Kumzalom masa lai-a “Jerusalem khua a om sawltakte le Upa te” a kihel pawlneu khat pen Governing Body-te in na hong sem uh a, Kristian pawlpi khempeuh ading a thupi thu khensat dingte na khensat uh hi. (Sawltak 15:2) Lai Siangtho in bang gen hiam cih a theih nading thu kikum uh a, Pasian kha siangtho lamlahna zui uh ahih manin kithukim taka khensatna neizo uh hi. (Sawltak 15:25) Tu hunin zong tua bang dan mahin sem uh hi.

Pasian in ama deihna a sem dingin na zang hi. Governing Body-a nasem ahi sathau a kinilh unaupate in Lai Siangtho pen thuk takin na lunglut uh a, nasep lam tawh kisai ahih kei leh Lai Siangtho tawh kisai thu dotnate a let uh ciang thu na thei mahmah uh hi. Leitungbupa unaute khempeuh ii kisapnate kikum dingin kalsimin kimukhawm uh hi. Kumzalom masa lai mah bangin Lai Siangtho bulphuh thuhilhnate lai tawh ahih kei leh Khawk makaipite tawh ahi zongin midangte tungtawnin hong puak uh hi. Tua bangin hong bawlsak ahih manin Pasian minamte in kithukim taka ngaihsun in sem khawm uh hi. (Sawltak 16:4, 5) Governing Body in kha-an vaihawmnate na vaan uh hi. Tangko nasepna-ah i manawk ding hong hanthawnin unaupate tavuan a sehna-ah zong na vaan uh hi.

Pasian kha siangtho lamlahna bangin sem uh hi. Governing Body in lamlahnate a ngah nadingin khuavannuai a Uk Sangpenpa Jehovah le Pawlpi lutang ahi Jesuh muangin lamen uh hi. (1 Korin 11:3; Efesa 5:23) Governing Body a, mimal khat ciatin amau le amau Pasian minamte’ Sia in kingaihsun lo uh hi. Amau sathau nilh Khristian dang khempeuh tawh “Tuuno [Jesuh] a paina peuhpeuhah zui uh” hi. (Maangmuhna 14:4) Amaute ading le amau’ nasepnate ading a, thu ka ngetsaknate uh Governing Body in lungdam mahmah uh hi.

• Kumzalom masa Governing Body sungah kua teng kihel hiam?

• Tu huna Governing Body in Pasian lamlahna koi ci zong uh hiam?