Lalit kont lanmor
LO KOUVERTIR | ESKI TOU I FINI AVEK LANMOR?
Lalit kont lanmor
Lanmor i en lennmi ki efreyan. Nou lalit kont li avek tou nou lafors. Ler nou perdi en dimoun ki nou kontan dan lanmor, nou tant pour refize aksepte ki in mor. Kan nou ankor zenn e ranpli avek lenerzi nou kapab panse ki nou lennmi lanmor pa pou zanmen ariv lo nou, me sa i zis en fo nide ki nou esey garde osi lontan ki nou kapab.
Bann Faraon dan letan lontan ti mazin lo lavi imortel plis ki lamazorite dimoun. Zot ti depans preski tou zot letan, ensi ki lavi plizyer milye zot travayer, pour esey ganny laviktwar lo lanmor. Bann piramid ki zot ti konstri i laprev ki zot ti esey fer sa e ki zot pa ti reisi.
Bann lanperer Sinwan ti osi esey ganny laviktwar lo lanmor me par servi en lot metod, sa se en latizann lavi. Lanperer Qin Shi Huang ti demann son bann syantis pour rod en posyon mazik ki ti pou kapab anpes li mor. Me bokou zot bann melanz ti annan merkir ki toksik e i tre probab ki enn sa melanz ki ti touy li.
Dan sezyenm syek N.L., Juan Ponce de León, en eksplorater Espanyol ti al Karaib, aparaman pour rod en sours delo ki fer zenn. Pandan sa letan, i ti dekouver Florida, Leta-z-ini, me i ti mor detrwa lannen plitar apre en konfli avek bann premye Ameriken. Finalman, ti napa okenn sours delo ki fer zenn ki’n deza ganny dekouver.
Bann Faraon, lanperer ek eksplorater zot tou zot ti anvi ganny laviktwar lo lanmor. Menm si nou pa ti pou’n kontan zot bann fason fer, lekel parmi nou ki ti pou’n kestyonn zot lobzektif? O fon nou leker, preski nou tou nou ti a voudre viv pour touzour.
ESKI NOU KAPAB GANNY LAVIKTWAR LO LANMOR?
Akoz nou pa anvi mor? Labib i eksplike akoz. Konsernan nou Kreater, Zeova, * Labib i dir: “I’n fer tou keksoz zoli dan son letan. I’n menm met dezir pour viv pour touzour dan zot leker.” (Eklezyast 3:11) Nou ti a kontan rezouir bann zoli keksoz ki lo later pour touzour, me pa zis pour 80 an ou plis. (Psonm 90:10) Se sa dezir ki dan nou leker.
Akoz Bondye ti met sa “dezir pour viv pour touzour” dan nou leker? Zis pour fer nou fristre? Sa i enposib, o kontrer, Bondye i promet nou ki i pou annan laviktwar lo lanmor. Plizyer fwa Labib i mansyonnen ki lanmor pou ganny detrir e i osi koz lo promes Bondye konsernan lavi eternel.—Vwar bwat, “Laviktwar lo lanmor.”
Zezi limenm ti klerman dir: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Alor, nou lalit kont lanmor i pa anven. Me Zezi ti konfirmen ki zis Bondye ki kapab ganny laviktwar lo lanmor pour nou.
[Not anba lo paz]
^ par. 9 Dapre Labib, Zeova i non Bondye.
[Bwat lo paz 5]
Laviktwar lo lanmor
“I pou anval lanmor pour touzour, e Souvren Senyer Zeova pou sirman eswiy larm lo tou figir.”—Izai 25:8.
“Sa ki mon Papa i oule se ki tou sa ki war son Garson e krwar li i a ganny lavi eternel, e mon pou resisit li dan dernyen zour.”—Zan 6:40.
“Dernyen lennmi ki pou ganny detri, se lanmor.”—1 Korentyen 15:26.
“[Nou annan] lesperans lavi eternel. Bondye ki pa zanmen manti ti promet nou sa lavi avan konmansman letan.”—Tit 1:2.
“I pou eswiy tou larm dan zot lizye. Lanmor pou nepli egziste.”—Revelasyon 21:4.
[Portre lo paz 4]
FARAON KHUFU
[Sorti kot]
Portre Ezipsyen: © Erich Lessing/Art Resource, NY
[Portre lo paz 4]
LAMPERER QIN SHI HUANG
EKSPLORATER PONCE DE LEÓN
