Mari Magdalenn ti lev son latet ver lesyel e i eswiy larm dan son lizye. Son Senyer ki i kontan en kantite ti’n ganny kloute lo en poto. I ti ver midi en zour pandan sezon prentan, “me en sel kou pei antye ti dan fernwanr”! (Lik 23:44, 45) I ti aranz son lenz lo son zepol e koste pli pre avek sa madanm ki o bor li e may li. I pa ti en leklips ki ti pe anpes soley tape gran lizour pour trwa er-tan, akoz leklips i dir zis pour detrwa minit. Petet Mari Magdalenn ek lezot dimoun ki ti la ti antann bann zannimo ki normalman nou tann zot zis dan aswar. Serten dimoun ki ti pe get sa ki ti pe arive “ti vreman per e zot ti dir: “Vreman i ti Garson Bondye.” (Matye 27:54) Bann disip Zezi ek lezot ti kapab pe mazinen ki Zeova ti pe montre ki i ti sagren e vreman pa kontan avek lafason ki son Garson ti’n ganny trete.

I ti vreman difisil pour Mari Magdalenn get sa bann keksoz arive me i pa ti kapab zis ale. (Zan 19:26, 26) I pa fasil pour imazin sa kantite douler ki Zezi ti bezwen ladan. Manman Zezi osi ti bezwen rekonfor ek sipor.

Apre tou sa ki Zezi ti’n fer pour li, Mari ti santi li oblize pour fer tou sa ki i ti kapab pour li. I ti en dimoun ki’n pas dan bokou problenm e ganny abese, me Zezi ti ed li. Aprezan i ti en madanm avek dinyite e avek en bi dan lavi. I ti’n vin en dimoun ki annan en gran lafwa. Ki mannyer? Ki son lafwa i kapab ansenny nou ozordi?

Zistwar Mari Magdalenn dan Labib i konmans avek en kado ki i ti gannyen avek Zezi. Lavi Mari ti parey en kosmar, me Zezi ti liber li avek sa kalite lavi. Sa bann letan, bann demon ti aktif lo later. Sa bann move lespri ti pe atak en kantite dimoun, menm antre dan serten e pran kontrol zot lekor. Nou pa konnen ki lefe sa bann demon in annan lo pov Mari Magdalenn, nou zis konnen ki set zot ti’n antre dan li parey bann gran bouli. Gran mersi Zezi Kri ti sas zot tou!​—Lik 8:2.

Anfen Mari i libere avek sa bann demon e ganny en soulazman ki napa ase mo pour dekrir. I ti aprezan annan en nouvo lavi devan li. Ki mannyer i ti kapab demontre son lapresyasyon? I ti swiv Zezi tou son lavi e ler Zezi ek son bann disip ti bezwen led, i ti pare pour ed zot. Zezi ek son bann disip ti bezwen manze, lenz ek en landrwa pour dormi. Zot ti napa bokou larzan e sa letan, zot pa ti pe travay. Zot ti bezwen bokou led materyel pour kapab konsantre lo pres avek bann dimoun e ansenny zot.

Mari ek plizyer lezot madanm ti ede fourni Zezi ek son bann zapot sa ki zot ti bezwen. Zot ti “servi zot keksoz pour ed zot.” (Lik 8:1, 3) Serten sa bann madanm ti annan larzan. Labib pa dir si bann madanm ti lav zot lenz oubyen aranz landrwa reste dan sa bann vilaz ki zot ti vizite. Me zot ti pare pour fer sa ki i ti annan pour fer pour ed Zezi ek son bann zapot ki posibleman ti annan 20 an tou. Sirman zot led in fer ki Zezi ek son bann zapot ti kapab byen konsantre pour pres sa bon nouvel avek lezot. Byen sir, Mari ti konnen ki i pa ti pou zanmen kapab fini remersye Zezi pour tou sa ki i ti’n fer pour li, me sa pe ki i ti kapab fer, ti donn li bokou lazwa!

