KHENPI 9
Innkuanbupin Jehovah Bia Un
“Van le lei . . . a bawlpa hong bia ta un.”—Maangmuhna 14:7
Hih laibu na sin khit tak ciang Lai Siangtho lamlahnate in nang le na innkuan lungnopna hong ngahsak thei ahih lam na mu ding hi. Jehovah Pasian in nang hong lungnuamsak nuam hi. Na nuntakna-ah Jahovah Pasian biak ding thupi sak masa lecin ama’n “na kisapna dangte khempeuh uh zong hong piathuah veve ding hi” cih kamciam hi. (Matthai 6:33) Pasian in ama lawm dingin hong deih mahmah hi. Tua ahih manin Pasian tawh lawmta kizopna a khan semsem nading nangh lam pan na hih theih zahin hanciam in. Tua pen thupha i ngahte lak pan a manpha pen hi.—Matthai 22:37, 38.
1 JEHOVAH TAWH NA KIZOPNA KIPSAK IN
LAI SIANGTHO GENNA: “Kei pen note pa hong hi-in, note, keima tate na hi ding uh hi,” ci-in Jehovah in gen hi. (2 Korin 6:18) Pasian in ama lawm hoih hong suaksak nuam hi. Lawm hoih suahtheihna khatin thungetna ahi hi. Tua ahih manin Jehovah in “thu ngen niloh un” ci-in hong hanthawn hi. (1 Thesalonika 5:17) Na lungsim tawnga na ngaihsutna le na lunghimawhnate hong ngaihsak nuam hi. (Filippi 4:6) Na innkuanpihte tawh thu na nget khop ciang Pasian pen nang ading a nungta takpi ahih lam na innkuanpihte in mu ding uh hi.
Pasian kiang na lungsim sunga omte na gen pen hoih hi. Ahih hang Pasian hong gente zong na ngaih ding kisam hi. Lai Siangtho le Lai Siangtho bulphuh laibute na sinna pan Pasian thugen ngai thei hi teh. (Late 1:1, 2) Na sinsa thute ngaihsunkik in. (Late 77:11, 12) Pasian thu na ngaih theih nading manmana na kikhop ding zong kisam hi.—Late 122:1-4.
Jehovah tawh kinaih theih nading nam khat in ama thu midangte kiang genna ahi hi. Midangte kiang Jehovah thu na gen semsem leh amah tawh na kinai semsem ding hi.—Matthai 28:19, 20.
NA SEP THEIH DING:
-
Nisimin Lai Siangtho sim nading le thunget nading hun pia in
-
Pawi bawlna le tawlngaknate sangin kha thu lamah innkuan bupin sem masa zaw un
2 INNKUAN KIKHOPNA-AH NUAMSA IN
LAI SIANGTHO GENNA: “Pasian kiang nai un. Amah in zong hong nai ding hi.” (James 4:8) Innkuan kikhopna pen manmana na bawl theih nading hun gel inla na gel bangin zui in. (Piancilna 18:19) Tua khit ciang nisim nuntakna-ah Pasian phawka na nuntak ding kisam hi. Nang le na innkuanpih te’n Pasian tawh na kinaih theih nading ama thu “na innsung uhah na tut uh ciang, lampi-ah na pai uh ciang, na lup ciang uh le na thawh ciangun tua thute na gengen ding uh hi.” (Thu Hilhkikna 6:6, 7) Joshua in: “Kei le ka innkuanpihte in ahihleh TOPA’ na ka sem ding uh hi” a cih mah bangin nangh zong na gen zawh nading ngimna nei in.—Joshua 24:15.
NA SEP THEIH DING:
-
Innkuan kikhopna hun limtakin geel inla manmanin bawlpih in, innkuanpih khat ciat ii kisapnate ngaihsunin kikuppih in
