Temwen Zeova i fer zot mye pour aplik lansennyman Zezi parey bann zapot ti fer. Sa lartik i en rezimen bann diferan krwayans de baz Temwen Zeova.

1.   Bondye. Nou ador sa sel vre Bondye Tou pwisan ki Kreater tou keksoz. Son non i Zeova. (Psonm 83:18; Revelasyon 4:11) I Bondye Abraam, Moiz ek Zezi.​—Egzod 3:6; 32:11; Zan 20:17.

2.   Labib. Nou konsider Labib konman mesaz ki sorti kot Bondye pour bann imen. (Zan 17:17; 2 Timote 3:16) Nou krwayans i baze lo sa 66 liv Labib ki enkli “Ansyen Testaman” ek “Nouvo Testaman.” Jason BeDuhn, en profeser larelizyon ti ekri ki Temwen Zeova in etabli zot krwayans ek pratik selman par servi sa ki Labib i dir san deside davans ki zot pou krwar. a

    Menm si nou aksepte tou sa ki Labib i dir, toudmenm nou pa ekstremis. Nou rekonnet ki serten parti Labib in ganny ekrir dan en fason senbolik e nou pa devret esey konpran zot dan en fason literal.​—Revelasyon 1:1.

3.   Zezi. Nou swiv legzanp ek lansennyman Zezi Kri. Nou konsider li konman nou Sover ek Garson Bondye. (Matye 20:28; Akt 5:31) Alor, nou bann Kretyen. (Akt 11:26) Par kont, nou’n aprann dan Labib ki Zezi pa Bondye Tou Pwisan e napa okenn par dan Labib ki koz lo Trinite.​—Zan 14:28.

4.   Rwayonm Bondye. I pa en santiman dan leker bann Kretyen me i en vre gouvernman dan lesyel. Rwayonm Bondye pou ranplas bann gouvernman imen e i pou akonpli plan Bondye pour later. (Danyel 2:44; Matye 6:9, 10) Byento, Rwayonm Bondye pou fer sa akoz bann profesi Labib i montre ki nou pe viv dan “bann dernyen zour.”​—2 Timote 3:1-5; Matye 24:3-14.

    Zezi i Lerwa dan Rwayonm Bondye ki dan lesyel. I ti konmans dirize an 1914.​—Revelasyon 11:15.

5.   Delivrans. I posib pour ganny sove dan pese ek lanmor gras a sakrifis Zezi Kri. (Matye 20:28; Akt 4:12) Pour benefisye avek sa sakrifis, i pa ase zis pour demontre lafwa dan Zezi. Dimoun i bezwen sanz zot fason viv e batize. (Matye 28:19, 20; Zan 3:16; Akt 3:19, 20) En dimoun i prouve ki i annan lafwa atraver son aksyon. (Zak 2:24, 26) Sa pa vedir ki nou merit ganny sove akoz sa ki nou’n fer, me se gras a “labonte ekstraordiner Bondye” ki nou ganny sove.​—Galat 2:16, 21.

6.   Lesyel. Zeova, Zezi Kri ek bann lanz fidel i reste dan lesyel. b (Psonm 103:19-21; Akt 7:55) I annan en pti group dimoun, setadir 144,000 ki pou ganny resisite pour al viv dan lesyel. Zot pou vin lerwa ansanm avek Zezi dan Rwayonm Bondye.​—Danyel 7:27; 2 Timote 2:12; Revelasyon 5:9, 10; 14:1, 3.

7.   Later. Bondye ti kree later pour bann imen viv lo la pour touzour. (Psonm 104:5; 115:16; Eklezyast 1:4) Bondye pou beni bann dimoun obeisan par donn zot en lasante parfe e lavi eternel dan Paradi lo later.​—Psonm 37:11, 34.

8.   Soufrans ek lemal. Sa ti konmanse ler enn parmi bann lanz Bondye ti rebele. (Zan 8:44) Alor, sa lanz ti ganny apele “Satan” oubyen “Dyab.” I ti persyad sa premye koup imen pour dezobei Bondye. Akoz sa, zot desandans in sibir bann move konsekans. (Zenez 3:1-6; Romen 5:12) Pour reponn sa bann kestyon moral ki Satan ti souleve dan zarden Edenn, Bondye in permet lemal ek soufrans, me i pa pou les sa kontinyen pour touzour.

9.   Lanmor. Dimoun ki mor i aret egziste. (Psonm 146:4; Eklezyast 9:5, 10) Zot pa soufer dan en lanfer dife.

    Bondye pou resisit plizyer dimoun ki’n mor. (Akt 24:15) Par kont, bann ki refize swiv bann standar Bondye apre ki zot in resisite pou ganny detri pour touzour, san okenn lespwar rezireksyon.​—Revelasyon 20:14, 15.

10.   Fanmir. Nou respekte laranzman maryaz ki Bondye in met an plas depi o konmansman, setadir maryaz ant en msye ek en madanm. Sa sel rezon pour divorse i imoralite seksyel. (Matye 19:4-9) Nou asire ki sa lasazes ki dan Labib i kapab ed bann fanmir pour zot ere.​—Efezyen 5:22–6:1.

11.   Nou ladorasyon. Nou pa ador lakrwa ni okenn stati oubyen zidol. (Deterononm 4:15-19; 1 Zan 5:21) La bann keksoz enportan dan nou ladorasyon:

    •   Priy Bondye.​—Filipyen 4:6.

    •   Lir e etidye Labib.​—Psonm 1:1-3.

    •   Reflesi lo sa ki nou aprann dan Labib.​—Psonm 77:12.

    •   Rasanble ansanm pour priye, etidye Labib, sant kantik, koz lo nou lafwa e ankouraz lezot Temwen e bann ki rasanble avek nou.​—Kolosyen 3:16; Ebre 10:23-25.

    •   Pres sa “bon nouvel Rwayonm.”​—Matye 24:14.

    •   Ed bann ki dan bezwen.​—Zak 2:14-17.

    •   Konstri e antretenir bann Lasal Rwayonm ek lezot landrwa ki ganny servi pour ansenny dimoun lo Labib partou dan lemonn.​—Psonm 127:1.

    •   Partisip dan led sekour apre en dezas.​—Akt 11:27-30.

12.   Nou lorganizasyon. I annan bann kongregasyon partou dan lemonn e i annan en group ansyen ki okip sak kongregasyon. Sa bann ansyen i pa bann pret, zot pa sef kongregasyon e zot pa ganny peye pour fer sa. (Matye 10:8; 23:8) Nou pa demann ladim e nou pa zanmen pas laket dan nou bann rasanbleman. (2 Korentyen 9:7) Nou travay i ganny finanse par bann kontribisyon volonter.

     En pti group Kretyen byen eksperyanse ki apel Konsey Direkter ki servi kot nou biro prensipal i donn gidans bann Temwen Zeova partou dan lemonn.​—Matye 24:45.

13.   Nou linite. Dan lemonn antye, nou tou nou annan menm krwayans e sa i fer nou ini. (1 Korentyen 1:10) Nou fer en kantite zefor pour ki napa okenn divizyon parmi nou akoz ran sosyal, etnik oubyen ras. (Akt 10:34, 35; Zak 2:4) Me menm si nou tou nou ini, nou kapab fer nou prop desizyon. Sak Temwen i fer desizyon dapre son konsyans ki’n ganny antrennen par Labib.​—Romen 14:1-4; Ebre 5:14.

14.   Nou kondwit. Nou fer bokou zefor pour demontre lanmour dan tou sa ki nou fer. (Zan 13:34, 35) Nou rezet bann pratik ki Bondye pa kontan e sa i enkli mal servi disan par pran transfizyon disan. (Akt 15:28, 29; Galat 5:19-21) Nou kontan lape e nou pa partisip dan lager. (Matye 5:9; Izai 2:4) Nou respekte gouvernman nou pei e nou obei son bann lalwa tan ki zot pa al kont lalwa Bondye.​—Matye 22:21; Akt 5:29.

15.   Nou relasyon avek lezot. Zezi ti donn sa lord: “Ou devret kontan ou prosen parey ou kontan ou prop lekor.” I ti osi dir ki bann Kretyen “pa form parti lemonn.” (Matye 22:39; Zan 17:16) Alors, nou esey “fer sa ki byen anver tou dimoun,” me nou pa pran okenn kote dan bann zafer politik e nou pa asosye avek lezot larelizyon. (Galat 6:10; 2 Korentyen 6:14) De lot kote, nou respekte swa ki lezot dimoun i fer dan sa bann domenn.​—Romen 14:12.

 Si ou annan lezot kestyon konsernan sa ki Temwen Zeova i krwar, ou kapab ganny plis lenformasyon lo nou sit Enternet ouswa kontakte enn nou bann lofis. Ou kapab osi asiste en renyon kot en Lasal Rwayonm ki pros avek kot ou reste oubyen koz avek en Temwen Zeova dan ou zanmirant.