“Ler mon ti annan 15 an, bann lareg mon paran ti fer sans, me la ki mon annan 19 an, mon santi ki mon devret annan plis laliberte.”​—Sylvia.

Eski ou santi parey Sylvia? Si wi, sa lartik pou ed ou diskit lo sa problenm avek ou paran.

•  Ki ou devret konnen?

•  Ki ou kapab fer?

•  Ki lezot zenn i dir?

Avan ou koz avek ou paran lo zot bann lareg, reflesi lo la:

• Dan lavi, si i ti napa lareg, i ti pou annan en kantite problenm. Imazin en highway avek en kantite transpor. Ki ou panse ti pou arive si i ti napa okenn lansenny, lalimyer trafik ek limit vites? Bann lareg kot lakour i parey bann lareg lo semen, zot ede pour ki tou keksoz i mars annord.

• Lareg i laprev ki ou paran i enterese avek ou. Si zot pa ti fer okenn lareg, sa ti pou montre ki zot pa enterese avek sa ki arive avek ou. Ki kalite paran zot ti pou ete?

ESKI OU TI KONNEN? Bann paran osi i bezwen obei bann lareg! Si ou pa oule krwar, lir Zenez 2:24; Deterononm 6:6, 7; Efezyen 6:4 ek 1 Timote 5:8.

Me ki ou pou fer si kantmenm sa ou santi ki lareg ou paran i enzis?

Avan ki ou koz lo la, reflesir. Eski ou abitye obei lareg ou paran? Si non, la i pa pou sa bon moman pour demann ou paran pour donn ou plis laliberte. O kontrer, vwar lartik, “Ki mannyer mon paran i kapab annan konfyans dan mwan?”

Si ou abitye obei ou paran, prepar sa ki ou ti a kontan dir zot. Ler ou konnen egzakteman sa ki ou pou dir, sa pou ed ou pour reflesi lo si sa ki ou pe al demande i fer sans oubyen i rezonnab. Apre, demann ou paran pour fer letan e rod en landrwa kot zot tou zot pou santi zot alez e konfortab pour koze. Ler ou koz avek ou paran, rapel sa:

Demontre respe. Labib i dir: “En parol brit i provok lakoler.” (Proverb 15:1) Alor, pa bliye: Si ou argimante avek ou paran oubyen akiz zot konmkwa zot tro strik, sa konversasyon pa pou fini byen.

“Pli mon annan respe pour mon paran, pli zot demontre respe anver mwan. I pli fasil pour nou tonm dakor ler tou dimoun i respekte kanmarad.”​—Bianca, 19.

Ekoute. Labib i dir nou devret “pare pour ekoute” me “pran letan avan koze.” (Zak 1:19) Rapel ki ou pe fer en konversasyon avek ou paran, pa en diskour.

“Amezir nou grandi, nou kapab krwar ki nou konn plis ki nou paran, me sa pa vre ditou. I toultan en bon keksoz pour ekout zot konsey.”​—Devan, 20.

Met ou dan soulye ou paran. Esey vwar keksoz parey ou paran i vwar. Swiv sa konsey Labib ki dir “pa rod zis zot prop lentere, me lentere lezot osi.” Lentere lezot dan sa ka, se lentere ou paran.​—Filipyen 2:4.

“Olye konsider mon paran dan mon tim, mon ti vwar zot konman mon oponan. Me la mon realize ki zot ti pe esey aprann vin bann bon paran zis parey mwan mon ti pe esey aprann vin en adilt responsab. Tou sa ki zot ti fer ti akoz zot ti kontan mwan.”​—Joshua, 21.

Donn sizesyon. Meton, ou paran i dir ou zot pa oule ou dray enn erdtan pour al en rankont. Esey konpran kwa ki vreman trakas zot: Eski i akoz sa landrwa i lwen oubyen akoz sa rankont li menm?

• Si i akoz ou ki pe dray, eski zot ti pou dakor si en lot dimoun ki annan plis leksperyans i vin avek ou?

• Si i akoz sa rankont, ki lasirans ou kapab donn zot konsernan lekel ki pou la e lekel ki pou responsab sa rankont?

Pa bliye demontre respe dan ou fason koze e avek pasyans, ekout sa ki ou paran i annan pour dir ou. Montre ki ou “onor ou papa ek ou manman” par ou fason koze ek latitid. (Efezyen 6:2, 3) Eski zot pou sanz zot pwennvi? Petet wi. Petet non. Me nenport kwa ki arive . . .

Aksepte desizyon ou paran avek respe. Sa i en letap ki vreman enportan me ki souvan ganny oubliye. Si ou pa ganny sa ki ou le e ou konmans argimant avek ou paran, sa pou zis fer keksoz pli difisil laprosenn fwa ki ou pou koz avek zot. Me de lot kote, si ou aksepte zot desizyon avek respe, i posib ki zot pou donn ou en pe plis laliberte.