IMIT ZOT LAFWA | ZOZEF

“Ki mannyer mon kapab fer sa gran keksoz mal?”

ZOZEF ti respir sa ler fre, parfimen avek bann bon loder bann fler ki pous dan delo. I ti pe ganny anmennen par en karavann bann marsan ki ti pe travers sa plato pre o bor gran Larivyer Nil. Mazin sa group dimoun ek samo ki ti pe vwayaz ver en lot lavil Ezipsyen. Ler zot pe pase tou dilon sa larivyer en floranten ouswa en ibis i pran lavol. Zozef ti mazin ankor son lakour dan montanny Ebronn ki ti en distans plizyer santenn kilomet. Me aprezan i ti dan en landrwa vreman diferan.

Mazin bann zako pe fer tapaz e kriye anler dan bann pye palm ek pye fig. Pour Zozef, parol bann dimoun ki ti pas o bor li ti nepli konpreansib. Petet i ti esey konpran tou sa bann mo ek fraz ki i ti kapab. Pour li i ti fer sans pour aprann, parski i ti konnen ki i pa ti pou zanmen vwar son lakour ankor.

Zozef ti zis dan son 17 oubyen 18 an, kantmenm sa i ti pe fer fas avek bann defi ki ti kapab fer per bann adilt. Akoz son papa ti pli kontan li, son bann frer ti zalou e zot ti menm pros pour touy li. Me olye touy li zot ti vann li avek sa bann marsan. (Zenez 37:2, 5, 18-28) Apre ki zot ti’n vwayaze pour plizyer semenn, sa bann marsan ti paret pli relaks anmezir zot ti pe apros sa pli gran lavil kot zot ti pe mazin fer bokou profi par vann Zozef ek zot bann marsandiz presye. Ki mannyer Zozef pa ti les dezespwar pran rasin dan son leker? Ki mannyer nou ozordi nou kapab anpes bann defi lavi ek bann dezapwentman fer nou perdi nou lafwa? Nou kapab aprann bokou avek Zozef.

“ZEOVA TI AVEK ZOZEF”

“Aprezan Zozef ti ganny anmennen Lezip e en Ezipsyen ki apel Potifar, en zofisye ek sef gard Faraon, ti aste li avek bann Ismaelit ki ti’n anmenn li laba.” (Zenez 39:1) Sa bann parol dan Labib i ed nou konpran sa imilyasyon ki sa zenn garson ti santi ler i ti ganny vann ankor enn fwa. I ti konmsi i ti zis en marsandiz! Ou kapab mazin Zozef pe swiv son nouvo met, en zofisye Ezipsyen, dan bann semen ki ti ranpli avek plizyer kyosk komers kot dimoun ti pe fer bokou tapaz anmezir ki Potifar ti pe anmenn Zozef kot son nouvo lakour.

Zozef pa ti pou zanmen kapab konsider sa landrwa konman se li. I ti grandir dan en fanmir nomad ki ti viv dan latant e ki ti pe souvan sanz landrwa reste anmezir ki zot pran swen avek zot bann troupo mouton. Bann Ezipsyen ris parey Potifar, ti reste dan bann lakaz ki ti’n ganny penn avek bann zoli kouler. Bann arkeolog i dir ki bann Ezipsyen ti kontan bann zarden ki ti annan bann pye dibwa ki donn lonbraz ek basen delo kot zot ti plant papyrus, lotus ek lezot plant ki pous o bor delo. Serten sa bann lakaz ti ganny konstri dan milye bann zarden, zot ti annan gran lavarang ek gran lafnet ki les antre bon ler, zot ti annan bokou lasanm, en gran lasal a manze ek landrwa reste pour bann serviter.

 Eski Zozef ti vreman enpresyonnen avek sa lavi deliks? I paret ki non. Plis ki tou keksoz, i ti probableman santi li tousel. Langaz, fason sanze ek larelizyon bann Ezipsyen ti drol pour li. Zot ti ador en kantite diferan Bondye, pratik grigri ek mazik e zot ti obsede avek lanmor ek lavi apre lanmor. Me ti annan en keksoz ki ti anpes Zozef santi li tousel. Sa resi Labib i dir nou “Zeova ti avek Zozef.” (Zenez 39:2) Zozef ti sirman devid son leker avek Bondye. Labib i dir ki “Zeova i pros avek tou bann ki kriy li.” (Psonm 145:18) Ki lot fason ki ti ed Zozef vin pli pros avek son Bondye?

Sa zenn garson ti refize pour les li deprimen e otan ki i ti kapab i ti konsantre dan son travay. Zeova ti beni li pour son zefor e Zozef pa ti tarde pour ganny faver son nouvo met. Potifar ti vwar ki son zenn servant ti pe ganny beni par Zeova, Bondye pep Zozef, e san dout sa bann benediksyon ti fer sa Ezipsyen prospere. Potifar ti gradyelman apresye travay Zozef e i ti met li ansarz tou son keksoz.​—Zenez 39:3-6.

