Jesuh Khrih in a nungzuite kiang hih bangin gen hi: “Midangte in na gamtatna hoihte uh a muh ciangin vantungah a om na Pa uh min a phat theih nadingun mite mai-ah na gamtat hoihna uh khuakvak bangin na kilangsak un” ci hi. (Matthai 5:16) Tua thu sep theih nadingin tu hun khangthak pilnate kizang a, tua sungah Internet zong kihel hi. Ko ii website ahi kumpite’ phal jw.org in Jehovah Tecite ii upnate le sepnate na lakkhia hi. Tua sungah bang thute kimu thei ding hiam?

Mi te’n a theih nop thudotnate ii Lai Siangtho’ dawn’na. Mite’n a theihnop thudot tampi lak pan a thupi i theihnop thudotnate ii dawn’na na mu ding hi. Gentehna, