Tu hunah mi a tamzaw in biakna lamah painuam nawn lo uh hi. Ba’hang hiam cih leh tua kikhopnate-ah nuntakna tawh kisai a thupi lamlahnate le hehnepnate ngah lo uh ahih man hi. Tua bang a hih leh Jehovah Tecite’ Khristian kikhopna-ah ba’hang in na kikhop ding kul hiam? Tua munah bang teng muthei ding na hiam?

Itna tawh kidimin hehpihna a nei mite tungpan a kingah lungnopna. Kumzalom masa lai-a Khristiante in pawlpi phuanin Pasian biak theih nading, Lai Siangtho sin theih nading le khat le khat kihanthawn dingin kikhawm uh hi. (Hebru 10: 24, 25) Itna tawh a kidim hih kimuh khopna in khalama unaunu unaupate bangin lawmhoihte laka omin kingaihsun uh hi. (2 Thesalonika 1:3; 3 Johan 14) Amau gamtat hoihnate ka etteh uh a, amau mah bangin lungnopna ka ngah uh hi.

Lai Siangtho thubulte bangci zuihding cih sinna pan a kingah phattuamna. Lai Siangtho hun lai mah bangin numei, pasal le naupangte khempeuh kimu khawm uh hi. A picing thuhilhte in Lai Siangtho thuzungte nisim i nuntakna-ah bangci zuihding cih i theih na’ng Lai Siangtho tawh hong huh uh hi. (Thu Hilhkikna 31:12; Nehemiah 8:8) Mipite tawh kikupkhopna le lasak ciang i vekpi-in kihel thei a, upna lahtheihna i ngah ciat hi.—Hebru 10:23.

Pasian tung’ i upna hong thakhauh sak thuphate. Sawltak Paul in ama hun lai-a pawlpi khat kiang hih bangin gen hi: “Note tawh kimuh ding ka ut mahmah hi . . . kei’ upna in note hong thakhauh sakin, note’ upna in zong kei hong thakhauh sakin, phattuamna i ngah tuak theih nading ka deihna ahi hi.” (Rom 1:11,12) Kikhopna-ah upna kibatpihte tawh manman a, kihona panin i upna hong thakhauh sakin Lai Siangtho thuzung banga i nuntaak na’ng i khensatna hong kipsak hi.

A tunga i gen thute pan phattuamna na ngah nadingin Biakinn-ah nong kikhawm thei tam maw? Lawp takin kong muak uh hi. Kikhopna khempeuh a khong hi a, sumpi don’na om lo hi.

• Ko ii pawlpi kikhopin kua etteh ka hi uh hiam?

• Khristian kikhopna pan bang phattuamna ngahthei ding?