Zozef in kit en bon legzanp pour bann zenn ki pe servi Bondye ozordi. Par egzanp, kan zot kot lekol par fwa zot kapab trouv zot dan en lanvironnman ki drol e etranz, en lemonn ki ranpli avek bann aktivite mazik e ki napa en vre bi dan lavi. Si ou dan sa sityasyon, rapel ki Zeova pa’n sanze. (Zak 1:17) I toultan avek tou bann ki reste fidel avek li e ki travay dir pour fer li plezir. I beni zot plennman e i pou fer parey avek ou.

Antretan, sa resi i dir nou, Zozef ti pe grandi. Sa zenn garson in vin en zonm e enn ki “kosto e byen atiran.” Sa bann parol i montre ki en danze ti pros pou arive, akoz labote fizik i souvan fer dimoun port en latansyon ki ou pa’n anvi e ki pa apropriye.

“I PA TI DAKOR”

Pour Zozef fidelite ti enportan, me i pa ti leka pour madanm Potifar. Nou lir: “Madanm son met ti konmans ganny atire par Zozef e dir li: ‘Dormi avek mwan.’” (Zenez 39:7) Eski Zozef ti les li ganny tante par lapros sa madanm payen? Labib pa donn nou okenn rezon pour prezimen ki Zozef ti napa sa dezir e lanvi ki laplipar garson son laz ti annan. Osi, Labib pa dir ki sa madanm ki ti abitye ganny tou sa ki i ti anvi, ki son msye ti en zofisye ris e enportan, pa ti atiran fizikman. Eski Zozef ti rezonn dan li menm ki son met pa ti pou zanmen konnen? Eski i ti les li ganny tante par sa posibilite pour ganny bann keksoz materyel ki sa relasyon ti kapab anmennen?

 An realite, nou pa kapab konn tou sa ki ti pase dan lespri Zozef. Me nou konpran klerman kwa ki ti dan son leker. Nou kapab remark sa atraver son larepons: “La mon met pa konnen kwa ki dan son lakaz e i’n konfye mwan pour pran swen avek tou son keksoz. Napa personn ki pli gran ki mwan dan sa lakaz e i pa’n refiz mwan nanryen eksepte ou, akoz ou son madanm. Alor ki mannyer mon kapab fer sa gran keksoz mal e fer pese kont Bondye?” (Zenez 39:8, 9) Zis mazin sa zenn garson pe dir sa bann parol dan en fason ferm. Son leker ti fer mal ler i ti mazin sa aksyon ki madanm Potifar ti anvi i komet. Akoz?

Parey Zozef ti dir, son met ti annan konfyans dan li. Potifar ti’n konfye tou keksoz dan lanmen Zozef, eksepte son madanm. Ki mannyer Zozef ti kapab trai sa konfyans? I ti menm ay sa nide. Me ti annan en lot keksoz ki i ti pli deteste, sa nide pour fer pese kont Zeova, son Bondye. Zozef ti’n aprann en kantite avek son paran konsernan pwennvi Bondye lo maryaz ek fidelite. Ler Zeova ti enstitye sa premye maryaz, i ti fer li kler ki msye ek madanm i devret reste atase avek kanmarad e vin en “sel laser.” (Zenez 2:24) Sa bann ki ti esey kas sa linyon ti riske provok lakoler Bondye. Par egzanp, sa bann zonm ki ti pros pour vyol madanm Abraam, granmer Zozef e madanm Izaak, granmanman Zozef, ti pros pour perdi zot lavi. (Zenez 20:1-3; 26:7-11) Zozef ti’n aprann byen sa leson e i ti pare pour met li an pratik.

Madanm Potifar pa ti kontan sa ki i ti tande. Zis mazinen, sa senp lesklav pe rezet son lavans e dir ki sa i en “gran keksoz mal”! Malgre sa, i ti persiste. Petet akoz son lafyerte ek son lorgey i ti determinen pour fer Zozef sanz son desizyon. Alor i ti demontre menm leta lespri ki Satan ti annan ler i ti tant Zezi. Satan pa ti reisi e olye les tonbe, i ti esper “en pli bon lokazyon.” (Lik 4:13) Alor, bann dimoun fidel i bezwen determinen pour reste ferm. Koumsanmenm ki Zozef ti azir. Menm si sa sityasyon ti kontinyen “zour apre zour” i ti reste ferm. Nou lir, “i pa ti dakor.” (Zenez 39:10) Me, madanm Potifar ti determinen pour sedwir Zozef.

I ti swazir sa moman kan tou bann servant pa ti dan lakaz. I ti konnen ki Zozef ti pou bezwen antre anndan pour fer son louvraz. Ler Zozef ti antre i ti esey met li dan son pyez. I ti graponn Zozef par son lenz e sipliy li en dernyen fwa, “Dormi avek mwan!” Zozef ti azir deswit. Pour esey sov li, i ti ris son lenz me sa madanm pa ti oule larg son lenz. I ti reisi sape, me son lenz ti reste dan lanmen sa madanm. Apre i ti elwanny li avek sa madanm!​—Zenez 39:11, 12.

