BIOGRAFI

Lizye Jairo son fason pour servi Bondye

Rakonte par son frer Samuel Ruiz-León Arroyo

Eski ou kapab mazinen ki ou napa kontrol lo ou lekor eksepte ou lizye? Mon frer Jairo i dan en sityasyon koumsa. Toudmenm, i kontan viv en lavi ki annan en vre sans. Avan mon eksplike akoz i ti vwar ki i annan en rezon pour viv, mon pou rakont zot son zistwar.

Jairo ti ne avek en kalite cerebral palsy ki apel spastic quadriplegia. * Anfet, i pa ti kapab kontrol laplipar son bann parti lekor. Son laservel pa ti kapab donn bann sinyal dan son bann misk alor sa ti fer son lebra ek lazanm bouz tousel. Parfwa, son bann mouvman san ekspekte i fer li fer dimal son lekor. Bann dimoun ki o bor li ti kapab ganny dimal si zot pa fer byen atansyon. Malerezman, nou ti bezwen anmar son lebra ek lipye avek son wiltyer pour evite ki sa i arive.

BANN SOUFRANS POUR VIN ADILT

Jairo ti ganny bokou douler fizik an grandisan. Kan i ti annan trwa mwan, i ti konmans ganny bebelouka e sa ti fer li perdi konnesans. Souvandfwa, manmi ti bezwen tyonbo li for e depese pour al lopital, an krwayan ki i’n mor.

Lefet ki son bann misk ti souvan anmase, avek letan son bann lezo ti vin diform. A laz 16 an, i ti deranz son laans e i ti bezwen fer en gran loperasyon kot son lazanm ek bann lezo o bor laans. Mon ankor rapel Jairo pe kriye tou le swar akoz douler apre son loperasyon.

Dezabilite Jairo ti fer li depan antyerman lo lezot pour manze, sanze e mont lo lili. Normalman, manmi ek dadi ki ti fer tousala pour li. Menm si Jairo ti bezwen led konstaman, nou paran ti toultan rapel li ki son lavi pa depan zis lo dimoun me osi lo Bondye.

EN FASON POUR KOMINIKE

Nou paran i Temwen Zeova e zot in toultan lir bann zistwar Labib avek Jairo depi ki i ti ankor en pti baba. Zot ti toultan konnen ki lavi i annan plis sans ler en dimoun i annan en relasyon pros avek Bondye. Jairo ti’n pri dan en lekor frazil ki ti kontinyelman bouz bouze, me i ti annan en lespwar merveye pour lavenir. Par kont, zot ti toultan demann zot lekor si Jairo pou kapab konpran konnesans ki dan Labib.

En zour ler Jairo ti ankor zanfan, dadi ti demann li, “Jairo ou kapab koz avek mwan?” Apre sa i ti azoute, “Si ou vreman kontan mwan, ou pou koze!” Anmezir ki dadi ti pe sipliy li pour dir omwen en mo, larm ti marse dan lizye Jairo. Menm si i ti pe esey eksprim son santiman atraver  bann parol, i ti zis kapab gronnyen. Papa ti santi li mal lefet ki i ti’n fer Jairo plere. Me reaksyon Jairo ti montre ki i ti konpran sa ki papa ti’n dir. Problenm se ki i pa ti kapab koze.

Pa tro lontan apre, nou paran ti remarke ki parfwa Jairo ti bouz son lizye vitman. I ti paret ki i ti pe esey fer sa pour eksprim son bann panse ek santiman. Jairo ti fristre akoz pa toultan ki lezot ti kapab konpran sa ki i ti oule dir. Me ler nou paran ti aprann pour konpran son bann siny ki i ti fer avek son lizye e donn li sa ki i ti bezwen, Jairo ti fer en gran sourir. Sa ti son fason pour dir mersi.

En speech therapist ti dir nou ki en bon fason pour kominik avek Jairo se lev nou de lanmen anler kan pe demann li en kestyon wi ou non. Lanmen drwat i vedir wi e lanmen gos i vedir non. Alor, i ti kapab dir sa ki i oule par fikse son lizye lo sa bon kote lanmen.

EN MOMAN ENPORTAN DAN LAVI JAIRO

Trwa fwa par an, Temwen Zeova i fer bann lasanble kot bann diskour baze lo Labib i ganny prezante avek bann gran lodyans. Jairo ti toultan eksite ler bann diskour pour kandida batenm ti ganny prezante. En zour ler i ti annan 16 an, papa ti demann li, “Jairo eski ou anvi batize?” Deswit i ti get lanmen drwat dadi pour montre son dezir pour pran batenm. Apre sa dadi ti azoute, “Eski ou’n promet Bondye dan lapriyer ki ou pou servi li pour touzour?” Ankor enn fwa, Jairo ti deswit get lanmen drwat dadi. I ti kler ki Jairo ti’n fini dedye son lavi avek Zeova.

