Asize ater, son lekor in kouver depi latet ziska lipye avek bann klou, bann boubou vreman fermal. Esey vwar li dan ou lespri, son latet anba, zepol tonbe, i tousel, preski napa ni en lafors pour pous sa bann mous ki pe fer li letour zanmen fini. I pe asiz dan lasann pour montre ki i dan dey e i zis kapab grat son lapo malad avek en bout po kase. I’n perdi sitan bokou, i’n tonm vreman ba! Son bann zanmi, vwazen ek fanmir in abandonn li. Bann dimoun e menm bann zanfan i sikann li. I pe krwar ki son Bondye, Zeova, in vir kont li me i pa leka.​—Zob 2:8; 19:18, 22.

Nou pe koz lo Zob. Bondye ti dir sa lo li: “Napa personn konman li lo later.” (Zob 1:8) Plizyer syek pli tar, Zeova ti ankor touzour vwar Zob konman enn bann zonm drwat ki pli remarkab.​—Ezekyel 14:14, 20.

Eski ou pe pas dan difikilte ek maler? Zistwar Zob i kapab vin en gran rekonfor pour ou. I kapab osi ed ou konpran en kalite ki tou serviter Bondye i bezwen annan. Sa i reste fidel e san defo. Bann imen i demontre fidelite ler zot telman devoue anver Bondye ki zot kontinyen fer son lavolonte menm ler zot fer fas avek difikilte. Annou les Zob ansenny nou plis lo la.

I paret ki se Moiz, en zonm fidel ki ti ekri lo lavi Zob en pe letan apre ki Zob ti’n mor. Lefe ki i ti ganny enspire par Bondye, Moiz pa ti zis rakont bann levennman ki ti afekte Zob lo later me i ti osi devwal serten levennman ki ti arive dan lesyel.

O konmansman zistwar Zob, nou vwar ki i ti pe viv en lavi ere e satisfezan. I ti pe fer byen finansyerman e tou dimoun ti konn li e respekte li dan pei Ous, ki petet ti dan nor Arabi. I ti kontan partaze avek bann ki ti dan bezwen e protez bann ki ti san defans. Zob ek son madanm ti ganny beni avek dis zanfan. Me pli enportan ankor, Zob ti en zonm spirityel. I ti fer tou pour fer plezir Zeova, parey son bann fanmir, Abraam, Izaak, Zakob ek Zozef ti’n fer. Parey sa bann patriars, Zob ti azir konman en pret pour son fanmir, i ti ofer sakrifis regilyerman pour son bann zanfan.​—Zob 1:1-5; 31:16-22.

Me en sel kou, keksoz ti sanze dan lavi Zob. Nou ganny en pti apersi sa ki ti arive dan lesyel e nou aprann serten keksoz ki Zob pa ti konn ditou. Bann lanz fidel Zeova ti’n rasanble devan li e la Satan, en lanz rebel ti antre. Zeova ti konnen ki Satan pa ti kontan Zob ditou akoz i ti en dimoun drwat, alor i ti koz avek Satan e montre li konman fidelite Zob ti vreman remarkab. Satan ti reponn byen ardyese: “Eski ou krwar, pour nanryen ki Zob i annan respe pour Bondye? Pa ou’n protez li, son lakaz, son fanmir ek tou sa ki i posede?” Satan i deteste bann dimoun ki fidel. Kan zot montre ki zot tou pour Zeova, zot montre ki Satan i en tret ki napa santiman pour lezot. Sanmenm ki Satan ti pe ensiste ki Zob i servi Bondye pour bann rezon egois. I ti dir ki si Zob i perdi tou sa ki i annan, i pou modi Zeova dan son figir!​—Zob 1:6-11.

Zob pa ti okouran ki tousala ti pe pase, ki Zeova ti’n konfye li avek en gran privilez. Sa se pour montre ki Satan i mal. Zeova ti permet Satan depouy tou sa ki Zob ti annan. Selman i pa ti pou kapab touy Zob li menm. Satan ti enpasyan pour konmans son latas san pitye. Dan en lespas zis en zour, plizyer maler ti tap Zob enn apre lot. I ti aprann ki son bann zannimo, premyerman son bann bef ek bourik, apre son bann mouton, epi son bann samo, ti ganny detrir en sel kou. Pli move ankor, son bann serviter ki ti pe okip sa bann zannimo ti ganny touye. Dan enn sa bann ka ki ti ganny raporte avek Zob, ‘dife sorti dan lesyel’ ti lakoz sa destriksyon. Avan menm ki Zob ti pran kont kantite dimoun ki ti’n perdi lavi oubyen kantite ki i ti’n perdi materyelman, son pli gro maler ti tap li. Son dis zanfan ti kot lakour sa enn pli vye ler en tanpet divan ti tap lo son lakaz e pran lavi zot tou!​—Zob 1:12-19.

