Jesuh a sih madeuh in hih bangin gen hi “mi khempeuh tungah teci ahi dingin Pasian’ hong uk na hangin a lungdamhuai thu, leitung khempeuhah kihilh ding hi. Tua khit ciangin bei na hong tung ding hi.” (Matthai 24:14) Ahih hang leitungbup tangko nasepna koici zo thei ding? Jesuh leitung hong pai lai a, a sep dan mah bangin i sepna tawh ki zo thei ding hi.—Luka 8:1.

Mite tawh kiho theih nading amau inn-ah pai ding ka hanciam uh hi. Jesuh in inn khat pan inn khat pai a, lungdamna thu gen dingin a nungzuite na pantah hi. (Matthai 10:11-13; Sawltak 5:42; 20:20) Kumzalom masa lai-a lungdamna thu a gente in a gen nading munte limtakin seh uh hi. (Matthai 10:5, 6; 2 Korin 10:13) Tua mah bangin tu hunin zong kote ii tangko nasepna hoih takin kivaihawm a, pawlpi khempeuhte ii thugen nading munte kiseh hi. Tua in “mi te kiangah thu na hilh un” hong ci Jesuh ii thupiak ka sep zawh nading un hong huh hi.—Sawltak 10:42.

Mite a kimuh theihna mun khempeuhah thu gen ding ka hanciam uh hi. Jesuh in mipi omna mun, tuili gei, taangpizat tuikhukte-a mite kiang thu a genna pan i etteh theih ding lim hong lak hi. (Marka 4:1; Johan 4:5-15) Phone tawh ahih kei leh lam dung, sumbawlna munte le pakhuana om mite tawh kiho in Lai Siangtho thu ka gen uh hi. Innvengte, naseppihte, sangkahpihte le meltheih te kiang zong hun ngah simin teci ka pang uh hi. Hih bangin hanciama sem ka hih manun “hotkhiatna thu” ahi lungdamna thu pen leitungbupa mi awn tampi te’n za thei uh hi.—Late 96:2.

Pasian Gam lungdamna thu le tua lungdamna thu in mailam hunah mite ading bang dan in phattuamna ngahsak ding cih thu na gennop mi khat peuhpeuh na ngaihsun kha hiam? Lametna hong pia hih thu pen nang ading bek in keemcip kei in. Ahih theih leh a manlang theithei in mite kiang na gen in.

• I tangko ding a phamawh “lungdamna thu” in bang ahi hiam?

• Jesuh thuhilh dan Jehovah Teci te’n koici etteh uh hiam?