Wi! Labib i sorti kot “Bondye ki rekonfort bann ki dekouraze.” (2 Korentyen 7:6) Menm si Labib pa en liv ki koz lo depresyon oubyen bann maladi mantal, i’n ed plizyer dimoun ki ti anvi mor. Son bann konsey i kapab ed ou osi.

•  Ki konsey Labib i donnen?

•  Eski Labib i koz lo dimoun ki ti anvi mor?

•  Ki verse Labib ki kapab ed ou retir lide swiside dan ou lespri?

•  Be si en zanmi i dir, “Mon anvi mor”?

•  Me si mon’n deza esey komet swisid dan lepase?

• ● Eksprim ou santiman.

   Sa ki Labib i dir: “En zanmi i fidel dan tou sirkonstans; en frer i la pour partaz son difikilte.” Proverb 17:17.

   Sinifikasyon: Nou bezwen led lezot ler nou annan bann panse negatif.

   Si ou gard anndan ou santiman, ou pou vwar ou pe anmenn en fardo ki difisil pour siporte. Me si ou koz avek en lot dimoun, ou pou santi ou pli leze e menm vwar keksoz dan en lot fason.

   Esey sa: Koz avek en dimoun ozordi, petet en manm fanmir oubyen en zanmi ki ou annan konfyans ladan. a Ou kapab osi met ou santiman an ekri.

• ● Rod led en dokter

   Sa ki Labib i dir: “Dimoun an bonn sante pa bezwen dokter, me bann ki malad ki bezwen dokter.”​—Matye 9:12.

   Sinifikasyon: Nou bezwen rod led en profesyonnel lasante ler nou malad.

   En dimoun ki pe mazin swiside i kapab pe demontre sentonm en maladi mantal oubyen emosyonnel. Zis parey avek en maladi fizik, en dimoun ki malad emosyonnelman pa devret onte. I annan tretman pour bann maladi mantal e fizik.

   Esey sa: Rod led en dokter o pli vit posib.

• ● Rapel ki Bondye i enterese avek ou.

   Sa ki Labib i dir: “Eski pa senk sren i vann pour de pti sou? Pourtan, napa ni enn parmi zot ki Bondye i oubliye. . . . Pa bezwen per, zot annan bokou plis valer ki en kantite sren.”​—Lik 12:6, 7.

   Sinifikasyon: Ou presye pour Bondye.

   Ou kapab santi ou tousel me Bondye i vwar sa ki ou pe pas ladan. I enterese avek ou, menm si ou nepli anvi viv. Psonm 51:17 (NWT) i dir: “En lespri fatige i bann sakrifis ki fer plezir Bondye. O Bondye, ou pa pou mepriz en leker kase e brize.” Bondye i anvi ou viv akoz i kontan ou.

   Esey sa: Egzamin bann levidans dan Labib ki Bondye i kontan ou. Par egzanp, vwar sapit 24 dan liv Apros avek Bondye, en liv ki ganny servi pour etidye Labib.

• ● Koz avek Bondye dan lapriyer.

   Sa ki Labib i dir: “Larg tou zot traka lo li parski i enterese avek zot.”​—1 Pyer 5:7.

   Sinifikasyon: Bondye i envit ou pour dir li tou sa ki lo ou leker.

   Bondye i kapab donn ou lape lespri ek lafors pour kontinyen andir ou soufrans. (Filipyen 4:6, 7, 13) I dan sa fason ki Bondye i ed bann ki rod li avek en leker senser.​—Psonm 55:22.

   Esey sa: Koz avek Bondye ozordi. Servi son non setadir Zeova e dir li tou ou santiman. (Psonm 83:18) Demann li lafors pour ou kontinyen viv.

• ● Medit lo lespwar pour lavenir ki Labib i koz lo la.

   Sa ki Labib i dir: “Sa lespwar i parey lank bato dan nou lavi, enn ki sir e ferm.”​—Ebre 6:19.

   Sinifikasyon: Ou lemosyon i kapab sanze en sel kou. Me lespwar ki dan Labib i kapab gard ou stab zis parey en lank i gard bato stab dan en lanmer ki sanze en sel kou.

   Sa lespwar pa zis en rev, me i baze lo promes ki Bondye in fer pour retir tou sa ki fer nou soufer.​—Revelasyon 21:4.

   Esey sa: Aprann plis lo sa lespwar ki dan Labib par lir leson 5 dan sa liv Bon nouvel sorti kot Bondye!

• ● Fer en keksoz ki ou kontan.

   Sa ki Labib i dir: “En leker zwaye i en bon remed.”​—Proverb 17:22.

