Khristian kipat tuunga kikhopnate-ah a diakin lasakna, thungetna, Lai Siangtho sinna le kikupnate nei uh hi. Ngeina te kihel lo hi.(1 Korin 14:26) Kote ii kikhopna zong tua bang mah hi dingin lamen thei hi teh.

Thuhilhnate in Lai Siangtho bulphuhin kinuntakpih thei hi. Kal khat a, sani ahih kei leh nipi ni-in pawlpi khat ciat in i nuntakna-ah Lai Siangtho bangci zuihding cih le tu huna i nuntakna tawh koici kituak hiam cih minute 30 sung a sawt Lai Siangtho Thugenna te a ngai dingin ka kikhawm uh hi. Lai Siangtho munte pen i Lai Siangtho tek pan lema, simkhawm dingin a kuamapeuh hong kihanthawn hi. Tua thugenna a mankhit ciang nai khat sung a sawt “Vilnatausang” Sinna hun khat om lai hi. Tua hunah Vilnatausang thu sinna laibu tawh thu kikuma, mi kuamapeuh kihel thei hi. Tua thu kikupna in Lai Siangtho lamlahnate a taktaka i nuntakpih ding hong huh hi. Leitungbupa om pawlpi 110,000 vala pawlpi khat ciat ii a sin thute kibang hi.

Thuhilh siamna i khantoh theih nading hong huh hi. Kallai nitak kikhopna-ah Khristian Nuntakna le Tangko Nasep cih thulu tawh hun thum a kiseh kikhop ka bawl uh a, thu tuamtuam a kihel khasim ading a kithoh Nuntakna le Tangko Nasep Kisinna Laibu kibulphuh hi. Hun masa pen ahi Pasian Kammal Pan A Manpha Thute cih in Lai Siangtho mun pawlkhatte i telzawk na’ng hong huh a, tua in pawlpi mite ii a simkholhsa thute telzawk na’ng huh hi. A zomah Tangko Nasepna-ah Zang In cih hun bawlna-ah midangte tawh Lai Siangtho koici kikum ding cih limlaka kisinna om hi. Thuhilhpa in laisim dan le thuhilh siamna i khantoh theih nading limtakin hong encik hi. (1 Timoti 4:13) A nunung pen ahi Khristian Bangin Nungta In cih hun zatna in nisim nuntakna-ah Lai Siangtho thubulte i nuntakpih theih nading ka kikum uh hi. Tua sungah dotna le dawnna tawh thu kikup khopna om a, tua in i theihsa Lai Siangtho thute hong telsak semsem hi.

Kikhawma nong pai ciang Lai Siangtho thuhilhna a hoihte in na lungsim hong bun mahmah ding cih ka um uh hi.—Isaiah 54:13.

• Jehovah Tecite’ kikhopna-ah bang thu zak ding lamen na hiam?

• Kal sima kikhopnate laka koi penah hong kikhawm nuam na hiam?