Ou garson i plere “Mon pa kapab fer sa! I tro difisil! Mon pa pou zanmen aprann!” Deswit i pe esey aret fer en keksoz ki difisil pour li. Ou pa kontan vwar ou garson pe lalit pour fer keksoz me ou anvi i aprann ki mannyer pour sirmont bann difikilte. Eski ou devret depese pour ed li? Eski ou devret les li aret fer sa keksoz? Oubyen eski ou kapab ansenny ou zanfan pour annan perseverans?

 Perseverans i enportan. Ler paran i ansenny son zanfan pour fer bann travay dir ki pou devlop son abilite, sa zanfan i kapab fer byen lekol. I pou zwaye, an bonn sante e i pou annan bann bon lanmitye avek lezot dimoun. De lot kote, ler paran pa les son zanfan eksperyans bann difikilte ek dezapwentman, sa zanfan i kapab tonm dan depresyon, santi ki i napa okenn abilite e ki i pa kapab viv en lavi satisfezan parey en adilt.

 Perseverans i kapab ganny ranforsi. Menm bann pti zanfan zot kapab pli determinen pour esey fer bann keksoz ki difisil e rezourd bann problenm. Dan en resansman ki ti ganny fer, bann serser ti vwar ki bann pti baba 15-mwan ti pou esey fer zot mye pour fer en keksoz difisil si zot ti vwar en adilt pe lalit pour fer sa keksoz olye reisi fer li san fer okenn zefor.

 “Mon rapel mon ti ansenny mon bann fiy ki mannyer pour anmar zot lase soulye. I pa en keksoz ki ou aprann zis dan en zour. Sak fwa zot ti bezwen anmar zot lase soulye, zot ti pou asiz zot tousel pour 10 a 15 minit pe esey mazinen ki mannyer pour anmare. Apre mon ti pou ed zot. Zot ti fer sa pour detrwa mwan e parfwa zot ti dekouraze. Zot ti menm plere me finalman zot ti aprann ki mannyer pour anmar zot lase soulye. Mon ti pou kapab fer mon lavi fasil si mon ti aste bann soulye ki napa lase pour zot. Me parfwa, menm konman paran, nou bezwen annan perseverans pour kapab ansenny nou zanfan ki mannyer pour persevere.”​—Colleen.

 Perseverans i kapab ganny afebli. Serten paran i kapab anpes zot zanfan persevere san fer par ekspre. Ki mannyer? Vi ki zot anvi zot zanfan i santi zot byen, sa bann paran i depese pour “ed” sa zanfan pour ki sa zanfan pa santi li dezapwente oubyen ki i pa’n reisi dan sa ki i pe fer. Me i pa toultan byen pour fer sa. Ekriven Jessica Lahey i ekri “Sak fwa nou ed . . . nou zanfan pour fer en keksoz difisil, nou pe anvoy en mesaz kler: ki nou krwar zot napa valer, zot pa kapab fer nanryen ki byen e zot pa merite ganny nou konfyans.” a Ki sa i kapab fer? Zanfan i kapab aret esey fer en keksoz difisil dan lavenir akoz zot krwar ki zot bezwen zot paran pour ed zot.

 Ankouraz ou zanfan pour travay dir. Paran i kapab ansenny zot zanfan pour annan perseverans par donn zot bann louvraz ki apropriye pour zot laz. Par egzanp, bann zanfan 3 a 5 an i kapab ede pour ploy lenz e anmas zot zouzou. Bann zenn zanfan i kapab met bann konmisyon dan zot plas, met lasyet lo latab pour en repa, anmas bann zafer sal lo latab apre en repa, zet salte e fer bann pti netwayaz. Bann adolesan i kapab fer bann netwayaz ki en pe pli difisil, ki enkli mentenans ek travay reparasyon. Zanfan pa toultan anvi fer louvraz me zot ganny bokou byenfe ler zot paran i ekspekte zot ede dan lakour depi ler zot ankor zenn. Ki mannyer zanfan i benefisye? Zot aprann ki mannyer pour travay dir e sa pou ed zot reste dan en travay ki difisil me ki neseser ler zot vin adilt.

 Prensip Labib: “En dimoun i ganny byenfe dan nenport travay dir ki i fer.”​—Proverb 14:23.

