Mi a tamzaw in Jehovah Tecite cih pen biakna thak khat ii min hi ci-in ngaihsun uh hi. Ahih hangin tuma kum 2,700 lai-in, a man Pasian ii nasemte pen Pasian in keima “teci” ci-in na pulak hi. (Isaiah 43:10-12) Kum 1931 dong, Lai Siangtho Sangnaupangte ci-in ka thei uh hi. Ba’hang in Jehovah Tecite cih min luah ka hi uh hiam?

Tua min in i Pasian hong theisak hi. Tanglai-a khutgelh Lai Siangthote’ sungah Pasian min Jehovah pen mun tampi-ah na om hi. Laitei a tamzaw in tua min pen Topa ahih kei leh Pasian ci-in na khek uh hi. Ahi zongin a man Pasian in ama min Jehovah hi cih Moses kiangah pulakin: “Hih pen keima min hi tawntung” hi ci hi. (Paikhiatna 3:15) Hih bangin, a manlo pasiante khempeuh tawh a kibat lohna na kiciansak hi. Pasian min siangtho pua ka hih manun ka kipaak uh hi.

Tua min in i nasep ding hong thei sak hi. A thuman pasal Abel-a kipan tanglai-a mi tampi in Jehovah a upna uh teci na pang uh hi. Kumzalom hun sung tawntunga mite ahi Noah, Abraham, Sarah, Moses, David-te le midangte zong “hih zahin a tam teci” te lakah na kihel uh hi. (Hebru 11:4–12:1) Mawhna nei lo mi khat thukhenna zumah teci a ki panpih mah bangin Pasian tawh kisai thuman mite’n a theih nading ka khensat uh hi.

Jesuh etteh in hih min ka zang uh hi. Lai Siangtho sungah Jesuh pen “thuman le citakin teci apang” na ci hi. (Maangmuhna 3:14) Jesuh in ‘nangma min ka gen khin’ ci a, Pasian tawh kisai “Thuman a genkhia” hi. (Johan 17:26; 18:37) Tua ahih teh Khrih nunzuite ahih takpi leh Jehovah min luahin le tua min mite’n a theih na’ng a gen ding kul hi. Tua pen Jehovah Teci te’n hanciam takin sem uh hi.

• Lai Siangtho Sangnaupang te’n Jehovah Tecite cih min ba’hang na luah uh hiam?

• Leitungah Jehovah ii tecite a om zawh bangtan sawtta hiam?

• Jehovah ii a thupi pen Teci in kua a hiam?