LO KOUVERTIR | ESKI OU TI A KONTAN ETIDYE LABIB?

En Progranm Letid Labib Pour Tou Dimoun

Temwen Zeova i ganny rekonnet pour zot travay predikasyon. Me eski ou ti konnen ki nou osi fer en progranm letid Labib dan lemonn antye?

An 2014, plis ki 8,000,000 Temwen Zeova dan 240 pei in kondwir preski 9,500,000 letid Labib sak mwan. * Anfet, sa kantite dimoun ki pe etidye Labib avek nou i depas popilasyon apepre 140 pei!

Pour reisi fer sa travay edikasyonnel, Temwen Zeova i pibliy preski en bilyon edmi Labib, liv, magazin ek lezot piblikasyon letid sak lannen dan apepre 700 diferan langaz! Sa travay eksepsyonnel ki ganny fer pour pibliy tousala i permet dimoun etidye Labib dan zot langaz prefere.

 LAREPONS BANN KESTYON KI SOUVAN GANNY DEMANDE KONSERNAN NOU PROGRANM LETID LABIB

Ki mannyer sa letid i deroule?

Nou swazir diferan topik baze lo Labib e egzamin bann verse Labib ki relye avek sa bann size. Par egzanp, Labib i reponn bann kestyon tel parey: Ki sennla Bondye? Ki mannyer Bondye i ete? Eski i annan en non? Kote i reste? Eski nou kapab vin pros avek li? Sa ki pa fasil se pour konnen kote pour trouv sa bann larepons dan Labib.

Pour ed dimoun trouv sa bann larepons, normalman nou abitye servi sa liv 224 paz ki annan pour tit Ki Labib i vreman dir? * Sa liv in ganny fer espesyalman pour ed dimoun konpran bann lansennyman de baz lo Labib. I enkli bann leson lo Bondye, Zezi Kri, soufrans bann imen, rezireksyon, lapriyer e bokou plis size ankor.

 Kan e kote sa letid i kapab ganny fer?

Sa letid i kapab ganny fer en letan ek landrwa ki konvenab pour ou.

Pour konbyen letan en sesyon letid i dire?

Bokou dimoun i met dekote apepre enn erdtan sak semenn pour etidye Labib. Me sa letan i kapab varye. Nou pou adapte li dapre ou progranm personnel. I annan dimoun ki etidye pour zis 10 a 15 minit sak semenn.

Konbyen sa letid Labib i koute?

Sa letid ek piblikasyon i gratwit. Sa i annakor avek lenstriksyon ki Zezi ti donn son bann disip, i ti dir: “Zot in resevwar pour nanryen alor donn osi pour nanryen.”​—Matye 10:8.

Pour konbyen letan mon pou bezwen etidye?

Ou kapab kontiny fer sa letid otan ki ou oule. Sa liv Ki Labib i vreman dir? i kontyen 19 leson. Ou kapab etidye nenport oubyen tou bann leson avek en vites ki ou santi i apropriye pour ou.

Eski mon oblize vin en Temwen Zeova?

Non. Nou rekonnet avek respe ki sak dimoun i annan drwa pour swazir kwa ki i pou krwar. Selman, dimoun ki aprann bann lansennyman de baz konsernan Labib i kapab fer en swa baze lo en bon konnesans.

 Kote mon kapab ganny plis lenformasyon?

Lo sit Enternet jw.org ou pou kapab trouv lenformasyon egzakt konsernan bann krwayans ek travay Temwen Zeova.

Ki mannyer mon kapab demann en letid Labib?

● Ranpli sa form lo www.pr418.com.

● Ekrir sa ladres ki pli pros avek ou ki lo paz de sa magazin.

● Kontakte Temwen Zeova dan ou zanmirant. Ou kapab get anba Churches > Association of Jehovah’s Witnesses dan liv telefonn.

[Not anba lo paz]

[Bwat lo paz 5]

“Kan mon ti pe lekol mon pa ti zanmen kontan etidye me sa kalite letid ti gou. An plis, bann keksoz ki mon ti aprann ti vreman rekonfortan!”​—Katlego, Sid Afrik.

“Sa letid ti reponn tou mon bann kestyon e menm bokou plis ankor.”​—Bertha, Meksiko.

“Sa letid Labib ti ganny fer kot mwan dan en ler ki ti apropriye pour mwan. Ki pli bon ki sa!”​—Eziquiel, Brezil.

“Parfwa mon ti etidye 15 a 30 minit, par ler i ti kapab ale pour plis letan. I ti depan lo sa ki ti pli konvenab pour mwan.”​—Viniana, Lostrali.

“Sa letid ti gratwit. I ti enkrwayab!”​—Aimé, Benen.

“Mon ansenyan ti vreman zantiy e annan bokou pasyans. Nou ti devlop en lanmitye pros.”​—Karen, Nor Irlann.

“Bokou dimoun i etidye Labib san vin en Temwen Zeova.”​—Denton, Langleter.

[Bwat lo paz 7]

LED POUR BANN FANMIR

“Kan mon madanm ti konmans etidye Labib, mon ti remark bann gran sanzman dan li. Nou lavi familyal ti amelyore. Mon ti kirye pour konnen kwa ki i ti pe aprann alor mwan osi mon ti konmans etidye. Sa ki mon ti aprann ti fer mwan vin en pli bon dimoun. Etidye Labib ti fer nou fanmir vin pros avek kanmarad.”​—Eziquiel.

“Apre ki mon ti konmans etidye Labib, mon ti aret pran drog, mon ti aret abiz lalkol e mon ti aprann kontrol mon lakoler. Mon lakour i pli prop e pli annord. Mon apresye mon fanmir bokou plis ankor e mon kontan fer bann keksoz ki pou fer zot plezir. Mon santi mwan bokou pli ere.”​—Karen.

“Serten ti kritik mwan akoz mon etidye Labib. Me mon msye ti siport mwan dan mon desizyon par dir: ‘Mon pa fatig mwan avek sa ki dimoun i dir. Sa ki enportan pour mwan se sa bann bon sanzman ki ou’n fer. Kontinyen sa ki ou pe fer.’ Nou lavi fanmir pa’n zanmen pli meyer ki sa!”​—Viniana.