Lafason ki nou servi teknolozi, i kapab swa fortifye oubyen afekte nou maryaz. Ki mannyer teknolozi i kapab afekte ou maryaz?

•  Sa ki ou devret konnen

•  Sa ki ou kapab fer

•  Sa ki bann koup i dir

•  Diskisyon

•   Si nou servi byen teknolozi, sa i kapab anmenn byenfe dan nou maryaz. Par egzanp, serten msye ek madanm i servi teknolozi pour reste an kontak avek kanmarad pandan lazournen ler zot pa ansanm.

   “En pti teks ki dir ‘Mon kontan ou’ oubyen ‘Mon pe mazin ou’, i kapab fer ou ek ou konzwen santi zot pros avek kanmarad.”​—Jonathan.

•   Si teknolozi i ganny mal servi, i kapab afekte en maryaz. Par egzanp, serten dimoun i pas bokou letan avek zot lekipman elektronik ki fer zot pas mwens letan avek zot konzwen.

   “Mon asire ki i annan letan kot mon msye ti pou’n pli anvi koz avek mwan si mon pa ti pe servi mon telefonn.”​—Julissa.

•   Serten dimoun i dir ki zot kapab fer bann bon konversasyon avek zot konzwen e servi zot lekipman elektronik an menm tan. Par kont, en sosyolog ki apel Sherry Turkle, i krwar ki sa i pa posib. I paret ki kantmenm dimoun i krwar ki i en bon keksoz ler zot fer plizyer keksoz an menm tan, sa i pa vre. I dir: “ Si nou esey fer plizyer keksoz an menm tan nou pa pou reisi fer zot byen.” a

   “Mon kontan ler mon fer konversasyon avek mon msye me pa ler i pe fer lezot keksoz an menm tan. Ler i fer sa, i fer mon santi ki sa ki i pe fer i pli enportan ki mwan.”​—Sarah.

 Sa ki enportan konnen: Lafason ki ou servi teknolozi i kapab ede oubyen afekte ou maryaz.

 Konn ou priyorite: Labib i dir: “Verifye sa ki pli enportan.” (Filipyen 1:10) Demann ou lekor: ‘Eski mwan ek mon konzwen nou servi sa letan ki nou sipoze pase avek kanmarad, lo nou lekipman elektronik?’

 “I tris pour vwar en msye ek en madanm pe konsantre lo zot telefonn anmezir ki zot pe pran en repa ansanm dan restoran. Nou pa anvi vin lesklav teknolozi e oubliy nou relasyon avek lezot, en keksoz ki pli enportan.”​—Matthew.

 Met bann limit. Labib i dir: “Kontinyen vey byen ki mannyer zot viv, pa viv parey dimoun bet me parey dimoun saz. Servi byen zot letan.” (Efezyen 5:15, 16) Demann ou lekor: ‘Eski mon kapab met en letan dekote pour lir e reponn bann mesaz ki pa irzan, olye esey reponn tou mesaz ki mon gannyen?’

 “Mon’n vwar ki i ede ler mon met mon telefonn lo silans e reponn bann mesaz dan en moman apropriye. Ler telefonn i sonnen, ou ganny en mesaz oubyen en imel, i pa toultan irzan pour reponn.”​—Jonathan.

 Si i posib, kit travay kot travay. Labib i dir: “I annan en letan pour tou keksoz.” (Eklezyast 3:1) Demann ou lekor sa bann kestyon: ‘Eski mon travay pe afekte mon lavi fanmir akoz mon servi mon telefonn dan lakour pour fer keksoz ki annan pour fer avek mon travay? Si wi, ki mannyer sa pe afekte mon maryaz? Ki mon konzwen i dir?’

 “Teknolozi i permet nou travay toultan e nenport ler. Mon’n bezwen fer zefor pour evite get mon telefonn tanzantan e fer keksoz ki annan pour fer avek mon travay ler mwan ek mon madanm nou ansanm.”​—Matthew.

 Diskit avek ou konzwen lo lafason pour servi teknolozi. Labib i dir: “Fodre pa ki sakenn i rod son prop lentere, me lentere lezot.” (1 Korentyen 10:24) Koz avek ou konzwen lo lafason ki sakenn ant zot i servi teknolozi e si i annan okenn sanzman ki zot devret fer. Ou kapab servi sa seksyon Diskisyon dan sa lartik pour ed ou.

 “Nou de mon msye, nou onnet avek kanmarad e nou dir kanmarad si nou santi ki enn ant nou pe servi son telefonn oubyen tablet tro souvan. Nou tou le de nou rekonnet ki sa i kapab vin en problenm, alor nou ekout byen lopinyon kanmarad.”​—Danielle.

 Sa ki enportan konnen: Fer sir ki ou pe servi teknolozi pour fer ou lavi fasil e ki ou pa les li annan kontrol lo ou.