Ozordi, dimoun i kapab vwar li en laont pour fer bann senp keksoz pour ed lezot. Me Bondye pa pans koumsa. Zis imazin sa lazwa ki i ti santi ler i ti vwar Mari pe fer son mye pour ed Zezi ek son bann zapot! Ozordi osi, i annan plizyer Kretyen fidel ki pe fer en kantite keksoz pour ed lezot. Parfwa ler nou fer en pti travay pour en dimoun oubyen dir li en parol zantiy, sa i kapab annan en gran lefe lo li. Zeova i vreman kontan ler nou azir koumsa.​—Proverb 19:17; Ebre 13:16.

Mari Magdalenn ti enn sa bann madanm ki ti akonpanny Zezi ziska Zerizalenm pour fet Lapak lannen 33. (Matye 27:55, 56) I ti’n sirman soke ler i ti tande ki Zezi ti’n ganny arete e zize pandan lannwit. E pa se tou ki ti arive. Bann sef relizye Zwif ek lafoul dimoun ti met Gouverner Pons Pilat anba presyon ziska ki i ti kondann Zezi amor lo en poto. I tre probab ki Mari ti vwar son Met ranpli avek disan e fatige. I ti vwar li epize pe trenn dan semen sa gran poto ki i ti pou mor lo la lo son zepol.​—Zan 19:6, 12, 15-17.

Zot ti ariv dan landrwa kot Zezi ti pou ganny egzekite. Midi ti’n sonnen, me partou i fernwanr. Mari Magdalenn ek bann lezot madanm ti pe debout lanmenm “o bor poto martir Zezi.” (Zan 19:25) Mari ti reste ziska ki tou ti fini. I ti vwar ler Zezi ti demann Zan, sa zapot ki i ti kontan en kantite, pour pran swen avek son manman. I ti tann Zezi pe kriy son Papa dan son douler. I ti osi tann sa bann dernyen parol ki i ti dir zis avan i mor: “I’n ganny akonplir!” Mari ti dan bokou sagrinasyon. Me menm sa, i kler ki i ti ankor la apre ki Zezi ti mor. Pli tar, i ti reste o bor sa nouvo latonm kot Zozef, sa msye ris ki sorti Arimate, ti met lekor Zezi.​—Zan 19:30; Matye 27:45, 46, 57-61.

Legzanp Mari i rapel nou sa ki nou devret fer ler enn nou frer oubyen ser i pas dan difikilte. Petet nou pa pou kapab anpes en trazedi arive oubyen retir douler ki en dimoun pe santi. Par kont, nou kapab montre ki nou annan konpasyon ek kouraz. Zis prezans en zanmi i fer en gran diferans dan bann moman difisil. Ler nou reste avek en zanmi ki dan problenm, sa i montre ki nou annan bokou lafwa e i rekonfort sa zanmi en kantite.​—Proverb 17:17.

Apre ki lekor Zezi ti’n ganny met dan latonm, Mari ti parmi sa bann madanm ki ti al rod lezot zepis ki santi bon pour pas lo lekor Zezi pli tar. (Mark 16:1, 2; Lik 23:54-56) I ti lev byen boner lannmen apre Saba, soley pa ti ankor leve. Zis imazin li pe marse avek bann lezot madanm pe al kot latonm Zezi. Dan semen zot pe mazinen ki mannyer zot ti pou roul sa gro ros ki ti blok larantre. (Matye 28:1; Mark 16:1-3) Me sa pa ti anpes zot pour kontiny zot larout. Zot lafwa ti sirman motiv zot pour fer sa ki zot ti kapab e les larestan dan lanmen Zeova.