Nou kapab rapel konsey ki zapot Pol ti ganny enspire pour dir: “Elwanny zot avek bann pratik imoral.” (1 Korentyen 6:18) Pa sa i en bon legzanp ki Zozef in kite pour tou bann vre Kretyen! Dan lavi tou le zour, nou kapab rankontre bann dimoun ki napa menm respe pour lalwa moral Bondye parey nou, me sa pa vedir ki nou devret dakor pour ganny enfliyanse par zot bann move lenfliyans. Menm si i kapab kout nou ser, nou devret elwanny nou avek zot.

Dan ka Zozef, i ti vreman kout li ser. Madanm Potifar ti anvi revanze. Deswit i ti konmans kriye pour ki lezot serviter i vin dan lakaz. I ti dir ki Zozef ti’n esey vyol li e apre taye ler i ti kriye. I ti gard lenz Zozef konman levidans e esper son msye arive. Kan Potifar ti ariv kot lakour, son madanm ti rakont li sa menm zistwar e menm blanm li pour anmenn sa etranze kot zot. Ki ti reaksyon Potifar? Nou lir: “Son lakoler ti monte”! I ti fer Zozef ganny anfermen dan prizon.​—Zenez 39:13-20.

“ZOT TI ATAS SON LIPYE AVEK LASENN”

Nou pa konn bokou lo ki mannyer bann prizon Ezipsyen ti ete dan sa lepok. Bann arkeolog in dekouver larestan sa bann prizon, zot ti bann gran striktir solid ek bann kaso anba later. Pli tar, Zozef ti dekrir sa landrwa konman “en trou,” ki fer nou konpran ki i ti en landrwa fernwanr kot ti napa lespwar. (Zenez 40:15, not anba lo paz) Dan liv Psonm, nou aprann ki Zozef ti ganny plis tourmante ankor, “Zot ti atas son lipye avek lasenn;  zot ti met feray otour son likou.” (Psonm 105:17, 18) Bann Ezipsyen ti souvan met bann prizonnyen anba kontrol par anmar zot koud pour fer zot lebra reste deryer e zot ti osi met en kolye feray otour likou sa prizonnyen. Pa Zozef ti’n bezwen soufer en kantite akoz i ti ganny maltrete pour en keksoz ki i pa ti merite!

An plis, sa pa ti en dezapwentman ki ti pou dire zis en pti pe letan. Sa resi i dir ki Zozef “ti reste laba dan sa prizon.” I ti pas plizyer lannen dan sa landrwa terib! * Zozef pa ti konnen si en zour i ti pou ganny large. Anmezir ki sa bann premye zour terib ti vin bann semenn ek mwan, ki mannyer Zozef ti reisi lite kont depresyon ek dezespwar?

Sa resi i asir nou: “Zeova ti kontinyen avek Zozef e i ti kontinyen montre lanmour fidel anver li.” (Zenez 39:21) Napa okenn prizon, lasenn ek kaso anba later ki kapab anpes Zeova demontre son lanmour fidel anver son bann serviter. (Romen 8:38, 39) Nou kapab mazin Zozef pe devid son soufrans avek son Papa lanmour dan lesyel dan lapriyer e apre sa ganny sa lape ek konfor avek sa sel “Bondye ki touzour donn konsolasyon.” (2 Korentyen 1:3, 4; Filipyen 4:6, 7) Ki lezot keksoz Zeova ti fer pour Zozef? Nou’n lir ki I ti kontinyen fer Zozef ganny “faver dan lizye sa zofisye prizon.”

Sa bann prizonnyen ti annan travay pour fer e ankor enn fwa Zozef ti donn Zeova en keksoz pour beni. I ti travay dir, donn son meyer dan travay ki i ti ganny donnen e lezot keksoz i ti les dan lanmen Zeova. Zeova ti beni travay Zozef e ti ganny konfyans ek respe lezot, zis parey ler i ti dan lakour Potifar. Nou lir: “Alor sa zofisye ki ti ansarz prizon ti met Zozef ansarz bann prizonnyen e tou sa ki zot ti annan pour fer laba, se Zozef ki ti fer sir ki tou ti ganny fer. Sa zofisye pa ti fatig li avek okenn sa bann keksoz ki Zozef ti responsab, parski Zeova ti avek Zozef e Zeova ti fer reisi tou sa ki Zozef ti fer.” (Zenez 39:22, 23) Pa sa ti en konfor pour Zozef lefet ki i ti konnen ki Zeova ti pe pran swen avek li!

Nou kapab rankontre serten sanzman ki fer nou lavi difisil, menm serten lenzistis, me nou kapab aprann atraver lafwa Zozef. Si nou kontinyen apros Zeova dan lapriyer, kontinyen obei son bann komannman e fer bokou zefor pour fer sa ki byen dan son lizye, i pou beni nou. Dan ka Zozef, Zeova ti annan ankor plis benediksyon pour donn li, parey ki nou pou vwar dan prosen lartik dan sa seri.

[Not anba lo paz]

[Portre lo paz 13]

Madanm Potifar ti remark fidelite Zozef

[Portre lo paz 15]

Zozef ti travay dir dan prizon e Zeova ti beni li