LO KOUVERTIR | LAVI APRE LANMOR​—ESKI I POSIB?

Eski i annan lespwar pour bann defen?

Eski bann mor i kapab viv ankor?

LABIB I REPONN: “Sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo.”​—Zan 5:28, 29.

Zezi ti predir ki dan lavenir anba renny son Rwayonm, pou nepli annan dimoun mor. Fernando ki’n ganny mansyonnen dan lartik presedan i dir, “Mon ti etonnen premye fwa ki mon ti lir Zan 5:28, 29. Sa ti donn mwan lespwar ek en pwennvi pozitif lo lavenir.”

Dan letan pase Zob en zonm fidel ti ekspekte ki apre son lanmor Bondye ti pou resisit li. Zob ti demande: “Si en dimoun i mor, eski i kapab viv ankor?” I ti dir avek konfidans, “Toulezour mon korve mon pou espere, ziska mon soulazman i arive.”​—Zob 14:14, 15.

Rezireksyon pa ti en nouvo keksoz pour Mart, ser Lazar. Apre lanmor Lazar, Zezi ti dir Mart, “Ou frer pou resisite.” Mart ti reponn, “Mon konnen ki i pou resisite zour larezireksyon lafen dimoun.” Zezi ti dir li, “Mwanmenm, larezireksyon ek lavi, sa ki krwar dan mwan, menm si i a’n mor, i pou viv.” (Zan 11:23-25) Deswit apre Zezi ti resisit Lazar! Sa resi eksitan i donn nou en avangou lo bann gran levennman ki pou arive a lavenir. Zis mazinen partou dan lemonn dimoun pe resisite!

Eski i annan ki pou resisite pour al dan lesyel?

LABIB I REPONN: Parol Bondye i montre nou ki rezireksyon Zezi i diferan avek sa wit lezot ki’n ganny rikorde dan Labib. Sa wit dimoun ti resisit lo later. Me konsernan rezireksyon Zezi nou lir, “Zezi-Kri i’n mont dan lesyel, e i’n asize dan kote drwat Bondye.”(1 Pyer 3:21, 22) Eski zis Zezi tousel ki ti pou resisite pour al dan lesyel? Pli boner Zezi ti dir son bann zapot, “Apre ki mon al prepar en plas pour zot, mon pou retournen e pran zot avek mwan, pour ki zot a la kot mwan mon ete.”​—Zan 14:3.

Kris ti al dan lesyel e i ti fer preparasyon pour larive serten son bann disip. An tou pou annan 144,000 ki pou resisite pour al dan lesyel. (Revelasyon 14:1, 3) Me ki sa bann disip Zezi pou al fer laba?

 Zot pou vreman okipe! Labib i dir, “Byennere e beni, tou bann ki partisip dan sa premye rezireksyon. Dezyenm lanmor pou napa okenn pouvwar lo zot. Zot pou vin pret pour Bondye e pour Kris, e zot pou renny avek li pandan 1,000 an.” (Revelasyon 20:6) Sa bann ki pou resisite pour al dan lesyel pou rennyen ansanm avek Kris konman lerwa ek pret lo bann ki pou lo later.

Apre sa lekel ki pou resisite?

LABIB I REPONN: Labib i rikord sa diskour ki zapot Pol ti fer, “Mon annan sa menm lesperans dan Bondye parey zot ki tou dimoun bon konman move, pour resisite.”​—Akt 24:15.

Lekel ki pou enkli dan sa group ki Pol ti refer avek konman bann “bon”? Annou pran en legzanp. Danyel en zonm fidel ti ganny dir ver lafen son lavi, “Ou pou repoze, me ou pou debout pour ganny ou par a lafen bann zour.” (Danyel 12:13) Kote Danyel pou ganny resisite? “Bann dimoun drwat pou ganny later e zot pou reste lo la pour touzour.” (Psonm 37:29) Zezi ti predir, “Byennere bann ki dou[s], akoz zot pou posed later.” (Matye 5:5) Danyel ek lezot zonm ek fanm fidel pou ganny resisite pour viv lo later pour touzour.

Lekel ki pou enkli dan sa group ki Pol ti refer avek “konman move”? Zot pou sa plizyer bilyon dimoun ki’n mor. Bokou zot pa’n zanmen ganny sa loportinite pour konpran e aplik laverite dan Labib. Apre zot rezireksyon, zot pou kapab aprann konn e apresye Zeova * ek Zezi. (Zan 17:3) Tou sa bann ki swazir pour servi Bondye pou annan sa posibilite pour viv osi lontan ki Zeova i egziste, savedir pour touzour.

Ki mannyer kondisyon lo later pou ete?

LABIB I REPONN: Bondye “pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” (Revelasyon 21:4) “Zot pou konstri lakaz e zot pou reste ladan; zot pou plant pye rezen e zot pou manz son fri.”​—Izai 65:21.

Zis mazin ou pe viv dan sa kalite kondisyon avek ou bann defen ki’n resisite! Me kestyon ki pa ankor ganny reponn i, Ki mannyer ou asire ki i pou vreman annan rezireksyon?

[Not anba lo paz]

[Ekstre lo paz 6]

Tou sa bann ki swazir pour servi Bondye pou annan sa posibilite pour viv ere pour touzour avek en lasante parfe.

[Portre lo paz 5]

Rezireksyon Lazar i donn nou en lespwar pour lavenir

[Portre lo paz 6]

Parol Bondye i asir nou ki plizyer bilyon dimoun ki’n mor pou resisite