Jehovah Teci mi bangzah tawh kithei na hi hiam? Pawlkhat pen na vengte, naseppihte ahih kei leh na Sang kahpihte hi kha thei ding hi. Ahih kei leh Lai Siangtho na kikuppihte hi kha thei ding hi. Kote kua hi takpi a, mipi mai-ah ka upna uh ba’hang genkhia ka hi uh hiam?

Ko pen minampi ka hi kei uh hi. Kote pen pianna nungthu, taangpi nuntakzia kibang lote pan hi ung. Kote laka pawlkhatte pen ni dangin biakna dang hi a, pawlkhatte leuleu pen Pasian a um lote hi. Teci ka suak ma un Lai Siangtho thuhilhnate limtaka hun pia-in ka sittel uh hi. (Sawltak 17:11) Ka sin thute ka thukim uh ciang Jehovah Pasian biak ding ko utthuin ka tel uh hi.

Lai Siangtho sinna pan phattuamna ka ngah uh hi. Mi khempeuh mah bangin, ko zong thanemnate le haksatnate ka nei uh hi. Ahih hangin Lai Siangtho thubulte nisim nuntakna-ah hanciama ka zuih uh ciang, ka nuntakna uh hong picingsak semsemna ka mu uh hi. (Late 128:1, 2) Tua hangin Lai Siangtho sinna pan ka ngah uh a manpha thute mite kiang a gen ka hi uh hi.

Pasian piak thumanphate zui-in ka nungta uh hi. Lai Siangtho sunga thupiakte’n hong lungnuamsakin lungsim hong hoihsak a, mite i zahtak na’ng le migi i hih theih na’ng hong hilh hi. Tua thubulte’n a kicingtaak a cidam minampi khat piang sak ding a, innkuan kilem sak a, gamtatna zong hoihsak hi. “Pasian in kuamah angvan tuam nei lo” cih teltakin um ka hih manun kha lama a kipumkhat leitungbup innkuanpihtein ka kingaihsun uh hi. Minam le gam vai hangin buainate ka nei kei uh hi. Mi nampi ka hih loh uh hang a tuam vilvel mipi khatin ka kipumkhat uh hi.—Sawltak 4:13; 10:34, 35.

• Jehovah Tecite midangte tawh a kibatna uh bang hiam?

• Tecite in Lai Siangtho pan bang thu manphate sin uh hiam?