 “Pa perdi letan pour donn zanfan louvraz zis pour kit zot bizi. Napa personn, ni menm en zanfan ki kontan sa. Donn zot en keksoz pratik pour fer. Si ou zanfan i ptipti , fer li eswiy bann meb ki pa tro o pour li. Si ou pe lav loto, fer li lav bann landrwa en pe pli ba kot ou vwar difisil pour ou lave. Apre, pa tarde pour dir lezot ki ou zanfan ki’n fer sa gro travay.”​—Chris.

 Gid ou zanfan ler i pe fer sa bann louvraz difisil. Parfwa, zanfan i fasilman aret fer en louvraz akoz zot pa konnen ki mannyer pour fini sa louvraz. Alor, ler ou pe ansenny ou zanfan en nouvo louvraz, ou kapab esey sa bann metod swivan. Premyerman, fer sa louvraz anmezir ki ou zanfan i get ou. Apre, fer sa louvraz ansanm. Apre, get ou zanfan ler i pe fer sa louvraz e donn li bann sizesyon. Finalman, les ou zanfan fer sa louvraz li menm.

 Prensip Labib: “Mon’n kit en legzanp pour zot, pour ki parey mon’n fer avek zot, zot osi zot devret fer parey.”​—Zan 13:15.

 “Dapre mon leksperyans, nou paran, nou bezwen kit en bon legzanp si nou anvi nou zanfan i devlop perseverans. Nou bezwen montre sa kalite ki nou anvi zot devlope.”​—Doug.

 Ed ou zanfan realize ki ler i fer en keksoz i normal pour lalit e ki parfwa i kapab dezapwente. Rakont ou zanfan bann moman ler keksoz ti difisil pour ou me ou ti kontinyen eseye e ou ti benefisye akoz ou pa ti abandonnen. Eksplik ou zanfan ki i normal pour li annan difikilte pour fer nouvo keksoz e si i fer fot sa pou ed li aprann. Reasir ou zanfan ki si i pa reisi fer en keksoz, ou ankor kontan li parey ki si i ti’n reisi fer sa keksoz. Zis parey ler ou servi ou bann misk, ou bann misk i vin for, abilite pour ou zanfan persevere pou grandi, si ou les li fer fas avek bann difikilte. Alor ler ou zanfan i fer fas avek en difikilte, olye ed li les li kontinyen eseye menm si i dezapwente. Sa liv How Children Succeed i dir: “Pli bon fason pour en zenn vin for e matir i bezwen esey fer en keksoz ki petet i pa pou reisi fer.”

 Prensip Labib: “Ler nou zenn i byen pour fer fas avek difikilte.”​—Lamantasyon 3:27, Contemporary English Version.

 “Ler ou les bann zanfan kontinyen esey fer en keksoz difisil pour en pe letan e zot konnen ki zot manman ek papa i la pour ed zot, bann zanfan pou benefisye. Apre en serten letan, zot pou aret lalit e zot pou ganny abilite ek konfidans ki zot bezwen pour persevere.”​—Jordan.

 Felisit son zefor me pa son lentelizans. Par egzanp, olye dir, “Ou’n byen fer sa legzanmen! Ou vreman entelizan,” ou kapab dir “Ou’n byen fer sa legzanmen! Mon vreman enpresyonnen avek lafason ki ou’n etidye.” Akoz i enportan pour felisit son zefor me pa son lentelizans? Dr. Carol Dweck i dir ki ler ou dir bann zanfan ki zot entelizan “sa i fer ki bann zanfan i annan doutans lo sa ki zot kapab fer ler keksoz i difisil ouswa ler keksoz i al mal. Si bann paran i anvi donn zot zanfan en kado, sa pli bon keksoz ki zot kapab fer i ansenny zot zanfan pour kontan sirmont bann difikilte, kontan pour aprann avek bann fot, kontan travay dir e esey rod nouvo fason pour fer keksoz e kontinyen aprann. Si zot fer sa, zot zanfan pa pou ganny kontrole par sa dezir pour ganny felisite.” b

 Prensip Labib: “Ler en dimoun i ganny felisite sa i montre ki kalite dimoun i ete.”​—Proverb 27:21.