Ou kapab reziste tantasyon!

“I pa ti mon lentansyon pour get pornografi. Me kan mon ti al lo Enternet en lavertisman ti deswit aparet. Mon pa konnen akoz me mon ti zis ouver.”​—CODY. *

“En zoli fiy kot travay ti konmans rod latraksyon avek mwan. En zour i ti demann mwan pour al avek li kot en lotel pour ‘anmize.’ Mon ti konnen egzakteman sa ki i ti anvi.”​—DYLAN.

“Mon kapab reziste nenport kwa eksepte tantasyon.” Sa dyok popiler i dekrir byen ki mannyer serten dimoun i vwar tantasyon, o fon zot leker zot byen kontan tantasyon. Me lezot i vwar tantasyon konman en lennmi ki persiste ki zot vreman anvi reziste li. Ki ou panse? Kan ou pe fer fas avek tantasyon, eski ou les li enfliyans ou oubyen ou reziste?

Byensir, pa tou tantasyon ki anmenn bann gro problenm. Par egzanp, pran en biskwi an plis pa pou gat ou lavi. Me les ou ganny antrennen avek lezot tantasyon espesyalman bann ki antrenn ou dan limoralite seksyel i kapab anmenn bann konsekans trazik. Labib i averti: “Nenport dimoun ki komet adilter . . . i napa leker; sa ki pe fer li pe detri son prop lavi.”​—Proverb 6:32, 33.

Ki mannyer ou devret reakte si toutakou ou fer fas avek en tantasyon imoral? Labib i reponn: “Annefe, lala lavolonte Bondye: se ki zot vin sen; ki zot prezerv zot kont limoralite. Mon demande ki sakenn antre zot i konn pran en madanm pour tenir zot dan en fason sent e avek loner.” (1 Tesalonisyen 4:3, 4) Ki mannyer ou kapab devlop sa determinasyon? Egzamin 3 letap ki kapab ede.

Letap 1: Protez ou lizye

Si nou kit nou lizye lo bann portre ki annan pour fer avek seksyalite sa pou zis ogmant bann move dezir. Pour konfirm sa konneksyon ant vwar e annan dezir, Zezi ti dir: “En dimoun ki get madanm en lot zonm avek dezir in deza komet adilter avek li dan son leker.” An servan bann legzanp byen kler i ti dir: “Si ou lizye drwat i fer ou fer pese, aras li e zet li.” (Matye 5:28, 29) Ki Zezi ti pe esey dir?  Pour reziste tantasyon, nou bezwen azir deswit e pa get bann zimaz provokan.

Annou pran en legzanp: Meton ou get sa lalimyer ki fatig lizye ler en dimoun pe soud feray. Eski ou pou kontinyen gete? Byensir non! Ou pou vir laba oubyen kasyet ou lizye pour protez ou vizyon. Pareyman, si ou vwar en zimaz ki annan pour fer avek sèks lo papye, lo televizyon, konpiter oubyen fizikman deswit vir laba. Protez ou lespri pour ki i pa ganny afekte. Juan ki ti adikt avek pornografi i dir: “Kan mon vwar en madanm ki atiran, mon souvan santi sa tandans pour get li en dezyenm e en trwazyenm fwa. Alor, mon fors mon lizye pour pa gete e mon dir dan mwan menm: ‘Priy Zeova! Ou bezwen priye la konmela!’ Apre ki’n mon’n priye, sa dezir i ale.”​—Matye 6:9, 13; 1 Korentyen 10:13.

Egzamin osi sa ki Zob, en zonm fidel dan Labib ti dir: “Mon’n fer en lalyans avek mon lizye. Alor, ki mannyer mon kapab kontinyen get en vyerz?” (Zob 31:1) Akoz ou pa fer parey?

Esey sa: Si ou vwar zimaz ki annan pour fer avek sèks, deswit vir laba. Imit sa ekriven Labib ki ti priye: “Fer mon lizye pa kontinyen get sa ki napa valer.”​—Psonm 119:37.

Letap 2: Protez ou panse

Vi ki nou tou nou enparfe, parfwa nou kapab lite kont bann move dezir. Labib i dir: “Me tou dimoun i ganny tante ler i les li ganny antrennen e atire par son prop move dezir. Alor, move dezir enn fwa ki i’n ganny formen i donn nesans pese.” (Zak 1:14, 15) Ki mannyer ou kapab evite tonm dan en sityasyon ki deplizanpli vin pli difisil pour sorti ladan?

