Souvan Labib i apel Zezi “Garson Bondye.” (Zan 1:49) Sa lekspresyon “Garson Bondye” i montre ki Bondye i Kreater tou keksoz, i Sours lavi, enkli sa ki pour Zezi. (Psonm 36:9; Revelasyon 4:11) Labib pa dir ki Bondye ti vin en papa parey en imen ki vin paran en zanfan.

 Labib i osi apel bann lanz “bann garson Bondye.” (Zob 1:6) Labib i dir ki sa premye imen, Adan, ti en “garson Bondye.” (Lik 3:38) Par kont, vi ki Zezi ti premye kreasyon Bondye e zis li ki’n ganny kree li tousel, Labib i dekri Zezi konman sa Garson Bondye ki pli enportan.

•  Eski Zezi ti pe viv dan lesyel avan ki i ti ne lo later?

•  Ki Zezi ti pe fer avan ki i vin lo later?

 Wi. Avan ki Zezi ti ne konman en imen lo later, i ti en lanz dan lesyel. Zezi ti dir: “Mon’n desann sorti dan lesyel.”​—Zan 6:38; 8:23.

 Bondye ti kree Zezi avan ki i ti kree tou lezot keksoz. Labib i dir sa lo Zezi:

•   “Li menm . . . premye ne tou kreasyon.”​—Kolosyen 1:15.

•   I “konmansman kreasyon Bondye.”​—Revelasyon 3:14.

 Zezi ti akonpli sa profesi konsernan sa enn ki “son lorizin i remont dan lwen, lontan.”​—Mika 5:2; Matye 2:4-6.

 I ti annan en o pozisyon dan lesyel. Zezi ti refer avek sa pozisyon dan son lapriyer: “Papa, glorifye mwan . . . pour ki mon a reganny sa laglwar ki mon ti annan akote ou avan ki lemonn ti egziste.”​—Zan 17:5.

 I ti ed son Papa kree tou keksoz. I ti travay akote Bondye “konman en zouvriye abil.” (Proverb 8:30) Labib i dir sa lo Zezi: “Atraver li tou lezot keksoz dan lesyel e lo later in ganny kree.”​—Kolosyen 1:16.

 Bondye ti kree tou lezot keksoz atraver Zezi, sa i enkli bann lanz ek liniver. (Revelasyon 5:11) Sa travay ki Bondye ek Zezi ti fer i kapab ganny konpare avek en arsitek ki travay avek en konstrikter. Sa arsitek i fer en plan e sa konstrikter i servi sa plan pour li fer en batiman.

 I ti “Parol.” Labib i apel Zezi, “Parol” ler i koz lo son lavi dan lesyel avan i ti vin lo later. (Zan 1:1) Sa i montre ki Bondye ti servi son Garson pour transmet lenformasyon ek bann lenstriksyon avek bann lezot lanz.

 Zezi ti osi Portparol Bondye avek bann imen ki lo later. I posib ki Bondye ti servi Zezi konman son portparol pour koz avek Adan ek Ev dan Zarden Edenn. (Zenez 2:16, 17) I osi kapab ki Zezi ti sa lanz ki ti gid bann Izraelit dan letan lontan e sa lavwa ki zot ti bezwen ekoute e obei dan dezer.​—Egzod 23:20-23. a