A lungnuam innkuan le nupa suah nading na hih theih zah in na hanciam laitak upmawh lohpi-in tuahsiatna na tuak khak leh na lungnopna uh hong bei kha thei ding hi. (Thuhilhna 9:11) Haksatnate i thuak ciang hong huh theih ding a kisam huhnate Pasian in hong vaihawm sak hi. Hih lai-a a kilak Lai Siangtho thuhilhnate nazuih uh leh nang le na innkuanpihte in a siapen hunte zong na nawkzo ding uh hi.

LAI SIANGTHO GENNA: “Pasian in note hong kem ahih manin na lungkhamnate khempeuh uh ama kiang tunpih un.” (1 Peter 5:7) Haksatna na thuakte pen Pasian hang hilo hi cih phawk tawntung in. (James 1:13) Pasian tawh kinaina nei lecin ama’n nang a hoih thei penin huhna hong pia ding hi. (Isaiah 41:10) “Na lungkhamna teng uh ama tungah gen un.”—Late 62:8.

Nisim in Lai Siangtho sima na kan leh hehnepna na ngah ding hi. Tua na simna pan Jehovah in “haksatna a nam tuamtuam a thuakte” bangci hehnem hiam cih na thei ding hi. (2 Korin 1:3, 4; Rom 15:4) “Mihingte in a theihtel zawh loh Pasian’ hong piak lungsim nopna” hong pia ding hi ci-in zong kamciam hi.—Filippi 4:6, 7, 13.

NA SEP THEIH DING:

• Lungkhamna a kiam nading le hoihtaka thu ngaihsut theih nading Jehovah’ kiang thu ngen in

• Na sepnop khempeuh sitkik inla a hoih pena na sep theih ding thute teel in

LAI SIANGTHO GENNA: “Thungaihsun theite in a pilna uh behlap a, pilna a ngah nadingun mipilte in a bil uh tawh limtakin ngai uh hi.” (Paunak 18:15) Thupiang teng kaikhawm in. Na innkuanpih khat ciat ii kisapnate na theih nading hanciam in. Amau tawh kiho in. Amau gen thute zong na ngaihsak in.—Paunak 20:5.

I it i ngaih khatin hong nusia leh e? Na lungsim sunga dahnate na pulaak ding maizum kei in. Jesuh nangawn “kap” in khitui luang hi cih na phawk in. (Johan 11:35; Thuhilhna 3:4) Hoihtaka tawlnga a, ihmut cim ding zong thupi hi. (Thuhilhna 4:6) Tua bang danin sem leng i dahnate hong thuakzo sak ding hi.

NA SEP THEIH DING:

• Tuahsiatnate na tuak ma-in na innkuanpihte tawh manmana kihopihna le kizopna nei den in. Tua hileh thusia lasia a tun’ ciang nangh kiang thu hong gen ngam ding uh hi

• Nang mah bangin a thuak midangte tawh kiho in

LAI SIANGTHO GENNA: “Lawm citak in a tawntungin hong it a, i sanggamte pen i lungkhamna a hong thuakpih dingin a piang ahi hi.” (Paunak 17:17) Na lawm te’n hong huh nuam hi. Ahih hang koi bangin hong huh ding cih a thei lo zong hi kha thei ding uh hi. Tua ahih teh na kisap takpi bang hiam cih na gen ding maizum kei in. (Paunak 12:25) Tua banah Lai Siangtho hoihtaka a theite kiang pan kha lama na kisap huhna na ngen in. Lai Siangtho tungtawna hong piak lamlahnate in nang hong huh thei ding hi.—James 5:14.

Pasian a muangtakpite le a kamciam a um takpite tawh manmana na kikholhna pan na kisap huhnate na ngah ding hi. Thapiak ding a kisam mite huh a, tha na piak ciang nangh zong hehnepna le tha na ngah kik ding hi. Jehovah le ama kamciamte na upna thu midangte kiang na gen in. Huhna a kisam mite huhna-ah na buai den inla nang hong it le hong donte tawh kikhawlin nang bek na tuam om kei in.—Paunak 18:1; 1 Korin 15:58.

NA SEP THEIH DING:

• Na lawm it pen tawh kiho inla hong huhnate na sang in

• Na kisapnate thuman takin le kician takin gen in