Rapel ki ou kapab swazir ki mannyer ou pou reazir anver bann move dezir. Ou bezwen lager avek sa bann dezir. Retir zot dan ou lespri. Refize pour preokip ou lespri avek bann dezir imoral. En zonm ki apel Troy, ki ti adikt avek pornografi lo Enternet ti dir: “Mon ti lager pour retir bann move panse  dan mon lespri par konsantre lo bann panse pozitif. I pa ti fasil. Souvandfwa mon ti rekonmans ankor. Me apre mon ti aprann pour kontrol mon panse.” En madanm ki apel Elsa, ki ti lite avek bann tantasyon imoral ler i ti ankor adolesan, i rapel, “Par reste okipe e priy Zeova, mon ti reisi gard bann move panse anba kontrol.”

Esey sa: Kan ou pe ganny bann panse imoral, deswit arete e priye. Lager kont bann move panse par ranpli ou lespri avek “tou sa ki vre, tou sa ki onorab, sa ki zis, sa ki pir, sa ki bon, sa ki agreab, sa ki ekselan, tou sa ki merit felisitasyon.”​​—Filipyen 4:8.

Letap 3: Vey ou lepa

Kan dezir, tantasyon ek loportinite i zwenn ansanm, problenm i fasilman swiv. (Proverb 7:6-23) Ki mannyer ou kapab evite vin en viktim?

Labib i dir dan en fason saz: “En dimoun pridan i al kasyet li ler i’n vwar maler, me en dimoun ki mank leksperyans in pase e i a bezwen sibir konsekans.” (Proverb 22:3) Alor vey ou lepa. Mazin davans lo bann sityasyon ki kapab kre problenm e evit zot. (Proverb 7:25) En zonm ki apel Filipe, ki ti reisi aret son adiksyon avek pornografi i dir: “Mon met konpiter lafanmir dan en landrwa kot tou dimoun i kapab vwar e enstal Internet filter software lo la. Mon al lo Enternet ler i annan dimoun otour mwan.” Pareyman, Troy ki nou ti mansyonnen avan i dir: “Mon ti evite get bann film provokan e frekant dimoun ki koz lo sèks dan en fason vilger. Mon pa anvi met mon lekor dan problenm.”

Esey sa: Dan en fason onnet egzamin ou bann febles e fer zefor pour evit bann sityasyon ki kapab anmenn ou ver tantasyon.​​—Matye 6:13.

PA ABANDONNEN!

Ki ou pou fer si malgre ou’n fer bokou zefor, ou’n afeblir e ou’n les ou tonm dan tantasyon? Pa bezwen dekouraze e aret eseye. Labib i dir: “En dimoun drwat i kapab tonm menm set fwa, me definitivman i pou leve.” (Proverb 24:16) Wi, nou Papa dan lesyel i ankouraz nou pour “leve.” Eski ou pou aksepte son led ki ranpli avek lanmour? Alor pa zanmen fatige pour koz avek li dan lapriyer. Batir ou lafwa par etidye son Parol. Ranforsi ou zefor par asiste bann renyon Kretyen. Pran aker promes Bondye: “Mon pou fortifye ou, wi mon pou ed ou.”​—Izai 41:10.

Cody ki nou ti mansyonnen avan, i dir: “Mon ti bezwen fer bokou zefor pour lager avek mon labitid pour get pornografi. Souvan mon ti tonbe me avek led Bondye mon ti finalman reisi.” Dylan ki ti osi ganny mansyonnen pli boner i dir: “Mon ti fasilman kapab annan relasyon seksyel avek mon koleg travay. Me dan en fason ferm mon ti dir ‘Non!’ I vreman gou ler ou annan en konsyans kler. Pli enportan ankor, mon konnen ki mon’n fer plezir Zeova.”

Kan ou reste ferm e reziste tantasyon, ou kapab asire ki ou osi ou pou fer plezir Bondye!​—Proverb 27:11.

[Not anba lo paz]

[Portre lo paz 13]

Kan ou vwar bann zimaz ki annan pour fer avek sèks deswit vir laba

[Portre lo paz 13]

Kan ou annan bann move panse, arete e priye

[Portre lo paz 14]

“Mon al lo Enternet ler i annan dimoun otour mwan”