“Mon vwar serten mon bann kanmarad lekol ki zis asize dan laklas, san okenn liv avek earphone dan zot zorey pe ekout lanmizik, anmezir ki sa ansenyan pe koze. Apre, sa bann etidyan i demann zot lekor akoz zot pa reisi pas zot legzanmen! De lot kote, i annan bann etidyan parey mwan ki esey zot mye. Zot etidye bokou me kantmenm sa zot ganny en move rezilta. Fransman, mon pa konnen akoz sa i arive. I vreman pa gou pour ganny en move rezilta apre ki mon’n fer bokou zefor pour etidye pour en semenn ziska tar dan lannwit.”​—Yolanda.

Eski ou’n deza santi parey Yolanda? Anfet, kan nou ganny bann move rezilta sa i kapab fer nou vreman dekouraze.

Serten zenn ki pa pe reisi pas zot legzanmen i kapab aret esey amelyor zot rezilta. Lezot i kapab menm kit lekol. Menm si tou le de sityasyon i paret en pli bon solisyon, i annan lezot fason pour rezourd sa problenm. Annou vwar sis pwen ki pou ed ou ganny en pli bon rezilta.

•  Sa ki ou kapab fer

•  Ki lezot zenn i dir?

• Asiste tou ou laklas. I enportan pour asiste tou ou laklas akoz si ou manke, sirman ou pa pou ganny en bon rezilta.

  “Dan mon lekol, bann etidyan ki pa ti enterese avek leson ti sanmenm sa bann ki ti sov lekol e sa ti vin en problenm pour zot.”​—Matthew.

  Prensip Labib: “Sa ki en dimoun pe senmen, sanmenm ki i pou rekolte osi.”​—Galat 6:7.

• Aprann kantite ki ou kapab dan sak laklas. Byensir, i byen pour asiste ou bann laklas me i osi byen pour aprann kantite ki ou kapab dan sak laklas. Pran not. Esey konpran ki ou ansenyan pe dir. Si ou ganny permisyon pour koze, demann kestyon.

  “Mon ti demann bokou kestyon dan laklas akoz mon ti remarke ki sa ansenyan i eksplik pli byen sa topik ler i konnen ki en etidyan pa konpran.”​—Olivia.

  Prensip Labib: “Vey byen ki mannyer zot ekoute.”​—Lik 8:18.

• Reziste sa lanvi pour fer trik. Ler nou fer trik, sa i dezonnet. I annan plizyer fason pour fer trik dan lekol. En fason i ler nou kopye lo en lot dimoun. Sa i pa zis dezonnet me i osi anpes ou aprann.

  “Si ou pa konpran en keksoz, pa bezwen kopye lo lezot etidyan. Ler ou kopye, ou pa pe ed ou lekor. Olye aprann rezourd problenm lo ou menm, ou pe aprann depan lo lezot.”​—Jonathan.

  Prensip Labib: “Fer ou travay byen e alor ou pou kapab fyer akoz sa.”​—Galat 6:4, Contemporary English Version.

• Fer ou homework vin en priyorite. Si i posib, fer ou homework avan ou fer lezot aktivite, espesyalman bann divertisman. * Si ou fer sa, ou pou kapab profit pli byen ou letan lib.

  “Mon fer mon homework vin en priyorite e sa i fer en diferans lo mon bann rezilta. Ler mon ariv kot mwan, mon souvan anvi dormi oubyen ekout lanmizik. Me mon eseye fer mon homework avan, apre mon rilaks.”​—Calvin.

  Prensip Labib: “Verifye sa ki pli enportan.”​—Filipyen 1:10.

• Demann led. Pa bezwen kanmi pour aksepte led avek lezot. Apros ou paran e demann zot konsey. Demann ou ansenyan led pour ou ganny en pli bon rezilta. Dan serten ka, ou kapab pran leson avek en ansenyan oubyen en etidyan ki spesyalize dan sa size.

  “Al direk kot ou ansenyan. Demann li led pour ou konpran sa size e amelyor ou rezilta. Sa ansenyan pou kontan pour ed ou akoz i vwar ki ou determinen pour amelyore.”​—David.

  Prensip Labib: “En proze . . . i reisi kan i annan bokou konseye”​—Proverb 15:22.

• Servi tou loportinite ki ou gannyen. Dan serten pei, bann tes i annan kestyon an plis ki kapab ed ou ganny en pli bon rezilta. Ou osi kapab demande pour fer lezot proze ki pour amelyor ou rezilta. Si ou pa pas ou tes, ou kapab demande pour refer li.

  “Si mon anvi amelyor mon pwen dan leson, mon bezwen pran aksyon. Mon demann mon ansenyan si i annan okenn proze pour fer oubyen si mon kapab refer sa leson pour ganny en pli bon rezilta.”​—Mackenzie.

  Prensip Labib: “Tou travay i merit en lapey.”​—Proverb 14:23.