   Sinifikasyon: Ler nou fer keksoz ki fer nou kontan, sa pou fer nou santi nou pli byen mantalman e emosyonnelman.

   Esey sa: Fer en keksoz ki ou abitye kontan fer. Par egzanp, ekout lanmizik ki egeyan, lir en keksoz ki ankourazan oubyen rod en pastan. Ou pou santi ou pli zwaye si ou fer en keksoz pour ed en lot dimoun, menm si i en pti keksoz.​—Akt 20:35.

• ● Pran swen avek ou lasante fizik.

   Sa ki Labib i dir: “I annan serten byenfe avek legzersis fizik.”​—1 Timote 4:8.

   Sinifikasyon: I bon pour nou lekor ler nou marse, ganny ase sonmey e manz bann keksoz ki bon pour lasante.

   Esey sa: Fer legzersis marse, menm pour 15 minit.

• ● Rapel ki nou santiman ek lezot keksoz dan lavi i sanze.

   Sa ki Labib i dir: “Zot pa konnen ki mannyer zot lavi pou ete demen.”​—Zak 4:14.

   Sinifikasyon: Sa problenm ki pe fatig ou oubyen menm enn ki ou santi i napa en solisyon, i kapab zis en problenm tanporer.

   Menm si ou sityasyon i paret dezespere ozordi, i kapab sanze. Alor rod fason pour fer fas avek. (2 Korentyen 4:8) Ou problenm i kapab sanze avek letan, me si ou komet swisid, ou pa pou la pour vwar konman ou sityasyon in sanze.

   Esey sa: Lir bann zistwar dan Labib kot bann dimoun ti santi zot sitan dekouraze ki zot ti anvi mor. Vwar ki mannyer zot lavi ti sanze avek letan, souvan dan en fason ki zot pa ti pe ekspekte. Annou vwar serten legzanp.

 Wi. Labib i rakont zistwar serten dimoun ki ti anvi mor. Bondye pa ti ankoler avek zot, me o kontrer i ti ed zot. I kapab fer parey pour ou.

Eliya

•  ● Lekel li? Eliya ti en profet vreman brav. Me defwa li osi i ti dekouraze. Zak 5:17 i dir: “Eliya ti en zonm ki ti annan bann santiman parey nou menm.”

•  ● Akoz Eliya ti anvi mor? I ti annan en letan kot Eliya ti santi li tousel e pa vo nanryen. Alor i ti sipliy Zeova: “Pran mon lavi.”​—1 Rwa. 19:4.

•  ● Kwa ki ti ed li? Eliya ti dir avek Bondye tou son santiman. Ki mannyer Bondye ti ankouraz li? Bondye ti montre ki i ti enterese avek li par montre li son lafors. I ti osi rasir Eliya ki i ti ankor bezwen li e donn Eliya en bon asistan ki ti pran byen swen avek li.

•  ▸ Lir zistwar Eliya dan 1 Rwa. 19:2-18

Zob

•  ● Lekel li? Zob ti en zonm ris ki ti kontan son fanmir e i ti ador sa vre Bondye.

•  ● Akoz i ti anvi mor? En sel kou son lavi ti sanze. I ti perdi tou sa ki i ti annan. Tou son zanfan ti mor dan en dezas. I ti ganny en maladi vreman fermal. Finalman, i ti ganny akize konmkwa li menm ki ti’n anmenn sa bann problenm lo li. Zob ti dir: “Mon’n degout mon lavi. Mon nepli anvi viv.”​—Zob 7:16. (NWT)

•  ● Kwa ki ti ed li? Zob ti koz avek Bondye dan lapriyer e avek lezot. (Zob 10:1-3) I ti ganny ankouraze par Eliou, en zanmi ki annan bokou konpasyon ki’n ed li vwar son sityasyon dan sa bon fason. Sa ki ti pli enportan, Zob ti aksepte konsey ek led Bondye.

•  ▸ Lir zistwar Zob dan Zob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moiz

•  ● Lekel li? Moiz ti enn bann dimoun ki ti gid nasyon Izrael dan letan lontan e en profet fidel.

•  ● Akoz i ti anvi mor? Moiz ti annan bokou travay pour fer, souvan i ti pe ganny kritike e i ti santi li epwize. Alor i ti dir avek Bondye: “Plito ou touy mwan.”​—Nonm 11:11, 15.

•  ● Kwa ki ti ed li? Moiz ti dir Bondye ki mannyer i ti santi. Bondye ti ed Moiz diminyen en pe sa bann travay ki i ti annan pour fer e sa ti ede diminyen en pe son stres.

•  ▸ Lir zistwar Moiz dan Nonm 11:4-6, 10-17.