I difisil, menm petet enposib, pour mazinen ki mannyer Zob ti’n kapab santi li. I ti desir son lenz, raz son latet e tonm ater. Zob ti konklir ki Bondye in donn li e Bondye in repran avek li. Anfet dan en fason rize, Satan ti’n fer li paret ki Bondye ki’n anvoy sa bann dezas. Toudmenm, Zob pa ti modi Bondye parey Satan ti’n predir. O kontrer, Zob ti dir: “Son non i ganny beni!”​—Zob 1:20-22.

Satan ti ankoler me i pa ti oule perdi lager. Ankor en fwa, i ti vin devan Zeova pandan en rasanbleman avek bann lanz. Ankor, Zeova ti koz an byen lo Zob akoz i reste fidel malgre tou sa bann latak ki Satan ti’n fer lo li. Satan ti reponn: “Sa i normal; en zonm i donn tou sa ki i posede pour li sov son lavi. Me zis lev ou lanmen e tous son lezo ek son laser. Mon asire ki i pou modi ou dan ou figir!” Satan ti konvenki ki si Zob i ganny en bon maladi, i ti pou modi Bondye. Zeova ki ti annan konfyans total dan Zob, ti les Satan pran lasante Zob, me i ti napa drwa pran son lavi.​—Zob 2:1-6.

En pti kou apre, Zob ti ganny frape avek en maladi parey nou ti vwar o konmansman. Ou kapab mazin son pov madanm. I ti deza pe soufer lanmor son dis zanfan, aprezan i ti bezwen get son msye pe soufer ziska sa degre san ki i kapab fer nanryen pour ed li! Dan son langwas, i ti kriye: “Ou kontinyen reste fidel. Modi Bondye e apre mor!” Sa pa ti ditou son madanm ki i ti konnen e kontan. Sel keksoz ki Zob ti kapab dir se ki son madanm pe koz parey en dimoun ki’n perdi latet. Malgre tou, Zob ti refize modi Bondye. I pa ti dir nanryen ki pou fer li fer pese.​—Zob 2:7-10.

Eski ou ti konnen ki zistwar Zob, ki vre e tousan, i afekte ou personnelman? Remarke ki Satan pa ti zis akiz Zob dan en fason kriyel me i ti osi akiz tou dimoun an zeneral. I ti dir: “En zonm i donn tou sa ki i posede pour li sov son lavi.” Andotmo, Satan i krwar ki i enposib pour okenn dimoun reste konpletman fidel ek Zeova! I ensiste ki ou pa kontan Bondye senserman e ki ou pou kit li si ou bezwen sov ou lavi. Anfet, Satan pe dir ki ou egois zis parey li! Ou ti pou kontan prouve ki i mal? Nou tou endividyelman nou annan sa privilez. (Proverb 27:11) Aprezan annou vwar ki leprev Zob ti fer fas avek apre sa.

Trwa zonm ki ti konn Zob tin vin vizit li. Labib i dekri zot konman bann konpanyon oubyen konnesans. Zot ti antann koz lo maler Zob e zot ti vin vizit li pour rekonfort li. Kot zot ti pe vini dan lwen, zot pa ti rekonnet li. I ti telman dan douler e son lapo ti’n nwarsi avek sa maladi, ki i ti nepli sa Zob ki zot ti konnen. Sa trwa zonm, Elifaz, Bildad ek Zofar ti fer konmsi zot sagren, zot ti plere asodlarm e anvoy lasann lo zot latet. Apre sa, zot ti asize ater o bor Zob san dir nanryen. Pour en semenn antye zot ti asize la, lizour konman aswar, san dir en mo. Pa krwar ki zot ti reste trankil akoz zot ti pe esey rekonfort Zob. Non, parski zot pa ti sey demann li nanryen, zis zot ti vwar ki Zob ti pe soufer en kantite e sa tou dimoun ti konnen.​—Zob 2:11-13; 30:30.