Apre plizyer diskisyon lo Labib, i ti kler ki Jairo ti’n byen konpran ki batenm Kretyen i vedir. Alor, an 2004 i ti reponn sa kestyon pli enportan ki i pa ti zanmen ganny demande avan, “Eski ou’n dedye ou lavi avek Bondye pour fer son lavolonte?” Jairo ti reponn sa kestyon par lev son lizye anler. I ti son fason ki i ti’n plàn pour dir wi. Alor a laz 17 an, i ti batize konman en Temwen Zeova.

SON LIZYE TI KONSANTRE LO FER BANN KEKSOZ BONDYE

An 2011, Jairo ti ganny en nouvo fason pour kominike. I ti ganny en konpiter ki i ti kapab kontrol avek son lizye. Sa lekipman ti swiv mouvman son lizye pour ki i kapab ouver bann laplikasyon lo konpiter. Bat lizye oubyen get en laplikasyon i parey ler en dimoun i klik en progranm lo konpiter par servi en mouse. En bord ki annan bann senbol  ki koresponn avek bann mo oubyen fraz ti ganny fer pour ed Jairo kominike. Ler i bat son lizye lo enn sa bann senbol, sa progranm i sanz en mesaz an ekri dan laform en lavwa elektronik.

Anmezir ki konprenezon Jairo lo Labib ti ogmante, son dezir pour ed lezot spirityelman ti osi ogmante. Pandan nou bann Ladorasyon Fanmir tou le semenn, souvan son lizye ti ale vini ant mwan ek son konpiter. Sa ti son fason pour fer mwan rapel pour ekri son bann komanter ki i kapab donnen pandan bann diskisyon ki annan kestyon ek larepons dan nou bann renyon Kretyen.

Pandan bann renyon, i dousman dousman get lo konpiter pour klik lo sa laplikasyon apropriye e apre sa, tou dimoun i kapab tann sa lavwa elektronik. I fer en gran sourir sak fwa i pe ankouraz bann dimoun dan kongregasyon. Alex, enn parmi bann zenn ki zanmi avek Jairo i fer sa remark, “Mon toultan enpresyonnen sak fwa mon tann komanter Jairo konsernan en pwen dan Labib.”

Jairo i osi servi son lizye pour partaz son krwayans avek lezot. En fason i fer sa, se par klik lo en senbol ki montre en zarden kot bann zannimo ek bann dimoun tou sort ras pe viv anpe ansanm. Ler i klik lo la, sa lavwa elektronik i dir, “Dan Revelasyon 21:4, Labib i donn en lespwar kot later pou vin en paradi e maladi ek lanmor pou nepli egziste.” Si sa dimoun i demontre lentere, Jairo i klik lo en lot senbol ki dir, “Eski ou ti a kontan etidye Labib avek mwan?” Nou ti sirprann kan nou granpapa ti aksepte sa lenvitasyon pour etidye Labib. I ti eksitan pour vwar Jairo pe fer letid granpapa dousman dousman akonpannyen par en lot Temwen Zeova. I ti en lazwa, ler granpapa ti batize pandan lasanble rezyonal trwa zour Madrid, Out 2014.

Bann ansenyan kot son lekol ti remark devosyon Jairo anver Bondye. Rosario, enn son bann speech therapist, ti dir: “Si en zour mon anvi antre dan en larelizyon, mon pou vin en Temwen Zeova. Mon’n vwar ki mannyer lafwa Jairo in donn li en vre bi dan lavi, malgre son sityasyon difisil.”

Lizye Jairo i toultan ouver gran ler mon lir avek li sa promes dan Labib: “Sa enn ki bwete pou grenpe parey en serf e lalang sa enn ki kozpa pou kriye avek lazwa.” (Izai 35:6) Menm si parfwa i santi li dekouraze, i souvan annan en bon leta lespri. Sa i selman posib akoz son lavi antye i santre lo Bondye ek son bann zanmi Kretyen. Son lazwa ek son lafwa for i laprev ki servi Zeova i kapab fer ki en lavi difisil i vo lapenn pour viv.

[Not anba lo paz]

[Bwat lo paz 14]

Ki bann dimoun ki konn Jairo i dir

Rosa, ki annan 63 an i remarke: “Ou kapab vwar lo figir Jairo ki i vreman zwaye. Son gran dezir pour servi Zeova i motiv lezot pour fer parey.”

Antonio, ki annan 32 an i dir: “I tous mwan sak fwa mon vwar Jairo eksprim son lafwa.”

Andrés, ki annan 67 an i dir: “I paret ki Jairo i pli byen konpran serten lansennyman dan Labib ki mwan.”

[Portre lo paz 14, 15]

Jairo i servi son konpiter ki i kontrol avek son lizye ek sa lavwa elektronik pour fer son bann komanter dan bann renyon e partaz son krwayans avek lezot