Innkuan sung kisapnate i panpih theih nading sum i kisam hi. (Paunak 30:8) Tua banah “sum in hong lungmuangsak” thei hi ci-in Lai Siangtho in gen hi. (Thuhilhna 7:12) Na nupa un sumlepai thu kikup ding haksa thei a, ahih zong na innkuan sung sum in hong buaisak kei hen. (Efesa 4:32) Na nupa un sumlepai zat dan ding na khensat uh ciang khat le khat kimuang unla kikum khawm un.

LAI SIANGTHO GENNA: “Mi khatpeuh in inn lianpi khat lamding a sawm le, ka zozo ding hiam cih a theih nadingin a bei dingzah tuat masa hi.” (Luka 14:28) Sumlepai bangci zat ding cih na geel khop ding uh thupi hi. (Amos 3:3) Bang teng lei ding kisam a, tua ading sum bangzah zang ding cih khensat in. (Paunak 31:16) Sum neitah ci a, na deih khempeuh lei ding cihna hi lo hi. Sum ba kei in. Na sum neihte bek zang in.—Paunak 21:5; 22:7.

NA SEP THEIH DING:

• Kha bei ciang sum a val lai leh tua sum bangcih ding cih khensat khawm un

• Sum luut sang sum bei a tamzawk leh sum zatna bangci khiam ding cih hoih takin kikum un. Gentehna an sai-ah lei a, na nek uh sang inn-ah huan un

LAI SIANGTHO GENNA: “A tawntungin na a manin sepnopna lungsim nei” un. (Hebru 13:18) Nangh sum bangzah ngah a, bangzah zang cih na innkuanpih tung thu mantakin gen in.

Sumlepai tawh kisai a thupi khensatna na bawl ma-in na innkuanpih tawh kikum den in. (Paunak 15:22) Sumlepai thu hoihtaka kikupna in na innkuanpih tawh kilemna hong ngah sak ding hi. Na sum ngahte pen kei sum hi ci loin innkuan sum hi ci-in ngaihsun in.—1 Timoti 5:8.

NA SEP THEIH DING:

• Kikup kul lo a, zat theih ding sum phazah pen na innkuanpih tawh thukimin ciangtan in

• Buaina hong pian ma pekin sumlepai vai kikum khol un