Lekel Lennmi Kris?

▪ En nouvo film ki fer per i annan pour tit Antichrist (lennmi Kris).

▪ En group mizisyen renonmen ti apel enn zot albonm Antichrist Superstar.

▪ Friedrich Nietzsche, en filozof dan diznevyenm syek ti donn enn son bann liv sa tit The Antichrist.

▪ Bann lerwa ek bann lanperer dan lepok mwayennaz ti souvan apel zot bann adverser bann lennmi Kris.

▪ Martin Luther, sef Reformasyon Alman ti dekrir bann lepap Katolik Romen konman bann lennmi Kris.

LEFET ki sa term “Lennmi Kris” in sitan ganny servi pour tou keksoz, enkli pour bann dirizan politik ek relizye e osi pour bann film, alor i toutafe normal pour demande: Lekel lennmi Kris? Eski sa i annan okenn keksoz pour fer avek nou? Definitivman Labib i sa premye landrwa pour rod lidantite lennmi Kris, parski sa term i aparet senk fwa.

LENNMI KRIS IN GANNY DEVWALE

Sel ekriven Labib ki servi sa term “Lennmi Kris” i zapot Zan. Ki mannyer i ti dekrir lennmi Kris? Remark sa bann parol dan son premye let: ‘Mon bann zanfan, lafen i pros. Zot in deza tande ki Lennmi Kris i devre vini, i annan deza en kantite Lennmi Kris ki’n fini aparet, alor nou konnen ki i sa [dernyen ler, NW]. Sa bann dimoun i sorti kot nou, me zot pa ti vreman apartenir avek nou . . . Lekel ki manter, si pa sa enn ki dir ki Zezi pa Kris? Limenm Lennmi Kris, sa ki rezet Papa ek son Garson.’​—1 Zan 2:18, 19, 22.

Ki nou aprann atraver sa bann parol? Zan ti mansyonn “en kantite Lennmi Kris,” ki montre ki i pa zis en dimoun me en group. Bann dimoun oubyen lorganizasyon ki form parti lennmi Kris i fann bann mansonz par dir ki Zezi pa Kris oubyen Mesi e esey mal reprezant relasyon ant Bondye ek Son Garson Zezi Kri. Sa bann ki form parti lennmi Kris i dir ki zot Kris oubyen son bann reprezantan, “sa bann dimoun i sorti kot nou”me zot in rezet vre lansennyman Labib. Deplis, sa group ti egziste letan Zan ti ekri son let, dan “[dernyen ler, NW]” ver lafen letan bann zapot.

Kwa ki Zan ti ekri ankor konsernan lennmi Kris? Ler i ti koz lo bann fo profet i ti avertir: “Si en dimoun i afirmen ki Zezi in reelman vin koman en zonm, i posed Lespri Bondye. Tou sa ki pa rekonnet Zezi, pa posed Lespri ki sorti kot Bondye. Lespri Lennmi Kris ki zot in tande i devre vini, i deza dan lemonn.” (1 Zan 4:2, 3) Dan son dezyenm let, Zan ti met lanfaz lo sa pwen: “En kantite tronper fannen partou dan lemonn, bann dimoun ki pa aksepte ki Zezi-Kri in vin dan laser imen. En tel dimoun i en tronper e Lennmi Kris.” (2 Zan 7) I kler ki Zan ti konpran ki lennmi Kris ti pou enkli tou bann ki ti fann bann mansonz konsernan Zezi Kri ek son bann lansennyman par ekspre.

“BANN FO PROFET” EK “SA GRAN REBEL”

Byen avan ki Zan ti ekri konsernan sa bann anbeter relizye, Zezi Kri ti donn sa konsey avek  son bann disip, “Mefye ou bann fo profet. Zot vin kot ou parey mouton, me anndan zot bann loulou feros.” (Matye 7:15) Pareyman zapot Pol ti averti bann Kretyen an Tesalonik, “Pa les personn tronp zot dan okenn fason. Sa zour pa pou vini avan ki rebelyon kont Bondye i arive. Fodre ki i aparet, sa Gran Rebel, sa Lennmi ki’n ganny destinen pour destriksyon i revel son lekor.”​—2 Tesalonisyen 2:3.

Alor dan premye syek, bann fo profet ek aposta ti’n deza konmans fer tou pour afeblir kongregasyon Kretyen. Sa mo “Lennmi Kris” ki Zan ti servi i enplik tou bann ki ti propaz bann mansonz e anbet dimoun dan domenn relizye konsernan Zezi Kri ek son bann lansennyman. Pol ti revel pwennvi Zeova lo sa bann dimoun kan i ti dekrir zot konman “garson destriksyon.”

FER ATANSYON SA KI LENNMI KRIS I FER OZORDI

Me ki zot pe fer ozordi? Bann dimoun ek lorganizasyon ki form parti lennmi Kris pe kontinyen opoz Kris ek son bann lansennyman. Zot fann bann mansonz e fer bann trik par ekspre avek lentansyon pour fer dimoun konfize konsernan lidantite Papa setadir Zeova ek Son Garson, Zezi Kri. Nou annan bann bon rezon pour fer atansyon sa bann mansonz ek trik. Annou egzamin de legzanp.

Pandan plizyer syek, bann legliz in propaz sa doktrin lo Trinite par dir ki Papa ek Garson i en sel personnaz. Lennmi Kris in kasyet lidantite Bondye ek Zezi Kri an dizan ki sa i en mister. Alor sa i konfiz dimoun e anpes bann ki senser pour imit Zezi Kri e vin pros avek Bondye parey Labib i ankouraz zot pour fer.​—1 Korentyen 11:1; Zak 4:8.

An plis ki sa, bann legliz i ankouraz dimoun pour servi bann Labib kot non Bondye, Zeova in ganny tire ladan. Zot fer sa menm si sa non Zeova i aparet apepre 7000 fwa dan teks orizinal Labib. Avek ki rezilta? Sa in anmenn plis konfizyon ankor lo lidantite sa vre Bondye.

De lot kote, par konn Zeova, ki non Bondye, sa in ed bokou adorater senser pour vin pli pros avek Bondye. Sanmenm sa ki ti arive avek Richard. I eksplik son konversasyon avek de Temwen Zeova, “Zot ti montre mwan non sa vre Bondye Zeova dan Labib. Mon ti etonnen e kontan pour aprann ki Bondye i annan en non. Sa ti en keksoz ki mon pa ti’n zanmen tande oparavan!” Apartir sa moman, i ti fer bann sanzman dan son lavi pour viv annakor avek bann prensip Labib e fer plezir Zeova. I dir, “Konn non Bondye ti ed mwan devlop en relasyon pros avek li.”

Pour plizyer syek, lennmi Kris in kit plizyer milyon dimoun dan fernwanr spirityel. Me par etidye Parol Bondye, Labib, nou kapab konn vre lidantite lennmi Kris e ganny libere avek son bann mansonz ek trik.​—Zan 17:17.

[Ekstre lo paz 15]

Zapot Zan ti konpran ki lennmi Kris ti pou enkli tou bann ki ti fann bann mansonz konsernan Zezi Kri ek son bann lansennyman par ekspre

[Portre lo paz 15]

Zezi ti averti ki bann fo profet ti pou vin kot zot parey ‘mouton me zot bann loulou feros’