Lekel oubyen kwa “Alfa ek Omega”?
Sa ki Labib i dir
Sa term “Alfa ek Omega” i refer avek Zeova, Bondye Tou Pwisan. Sa term i ganny servi trwa fwa dan Labib.—Revelasyon 1:8; 21:6; 22:13. a
Akoz Bondye i apel son lekor “Alfa ek Omega”?
Alfa ek omega i non sa premye ek dernyen let dan alfabet Grek, sa langaz ki ti ganny servi pour ekri sa parti Labib ki souvandfwa ganny apele Nouvo Testaman, ki enkli liv Revelasyon. Lefet ki premye ek dernyen let dan alfabet Grek in ganny servi, sa i montre ki zis Zeova ki konmansman ek finisyon. (Revelasyon 21:6) I’n toultan egziste dan lepase konman Bondye Tou Pwisan e i pou kontinyen egziste konman Bondye Tou Pwisan pour touzour. Zis li tousel ki’n egziste “depi touzour e pour touzour.”—Psonm 90:2.
Lekel “premye e dernyen”?
Dan Labib, sa term i aplik pour Zeova nou Bondye e osi pour son Garson Zezi, me i vedir diferan keksoz. Annou vwar de legzanp.
Dan Izai 44:6, Zeova i dir: “Mwan menm premye, mwan menm dernyen. Apard mwan, napa okenn lot Bondye.” Dan sa verse, Zeova i montre ki i sa vre Bondye eternel, ki i napa en lot apard ki li. (Deterononm 4:35, 39) Dan sa ka alor, sa lekspresyon “premye e dernyen” i vedir menm keksoz avek sa term “Alfa ek Omega.”
An plis, dan Revelasyon 1:17, 18 ek 2:8, nou vwar sa term “Premye [pro’tos, pa alfa] e Dernyen [e’skha·tos, pa omega].” Dan sa bann verse, nou vwar ki sa enn ki pe ganny koz lo la ti mor e pli tar reganny lavi. Alor, i pa kapab ki sa bann verse pe koz lo Bondye parski Bondye pa’n zanmen mor. (Abakouk 1:12) Par kont, Zezi ti mor e ganny resisite. (Akt 3:13-15) I ti sa premye imen pour ganny resisite e ganny lavi imortel dan lesyel, kot aprezan i pe viv “pour touzour e touzour.” (Revelasyon 1:18; Kolosyen 1:18) Zezi i sa enn ki resisit tou bann dimoun apre sa. (Zan 6:40, 44) Alor, i sa dernyen ki ti ganny resisite direkteman par Zeova. (Akt 10:40) Dan sa ka, Zezi i kapab ganny apele “Premye e Dernyen.”
Eski Revelasyon 22:13 i prouve ki Zezi i “Alfa ek Omega”?
Non. Labib pa dir egzakteman lekel ki pe koze dan Revelasyon 22:13. An plis, i annan plizyer personnaz ki koze dan sa sapit. Profeser William Barclay i koz lo sa seksyon dan Revelasyon. I ekri: “Bann keksoz pa ganny ekrir dan okenn lord . . . e souvandfwa i vreman difisil pour asire lekel ki pe koze.” (The Revelation of John, Volim 2, Edisyon Revize, paz 223) Alor, sa “Alfa ek Omega” ki ganny mansyonnen dan Revelasyon 22:13 i kapab ganny idantifye konman sa menm Personnaz ki ganny donnen sa tit dan lezot verse dan Revelasyon, setadir, Zeova nou Bondye.
a Dan King James Version sa term i ganny servi en katriyenm fwa dan Revelasyon 1:11. Me laplipar tradiksyon Labib modern pa met sa term dan sa verse parski i pa ganny trouve dan bann pli vye kopi Labib an Grek. I paret ki sa term ti ganny azoute dan bann kopi Labib ki ti ganny fer pli tar.
Ou pou kapab kontan sa osi
ESSENTIAL BIBLE TEACHINGS
Eski Bondye i annan en non?
Bondye i annan bokou tit, enkli Tou Pwisan, Kreater ek Senyer. Me non Bondye i ganny servi plis ki 7000 fwa dan Labib.
LO LABIB
Seye nou letid Labib
Konmans en letid Labib enteraktif ki gratwit avek en ansenyan zis pour ou.