Lai Siangtho na theihna a khantoh nading thu zongin na kankhia nuam lai hiam? Lai Siangtho mun khat ahih kei leh Lai Siangtho sunga mikhat ii thu, mun khat ii thu le vankhat ii thute na thei nuam hiam? Ahih kei leh na thuak haksatnate Pasian Kammal in hong huh theihna na thei nuam naa? Tua ahih leh Biakinn-a laibu saal zang thei hi teh.

Thu kan nading a kimang thei laibute le vante om hi. Nang’ kam pau tawh a kithoh khia Jehovah Tecite ii Lai Siangtho a kibulphuh laibu a vek in nei lo ding hi teh. Biakinn-a laibu saal-ah a kithoh zawh a sawt nai lo laibu laidalte a kim phialin om hi. Tua takah Lai Siangtho letkhiat nam tuamtuam, dictionary bu hoihte le a kimang thei etkaakna laibute zong om thei hi. Kikhop a kipat ma le a mankhit ciang laibu saal pen lungnuam takin zang thei hi teh. Biakinn-ah computer a kithuah leh Vilnatausang Library kithun thei hi. Vilnatausang Library cih pen kote ii thohkhiat laibu tampi a kithun computer program khat hi a, na zon nop thute, kammalte ahih kei leh Lai Siangtho munte zon’ baih nadingin kibawl hi.

Khristian Nuntakna le Tangko Nasep a sinte adingin kizang thei hi. Na ngah tavuante na kithawi ciang Biakinn a, laibu saal pen hoih takin zang thei hi teh. Laibu saal a vaan ding pen Nuntakna le Tangko Nasep makaipipa hi. Laibu saal-ah a nunung pena a kithoh laibuthakte a om nading le ahih sitset na’ng a ma’n en in tavuan la hi. Amah ahih kei leh Lai Siangtho hong sinpih te’n na kisap thu le late koi ci zong ding cih hong lak thei hi. Ahih hang laibute Biakinn sung pan a pualamah kitawi thei lo hi. Laibute dawmin laibu sungah ciaptehnate ka bawl kei uh hi.

“Pasian na theitel” nading “a ki seel sum manpha zon bangin” thukan nopna lungsim i neih ding kisam hi ci-in Lai Siangtho in gen hi. (Paunak 2:1-5) Nangh thukan na kipat theih nading Biakinn laibu saal in hong huh thei hi.

• Biakinn laibu saal-ah thu kantel theih nading bang vante om hiam?

• Laibu saal hoih taka nazat siam na’ng kua’n hong huh thei ding hiam?