I probab ki Mari ti par devan bann lezot madanm ler zot ti pros pour ariv kot latonm Zezi. I ti aret en sel kou e sezi lanmenm. Sa ros ti’n bouze devan larantre e latonm ti vid! Mari ti en madanm debouryer. I ti retournen an tayan pour al dir Pyer ek Zan sa ki i ti’n vwar. Imazin li pe mank respirasyon anmezir ki i dir: “Zot in tir Senyer dan latonm e nou pa konnen kote zot in met li”! Pyer ek Zan ti degaze pour al kot latonm pour verifye pour zot menm. I ti vid, alor zot ti retourn se zot. *​—Zan 20:1-10.

Mari ti retourn kot latonm granmaten li tousel. I ti annan en silans total dan latonm. Letan ti pase, son larm ti marse dan son lizye e ti konman plere asodlarm. I ti kabann devan pour get dan latonm. I ti pa oule krwar menm ki Senyer ti nepli la! Me i ti ganny en sok, de lanz ti pe asize la! Zot ti demann li: “Akoz ou pe plere?” I ti reste ebete e repet sa ki i ti dir avek bann zapot: “Zot in pran mon Senyer e mon pa konnen kote zot in met li.”​—Zan 20:11-13.

Ler i ti vire, i ti annan en zonm ki ti pe debout deryer li. I pa ti rekonnet lekel, i ti mazinen ki i ti sa zardinyen ki okip sa landrwa. Sa zonm ti demann li byen zantiman: “Madanm, akoz ou pe plere? Lekel ki ou pe rode?” Mari ti reponn li: “Msye, si ou’n tir son lekor la, dir mwan kote ou’n met li e mon ava pran li.” (Zan 20:14, 15) Reflesir lo sa ki i ti dir. Eski sa madanm ti pou vreman kapab pran lekor Zezi Kri, en zonm ki ti for e an bonn sante e deplas li lo li tousel? Mari pa ti pran letan pour mazin lo sa. I ti zis konnen ki i ti bezwen fer sa ki i kapab.

Ler nou fer fas avek sagrinasyon ek bann lobstak ki paret tro dir pour anmennen, ki mannyer nou kapab imit Mari Magdalenn? Si nou konsantre zis lo nou febles ek limitasyon, lafreyer pou anpes nou azir. Me si nou determinen pour fer tou sa ki nou kapab fer e les larestan dan lanmen nou Bondye, nou pou menm kapab fer plis ki sa ki nou ti krwar nou kapab fer. (2 Korentyen 12:10; Filipyen 4:13) Pli enportan ankor, nou pou fer plezir Zeova. Mari ti sirman fer leker Zeova kontan e Zeova ti rekonpans li dan en fason ki i pa ti pou zanmen imazinen.

Sa zonm ki ti pe debout devan Mari pa ti en zardinyen. I ti deza en sarpantye, apre i ti vin en ansenyan ek Senyer Mari, ki i ti kontan en kantite. Me Mari pa ti rekonnet li, alor i ti konmans vire pour ale. I pa ti vin ditou dan lespri Mari ki Zezi ti’n kapab resisite e vin en lanz pwisan. Zezi ti’n pran lekor en imen, me pa sa enn ki i ti’n mor ladan. Dan sa bann zour eksitan ki ti swiv, i ti aparet avek plizyer dimoun e zot osi zot pa ti rekonnet li, menm bann ki ti konn li byen.​—Lik 24:13-16; Zan 21:4.

Ki mannyer Zezi ti fer Mari rekonnet li? Par dir en sel mo: “Mari!” I ti vir en sel kou e kriy “Rabouni!,” en mo Ebre ki sirman i ti servi bokou, ki vedir ansenyan. I ti dan en gran lakontantman. I ti’n revwar son Ansenyan ki i ti kontan en kantite. I ti graponn Zezi dan son lebra e pa ti anvi larg li.​—Zan 20:16.

