Eski i annan en dimoun ki pe ekoute?
LO KOUVERTIR | ESKI I VREMAN VO LAPENN PRIYE?
Eski i annan en dimoun ki pe ekoute?
Serten dimoun i panse ki lapriyer i zis en gaspiyaz letan e napa personn ki pe ekoute. Lezot in esey priye, me zot santi ki zot pa’n ganny okenn larepons. En dimoun ki pa krwar dan Bondye ti kree son prop nide lo ki kalite personnaz Bondye i ete, apre i ti priye: “Zis dir mwan en pti parol dousman.” Me i dir ki Bondye ti gard “silans total.”
Pourtan Labib i asir nou ki i annan en Bondye ki ekout lapriyer. Labib i mansyonn sa parol ki ti ganny dir avek en pep dan lepase: “Ler i [Bondye] tann ou pe kriy osekour, i pou demontre labonte anver ou, i pou reponn ou dek ki i pou tann ou.” (Izai 30:19) En lot verse Labib i dir: “Lapriyer bann dimoun drwat i fer li plezir.”—Proverb 15:8.
Dan Labib i osi annan legzanp bann dimoun ki zot lapriyer ti ganny ekoute. En verse i dir ki Zezi ti ofer son “lapriyer . . . sa enn ki ti kapab sov li.” (Ebre 5:7) I annan lezot legzanp dan Danyel 9:21 e 2 Kronik 7:1.
Akoz alor serten dimoun i santi ki zot lapriyer pa ganny reponn? Pour ki nou lapriyer i ganny ekoute, nou bezwen priy selman avek Zeova * sa Bondye ki ganny mansyonnen dan Labib, me pa avek lezot bondye oubyen bann zanset. Bondye i osi ekspekte ki “nou demann keksoz dapre son lavolonte,” setadir keksoz ki li i aprouve. Si nou priy dan sa fason, Bondye i asir nou ki i “pou ekout nou.” (1 Zan 5:14) Alor, pour ki nou lapriyer i ganny ekoute, nou bezwen aprann konn sa Bondye ki Labib i koz lo la e aprann konn son lavolonte.
Bokou dimoun i konnen ki lapriyer i pa zis en servis relizye me ki Bondye i vreman ekout e reponn zot lapriyer. Isaac sorti Kenya, i dir: “Mon ti priye pour ki mon konpran Labib. Deswit apre, en dimoun ti apros mwan e ofer mwan sa led ki mon ti bezwen.” Hilda sorti Filipin ti anvi aret fimen. Apre detrwa fwa ki i’n eseye e pa’n reisi, son msye ti sizere, “Akoz ou pa demann led Bondye?” I ti aplik sa konsey e dir: “Mon ti sirprann lafason ki Bondye ti ed mwan. I ti konmsi mon ti konmans perdi sa lanvi pour fimen. Mon ti reisi arete.”
Eski i posib ki Bondye i enterese pour ed ou avek ou bann keksoz personnel ki annakor avek son lavolonte?
[Not anba lo paz]
^ par. 6 Dapre Labib Zeova i non Bondye.
[Ekstre lo paz 4]
Zezi ti priy son Papa e i ti “egzos li.”—Ebre 5:7