Finalman, Zob ti bezwen konmans koz li menm. I ti montre ki degre i ti pe soufer ler i ti modi sa zour ki i ti ne. I ti osi devwal en rezon akoz i ti sitan dan lapenn. I ti krwar Bondye ki ti sours son bann problenm! (Zob 3:1, 2, 23) Zob pa ti’n perdi son lafwa dan Bondye, toudmenm i ti byen bezwen rekonfor. Me zis kan sa bann dimoun ti konmans koze, deswit Zob ti realize ki plito zot ti’n kontinyen reste trankil.​—Zob 13:5.

Elifaz, ki petet ti pli vye parmi zot e bokou pli vye ki Zob, ti konmans koz premye. Avek letan, sa de lezot ti swiv. An zeneral, nou kapab dir ki zot ti zis repet san reflesir sa ki Elifaz ti’n dir. Serten keksoz ki sa bann dimoun ti dir ti kapab paret napa nanryen mal avek, akoz zot ti zis repet bann keksoz ki dimoun i souvan dir lo Bondye ki paret korek, par egzanp ki Bondye i gran, i pini move dimoun e rekonpans bann ki bon. Me depi o konmansman, zot parol ti montre ki zot pa ti vreman zantiy avek Zob. Elifaz ti sizer en keksoz ki ti paret fer sans, si Bondye i bon e i pini move dimoun, i kler ki Zob ti pe ganny pini. Alor dan en sans, Zob ti bezwen move.​—Zob 4:1, 7, 8; 5:3-6.

I pa sirprann nou ki Zob pa ti byen resevwar sa parol. I pa ti dakor avek sa ditou. (Zob 6:25) Me sa trwa konseyer ti vin deplizanpli konvenki ki Zob ti’n bezwen fer kek keksoz mal an kasyet ki fer ki i ti merite tou sa bann move keksoz ki ti pe ariv li. Elifaz ti akiz Zob konmkwa i odasye, move e mank respe pour Bondye. (Zob 15:4, 7-9, 20-24; 22:6-11) Zofar ti dir Zob aret kontan lemal e aret kontan fer pese. (Zob 11:2, 3, 14; 20:5, 12, 13) Bildad li ti dir en keksoz vreman kriyel. I ti sizere ki bann garson Zob ti’n bezwen fer pese dan en fason ou en lot, alor zot ti merite mor koumsa!​—Zob 8:4, 13.

Sa bann dimoun ki ti mank bon zizman ti fer en keksoz pli pir ankor. Zot pa ti zis kestyonn fidelite Zob me osi met an kestyon si i vo lapenn reste fidel e san defo! Ler Elifaz ti konmans koze, i ti dekri konman i ti’n fer en leksperyans drol kot i ti’n rankontre en lespri envizib. Konklizyon ki Elifaz ti tire apre sa rankont avek en demon se ki Bondye ‘pa fer konfyans son bann serviter e i vwar defo dan son bann mesaze’ oubyen son bann lanz. Sa rezonnman i danzere akoz i konmsi i dir ki zonm pa kapab fer plezir Bondye! Pli tar, Bildad ti dir ki Bondye pa fatig li si Zob i reste fidel avek li, zis parey i pa pou fatig li avek fidelite en lever!​—Zob 4:12-18; 15:15; 22:2, 3; 25:4-6.

Eski ou’n deza sey rekonfort en dimoun ki pe soufer en kantite menm? Pa fasil pour fer sa. Me nou kapab aprann bokou avek sa trwa konpanyon Zob, sirtou lo sa ki nou pa devret dir. Zot ti dir bokou keksoz ki petet ti paret saz e fer sans me zot pa ti ni menm adres Zob par son non! Zot pa ti pran okenn konsiderasyon pour son leker blese e zot pa ti vwar li neseser pour tret li avek douser. * Alor si en dimoun ki ou kontan i dan lapenn, esey montre ou zantiy, konsernen avek li e demontre konpasyon. Esey fortifye lafwa ek kouraz sa dimoun, ed li met son konfyans dan Bondye e krwar dan son gran labonte, konpasyon ek lazistis. Zob ti pou fer sanmenm pour son bann konpanyon si i ti dan zot plas. (Zob 16:4, 5) Me ki mannyer i ti reazir ler zot ti kontinyen kestyonn son fidelite?

