Labib i sanz lavi

Mon ti viv mannyer mon oule

Rakonte par Christof Bauer

NE: 1951

PEI NATAL: LALMANNY

LEPASE: EN LATITID ENDEPANDAN E VANTAR

MON LAVI DAN LEPASE: Bann premye lannen mon lavi, mwan ek mon fanmir nou ti reste Leipzig, dan Les Lalmanny, pa lwen avek lafrontyer Repiblik Tyek ek Lapolonny. Ler mon ti annan si-z-an, nou ti al reste Brezil e pli tar Ekwador akoz travay mon papa.

A laz 14 an, mon ti ganny anvoye kot en boarding school Lalmanny. Mon ti bezwen okip mon lekor mon menm akoz mon paran ti Sid Lanmerik, byen lwen avek mwan. Mon ti vin en dimoun endepandan. Mon pa ti vreman mazinen ki mannyer mon aksyon ti afekte lezot.

Ler mon ti annan 17 an, mon paran ti retourn Lalmanny. O konmansman, mon ti reste avek zot. Me vi ki mon ti endepandan alor sa ti fer li enposib pour viv anba zot twa. A laz 18 an, mon ti kit lakour.

De zour an zour, mon lavi ti nepli fer sans e mon ti konmans rode akoz mon la lo later. Apre ki mon ti’n obzerv bann diferan fason viv ek lorganizasyon, mon ti konvenki ki pli bon keksoz mon kapab fer avek mon lavi se pour servi li pour eksplor nou zoli plannet avan zonm i detri li.

Mon ti kit Lalmanny, aste en moter e al Lafrik. Me pa bokou letan apre mon ti bezwen retourn Lerop pour repar mon moter. En pti pe letan apre, ler mon ti pe asize lo lans Portigal, mon ti deside pour aret servi moter e rod en mwayen transpor lo delo.

Mon ti zwenn en group zenn ki ti pe prepare pour al fer en vwayaz atraver Losean Atlantik. Parmi sa group zenn, mon ti zwenn mon madanm, Laurie. Premyerman, nou ti al lo bann zil Karaib. Apre ki nou ti’n reste en pti pe letan Puerto Rico, nou ti retourn Lerop. Nou ti anvi en bato lavwal ki nou ti kapab modifye pour nou reste ladan. Me apre trwa mwan ki nou ti pe rod en bato, en sel kou nou proze ti tonm dan delo. Mon ti ganny en lord pour zwenn lafors militer Alman.

Mon ti pas 15 mwan dan lafors naval Alman. Pandan sa letan, mon ti marye avek Laurie e nou ti prepar nou  pour kontinyen vwayaze. Zis avan mon ti konmans servis militer, nou ti’n aste lakok en bato. Pandan mon servis militer, ptitapti nou ti aranz sa lakok pour fer li vin en pti bato lavwal. Nou ti pe mazinen pour reste ladan e kontinyen eksplor nou zoli plannet. I ti a sa moman, apre mon servis militer me avan ki nou ti fini nou bato, ki nou ti rankontre bann Temwen Zeova e konmans etidye Labib.

KI MANNYER LABIB TI SANZ MON LAVI: Premye kou, mon pa ti vwar nesesite pour sanz mon lavi. Mon ti’n marye avek sa madanm ki mon ti pe reste avek e mon ti’n deza fini aret fimen. (Efezyen 5:5) Konsernan nou vwayaz otour lemonn, mon ti panse ki i ti pou vo lapenn pour dedye nou lavi pour obzerv kreasyon merveye Bondye.

Me an realite, mon ti annan en bann sanzman pour fer, sirtou dan mon personnalite. Vi ki mon ti vantar e kontan depan lo mwan menm, mon ti zis konsantre lo sa ki ti mon ti kapab fer ek sa ki mon’n deza fer. Mon ti viv mannyer mon oule.

En zour, mon ti lir sa ki Zezi ti dir dan son Sermon lo Montanny. (Matye, sapit 5-7) Premye kou, mon ti pa ti konpran sa ki Zezi ti dir lo sa ki fer en dimoun ere. Par egzanp, i ti dir ki bann ki lafen e swaf ki pou ere. (Matye 5:6) Mon ti demann mon lekor ki mannyer en dimoun ki dan bezwen i kapab ere. Anmezir ki mon ti kontinyen etidye, mon ti realize ki nou tou nou annan en bezwen spirityel. Me pour nou kapab satisfer sa bezwen spirityel, avek limilite nou devret rekonnet ki nou annan sa bezwen. I zis parey Zezi ti dir: “Ere bann ki konsyan zot bezwen spirityel.”​—Matye 5:3, NW.

Apre ki nou ti’n konmans nou letid Labib Lalmanny, nou ti al reste Lafrans nou de Laurie e pli tar Itali. Partou kot nou ti ale, nou ti zwenn Temwen Zeova. Mon ti vreman enpresyonnen par sa lanmour senser ki zot annan pour kanmarad e linite ki egziste ant zot. Mon ti vwar ki bann Temwen i vreman en lasosyasyon frer ek ser dan lemonn antye. (Zan 13:34, 35) Avek letan, nou de Laurie nou ti batize.

Apre nou batenm, mon ti kontinyen fer sanzman dan mon personnalite. Nou ti deside pour fer en vwayaz tou dilon lakot Lafrik e apre nou ti travers Losean Atlantik pour al Leta-z-ini. Se la dan sa losean, kot nou ti tousel dan en pti bato antoure avek zis delo, ki mon ti realize ki kantite ptipti mon ete konpare avek nou gran Kreater. Vi ki mon ti annan bokou letan lib, (napa bokou keksoz pour fer dan milye losean) mon ti zis lir Labib. Sirtou, bann resi lo lavi Zezi ti vreman tousan. I ti en zonm parfe avek bann abilite eksepsyonnel, pourtan i pa ti zanmen atir latansyon lo li menm. Son lavi pa ti konsantre lo li menm me lo son Papa dan lesyel.

Apre ki mon ti’n reflesir lo legzanp Zezi, mon ti vwar nesesite pour met Rwayonm Bondye premye dan mon lavi olye konsantre lo lezot keksoz ki mon ti anvi fer. (Matye 6:33) Kan nou ti finalman ariv Leta-z-ini nou de Laurie, nou ti deside pour reste laba e rod plito Rwayonm Bondye.

KI MANNYER MON’N BENEFISYE: Avan, ler mon ti depan lo mon menm, souvan mon pa ti tro sir lo mon bann desizyon. Me aprezan, mon’n trouv en sours lasazes parfe pour gid mwan. (Izai 48:17, 18) Mon’n osi trouv en bi dan lavi ki mon ti napa avan sa. Sa se pour ador Bondye e ed lezot aprann konn li.

Ler nou’n aplik bann prensip Labib dan nou lavi, nou maryaz in vin bokou pli for. Nou’n osi ganny beni avek en zoli fiy, ki’n grandi pour konn e kontan Zeova.

Nou lavi pa’n touzour fasil. Me avek led Zeova, nou determinen pour pa zanmen bes lebra oubyen aret depan lo li.​—Proverb 3:5, 6.

[Ekstre lo paz 15]

Mon ti realize ki mon bezwen met Rwayonm Bondye premye dan mon lavi