn volonterman bann ki repantir!

Mizerikord Zeova i atir nou ver li e motiv nou pour anvi imit li. (Efezyen 4:32–5:1) I byen pour demann nou lekor, ‘Si Zeova i sitan pare pour pardonn mwan volonterman, akoz ki mon pa pou pardonn sa dimoun enparfe ki’n vreman repantir apre ki i’n fer pese kont mwan?’​—Lik 17:3, 4.

MON LEKTIR LABIB

Galat 1–2 Timote 4

[Ekstre lo paz 11]

Zeova i sa enn ki pardonn volonterman bann ki repantir!