Pov Zob, i ti deza byen dezespere kan sa gran deba ti konmanse. Depi konmansman, i ti admet ki i ti pe “koz an bonnavini” e “parey en zonm dezespere.” (Zob 6:3, 26) Nou kapab konpran akoz. Son parol ti reflekte ki kantite i ti pe soufer dan son leker. I ti osi montre ki i pa ti pe konpran tou sa ki ti pe pase avek li. Vi ki sa bann maler ti tap li ek son fanmir en sel kou e i pa ti paret bann keksoz normal, Zob ti mazinen ki Zeova ki ti’n fer tousala arive. I annan serten keksoz enportan ki Zob pa ti okouran ki fer ki i ti baz son rezonnman lo bann fo krwayans.

Toudmenm, Zob ti en zonm ki ti annan en lafwa for e profon. Son lafwa ti aparan dan sa ki i ti dir dan sa gran deba. I ti dir bann zoli parol ki vre e ankourazan pour nou ozordi. Ler i ti koz lo bann mervey dan kreasyon, i ti glorifye Bondye dan bann fason ki okenn imen pa’n deza fer san led Bondye. Par egzanp, i ti dir ki Zeova i ‘fer later sispann dan vid,’ sa ti ganny dir plizyer syek avan ki lasyans ti dekouver sa. * (Zob 26:7) Kan Zob ti koz lo son lespwar pour lavenir, i ti eksprim menm konfyans ki lezot zonm ki ti annan bokou lafwa ti eksprimen. I ti krwar ki menm si i mor, Bondye ti pou rapel li, mank li e avek letan, i ti pou redonn li lavi.​—Zob 14:13-15; Ebre 11:17-19, 35.

Me eski en dimoun i vreman kapab reste fidel e san defo? Elifaz ek son de zanmi ti ensiste ki i pa fer okenn diferans pour Bondye si en dimoun i reste fidel avek li oubyen non. Eski Zob ti fasilman krwar sa move rezonnman? Ditou! Zob ti ensiste ki fidelite i enportan pour Bondye. Avek konfyans, i ti dir sa lo Zeova: ‘Ki i rekonnet mon fidelite.’ (Zob 31:6) Deplis, Zob ti vwar byen menm ki fo rezonnman sa bann dimoun ki ti’n vin rekonfort li ti zis en latak lo son fidelite. I ti pous Zob pour fer son pli gran koze, ki ti finalman fer sa trwa zonm reste trankil.

Zob ti konpran ki son fidelite ti enplik tou sa ki i ti fer dan lavi toulezour. Alor i ti defann lafason ki i ti viv e azir. Par egzanp, i ti evit tou form idolatri, i ti tret lezot dan en bon fason e avek dinyite. I ti reste pir moralman, akord bokou valer avek son lavi maryaz e pli enportan ki tou, i ti reste devoue anver sa sel vre Bondye, Zeova. Alor Zob ti kapab dir avek tou son leker: ‘Ziska mon lanmor, mon pou reste san defo e fidel avek Bondye.’​—Zob 27:5; 31:1, 2, 9-11, 16-18, 26-28.

Eski ou vwar fidelite enportan parey Zob? Zob ti byen konpran ki i pa sifi zis pour dir nou fidel, me nou bezwen prouv li par nou aksyon. Nou montre nou devoue antyerman avek Bondye par obei li e fer sa ki byen dan son lizye toulezour, menm ler nou rankontre difikilte. Si nou viv koumsa, sirman nou pou fer Zeova kontan e fer ankoler son lennmi Satan, zis parey Zob ti fer. Napa pli bon fason pour nou imit lafwa Zob!

Par kont, zistwar Zob pa fini la. Telman i ti pe sey defann son prop ladrwatir, i ti perdi son balans e oubliye defann son Bondye. I ti bezwen ganny korize e ganny led spirityel. I ti ankor dan en profon soufrans ek lapenn e i ti vreman vreman bezwen ganny rekonforte. Ki Zeova ti pou fer pour sa zonm fidel ki annan bokou lafwa? En lot lartik dan sa seri pou reponn sa kestyon.