Zezi ti konnen kwa ki i ti pe mazinen. I ti dir li: “Larg mwan.” Petet nou kapab imazin li pe dir sa Mari dan en fason zantiy e avek en zoli sourir anmezir ki i dekoste avek Mari. An menm tan, i dir Mari en keksoz ankourazan: “Mon pa ankor mont kot mon Papa.” I pa ti ankor ler pour li al dan lesyel. I ti ankor annan travay pour fer lo later e i ti oule ki Mari i ed li. Byensir Mari ti pe port latansyon lo tou sa ki Zezi ti pe dir li. “Al kot mon bann frer e dir zot, ‘Mon pe al kot mon Papa e zot Papa, kot mon Bondye e zot Bondye.’”​—Zan 20:17.

En gran privilez sorti kot son Met! Mari ti enn parmi sa bann premye disip ki ti ganny sa privilez pour vwar Zezi apre son rezireksyon e la i ti’n ganny sa gran privilez pour pas sa bon nouvel avek lezot. Imazin sa lazwa, sa leksitasyon ki ti pous li pour al rod bann disip. Imazin li dir sa an menm tan ki i pe esey reganny son souf: “Mon’n vwar Senyer!” Sa bann parol in sirman reste dan son lespri ek lespri sa bann disip Zezi pour en kantite letan. I ti dir zot tou sa ki Zezi ti’n dir li avek en gran leksitasyon. (Zan 20:18) Sa ki i ti dir ti azout avek sa ki bann disip ti’n tande avek bann lezot madanm ki ti’n al kot latonm Zezi.​—Lik 24:1-3, 10.

Ki mannyer sa bann zonm ti reakte? Be o konmansman zot pa ti byen reakte. Nou lir: “Sa ki zot ti pe dir pa ti paret fer sans pour zot e zot pa ti krwar sa bann madanm.” (Lik 24:11) Sa bann zonm ti’n grandi dan en lasosyete ki pa ti abitye annan konfyans dan madanm. Dapre bann tradisyon, en madanm pa ti annan drwa donn levidans ankour. Petet bann disip ti’n ganny enfliyanse par sa koutim plis ki zot ti mazinen. Me Zezi ek son Papa pa zanmen azir koumsa. Pa i en gran privilez sa ki sa madanm fidel ti gannyen!

Mari pa ti les reaksyon sa bann zonm fatig li, i ti konnen ki son Met ti annan konfyans dan li, e sa ti sifi pour li. Tou dimoun ki swiv Zezi, zot osi zot in ganny en mesaz en pe parey pour anonse. Labib i apel sa mesaz “bon nouvel lo Rwayonm Bondye.” (Lik 8:1) Zezi pa ti promet son bann disip ki tou dimoun ti pou krwar zot oubyen apresye zot travay. Anfet, i tou le kontrer. (Zan 15:20, 21) Alor i byen pour bann Kretyen gard antet legzanp Mari Magdalenn. Menm defo son bann frer spirityel pa’n diminyen son lazwa pour koz lo sa bon nouvel konsernan rezireksyon Zezi!

Pli tar, Zezi ti aparet avek son bann zapot e apre, avek lezot disip. En fwa, i ti aparet avek plis ki 500 dimoun! (1 Korentyen 15:3-8) Lafwa Mari ti sirman agrandi sak fwa Zezi ti aparet avek bann dimoun, menm si parfwa i ti tann lezot rakonte olye vwar pour li menm. Petet Mari ti dan sa renyon Zerizalenm zour Lapannkot ler Zezi ti devers lespri sen lo son bann disip.​—Akt 1:14, 15; 2:1-4.

Dan nenport ki ka, i annan en keksoz ki nou kapab asire: Mari Magdalenn ti reste fidel ziska lafen. Ki sakenn ant nou i fer parey! Nou kapab montre ki nou lafwa i gran parey pour Mari Magdalenn par montre lapresyasyon pour tou sa ki Zezi in fer pour nou. En lot fason i ler nou azir avek limilite e fer keksoz pour lezot, an menm tan annan konfyans ki Zeova pou ed nou.