Travay dir—Eski i annan valer konmela?
LO KOUVERTIR | KI MANNYER POUR KONTAN TRAVAY DIR
TRAVAY DIR—Eski i annan valer konmela?
Alex i pran en gran respirasyon anmezir ki i met en lot bwat dan pikep sa konpannyen ki i travay avek. I demann son lekor, ‘Akoz mon’n pri dan sa nespes louvraz ki pa ni gou? Ki zour mon pou ganny en kantite larzan ki mon pou santi ki mon’n reisi dan lavi? Mon lavi ti pou pli gou si mon pa ti ni bezwen travay!’
Parey Alex dan sa senaryo, bokou dimoun pa kontan travay dir ozordi. Aaron en mekanisyen i dir, “En kantite dimoun i mazinen ki i en laont lo zot pour fer nenport ki pti travay senp. Zot gran parol se: ‘Mon pe zis fer sa ziska ki mon ganny en pli bon travay.’”
Akoz bokou dimoun i santi ki travay dir i pa pour zot? Petet zot in ganny enfliyanse par medya ki souvan donn sa nide ki sa “pli bon” lavi i enn ki fasil e deliks. Matthew en travayer mentenans i dir, “Dimoun i krwar ki ler ou bezwen travay dir pour viv, savedir ou pa’n vreman reisi dan lavi.” En kliner ki apel Shane in remark sa menm latitid i dir, “Travay en lazournen pour ganny lapey sa zournen i en keksoz ki dimoun nepli fer konmela.”
De lot kote, plizyer dimoun ki’n reisi i vreman kontan travay dir. Daniel, en travayer konstriksyon ki annan 25 an i dir, “Mon krwar ki travay dir i anmenn en kantite byenfe, sirtou ler ou annan en bon lobzektif.” Andre ki annan 23 an i dakor avek sa i dir, “Mon krwar ki boner ek lazwa i annan en lyen avek nou travay. Mwens travay e en latitid nanryenfer i pa en swa ki pou anmenn en lavenir ranpli avek boner me pou plito anmenn en lavenir annwiyan!”
Ki mannyer bann dimoun parey Daniel ek Andre in reisi devlop en pwennvi pozitif konsernan travay dir? I kler ki zot in aplik bann prensip Labib dan zot lavi. Olye dekouraz travay dir, Labib i promot devouman ek perseverans dan travay. Me Labib i pa zis dir nou fodre ki nou travay. I osi montre nou ki mannyer pour kontan nou travay.
Ki bann prensip Labib ki kapab ed ou pour trouv satisfaksyon dan ou travay? Nou envit ou pour egzamin detrwa sa bann prensip ki nou pou vwar dan sa lartik swivan.
