Kisisa Nouvo Zerizalenm?

ZWE

Sa ki Labib i dir

“Nouvo Zerizalenm” i en lekspresyon ki ganny mansyonnen de fwa dan Labib. I en lavil senbolik ki reprezant sa group disip Zezi ki al dan lesyel pour diriz ansanm avek li dan Rwayonm Bondye. (Revelasyon 3:12; 21:2) Labib i montre ki sa group i osi kapab ganny apele nouvel marye Kris.

Bann fason pour idantifye Nouvo Zerizalenm

Nouvo Zerizalenm i dan lesyel. Sak fwa ki Labib i mansyonn Nouvo Zerizalenm, i dir ki sa lavil i sorti dan lesyel kot bann lanz i vey son bann baro. (Revelasyon 3:12; 21:2, 10, 12) Osi, lefet ki sa lavil i sitan gran, sa i montre ki i pa kapab lo later. I en kib ki mezir “12,000 stadya” oubyen “apepre 2,220 kilomet.” a (Revelasyon 21:16, not) Sa i vedir ki son bann bor ti pou preski 560 kilomet oter, ki ti pou al ziska dan lespas.
En group disip Zezi ki osi koni konman nouvel marye Kris i sa Nouvo Zerizalenm. Nouvo Zerizalenm i ganny apele “nouvel marye, madanm sa Pti Mouton.” (Revelasyon 21:9, 10) Dan sa deskripsyon senbolik, sa Pti Mouton i refer avek Zezi Kri. (Zan 1:29; Revelasyon 5:12) “Madanm sa Pti Mouton,” setadir nouvel marye Kris, i reprezant bann Kretyen ki pou ansanm avek Zezi dan lesyel. Labib i konpar sa relasyon ant Zezi ek sa bann Kretyen avek relasyon ant en msye ek en madanm. (2 Korentyen 11:2; Efezyen 5:23-25) Deplis, lo bann ros dan fondasyon Nouvo Zerizalenm i annan “non sa 12 zapot sa Pti Mouton.” (Revelasyon 21:14) Sa detay i ede pour konfirm lidantite Nouvo Zerizalenm parski bann Kretyen ki pou al viv dan lesyel “in ganny batir lo en fondasyon setadir bann zapot ek profet.”—Efezyen 2:20.
Nouvo Zerizalenm i form parti en gouvernman. Zerizalenm dan letan lontan ti kapital Izrael, sa landrwa kot Lerwa David, son garson Salomon ek zot bann desandans ti dirize “lo tronn [Zeova].” (1 Kronik 29:23) Alor, Zerizalenm ki ti ganny apele “lavil sakre” oubyen lavil sen ti reprezant dominasyon Bondye atraver laliny desandans David. (Neemya 11:1) Nouvo Zerizalenm ki osi ganny apele “lavil sen,” i sa bann ki al dan lesyel pour “diriz lo later antye konman lerwa” ansanm avek Zezi.—Revelasyon 5:9, 10; 21:2.
Nouvo Zerizalenm i anmenn bann benediksyon pour bann dimoun lo later. Labib i dir ki Nouvo Zerizalenm pe “desann sorti dan lesyel kot Bondye.” Sa i montre ki Bondye i servi Nouvo Zerizalenm pour fer bann keksoz an deor lesyel. (Revelasyon 21:2) Sa lekspresyon i montre ki Nouvo Zerizalenm i mars ansanm avek Rwayonm Bondye, ki Bondye i servi pour akonpli son lavolonte “lo later parey dan lesyel.” (Matye 6:10) Plan Bondye pour bann dimoun lo later i enkli sa bann benediksyon swivan:
- Pese pou ganny tire. “En larivyer delo lavi” i koule sorti Nouvo Zerizalenm e i donn delo “bann pye dibwa lavi” ki “pour gerizon bann nasyon.” (Revelasyon 22:1, 2) Sa gerizon i vedir ki bann dimoun pou ganny geri fizikman e spirityelman. Sa pou retir pese e permet bann dimoun pour ganny en lavi parfe, parey Bondye ti’n plàn o konmansman.—Romen 8:21.
- Imen pou annan en bon relasyon avek Bondye. Pese in separ bann imen avek Bondye. (Izai 59:2) Ler pese i ganny tire, sa pou permet ki sa profesi swivan i ganny akonplir konpletman: “Latant Bondye i avek bann imen, i pou reste avek zot, zot pou vin son pep e Bondye li menm pou avek zot.”—Revelasyon 21:3.
- I pou nepli annan soufrans ek lanmor. Atraver son Rwayonm, Bondye pou “eswiy tou larm dan zot lizye, i pou nepli annan ni lanmor, ni dey, ni leokri, ni douler ankor.”—Revelasyon 21:4.