Sa don pour “koz dan lezot langaz” i sa abilite ki bann premye Kretyen ti gannyen atraver en mirak ki ti fer zot kapab koz en langaz san ki zot ti bezwen aprann li. (Akt 10:46, New International Version) Zot ti koz sa langaz telman byen ki bann dimoun ki koz sa menm langaz ti fasilman konpran sa ki ti pe ganny dir. (Akt 2:4-8) Sa don pour koz diferan langaz ti enn parmi bann don lespri sen ki Bondye ti donn bann Kretyen dan premye syek.​—Ebre 2:4; 1 Korentyen 12:4, 30.

•  Kote e kan don pour koz diferan langaz ti konmanse?

•  Pour ki rezon zot ti koz dan diferan langaz?

•  Eski sa don pour koz dan diferan langaz ti pou toultan egziste?

•  Kan ki dimoun ti aret koz dan diferan langaz?

•  Ki nou pou dir lo sa don pour koz dan diferan langaz ozordi?

•  Ki mannyer nou kapab idantifye bann vre Kretyen?

 Sa mirak pour koz dan diferan langaz ti konmans en zour bomaten Zerizalenm, ler bann Zwif ti pe selebre Lafet Lapannkot lannen 33. Sa zour bomaten apepre 120 disip Zezi ti’n zwenn ansanm ler en sel kou “zot tou zot ti ranpli avek lespri sen e konmans koz dan diferan langaz.” (Akt 1:15; 2:1-4) En gran lafoul dimoun “sorti dan tou pei dan lemonn” ti rasanble e “bann disip ti pe koz langaz sa bann dimoun.”​—Akt 2:5, 6.

1.   Pour montre ki sa bann Kretyen ti annan sipor Bondye. Dan lepase Bondye ti fer bann mirak pour montre ki i ti pe siport bann dimoun fidel tel parey Moiz. (Egzod 4:1-9, 29-31; Nonm 17:10) Sa don pour koz dan diferan langaz ti ganny servi pour menm rezon, i ti pou montre ki Bondye ti pe siport sa kongregasyon Kretyen ki ti’n fek ganny formen. Zapot Pol ti ekrir: “Abilite pour koz dan lezot langaz i pa en siny pour bann ki krwar dan Bondye me plito pour bann ki pa krwar dan Bondye.”​—1 Korentyen 14:22.

2.   Pour bann Kretyen rann en bon temwannyaz. Bann ki ti tann bann disip Zezi pe koze sa zour, ti dir: “Nou tann zot pe koz dan nou langaz bann keksoz merveye ki Bondye in fer.” (Akt 2:11) Alor, en lot rezon ki sa mirak ti ganny fer, ti pour permet bann Kretyen “rann en bon temwannyaz” e pour fer ‘dimoun dan tou nasyon vin disip Zezi,’ parey Zezi ti donn zot lord fer. (Akt 10:42; Matye 28:19) Apepre 3,000 dimoun ki ti vwar sa mirak e aksepte sa temwannyaz ti vin bann disip sa menm zour.​—Akt 2:41.

 Non. Don lespri sen pour koz dan diferan langaz ti pou en keksoz tanporer. Labib ti predir: “Me abilite pour profetize, pour koz diferan langaz oubyen pour ganny konnesans, pou fini en zour.”​—1 Korentyen 13:8.

 Bann don lespri sen ti ganny donnen avek lezot Kretyen dan prezans bann zapot. Normalman bann zapot ti fer sa par poz zot lanmen lo latet bann disip. (Akt 8:18; 10:44-46) I paret ki bann ki ti ganny bann don lespri sen avek bann zapot pa ti pas sa bann don avek lezot. (Akt 8:5-7, 14-17) Annou pran en legzanp, en zofisye gouvernman i kapab donn en dimoun laysenns pour dray, me sa dimoun napa sa lotorite pour donn lezot dimoun laysenns. I paret ki sa don pour koz diferan langaz ti arete ler bann zapot ek bann ki ti ganny sa don avek zot ti mor.

 Sa don pour koz dan diferan langaz ti aparaman arete apepre lafen premye syek apre Kris. Napa personn ozordi ki kapab dir ki pwisans Bondye ki pe fer zot koz dan diferan langaz. a

 Zezi ti dir ki lanmour ki pou montre lekel son bann vre disip. (Zan 13:34, 35) Pareyman, zapot Pol ti montre ki lanmour ki ti pou idantifye bann vre Kretyen. (1 Korentyen 13:1, 8) I ti montre ki lespri sen Bondye pour fer bann Kretyen devlop bann laspe “fri lespri sen”e sa premye laspe i lanmour.​—Galat 5:22, 23.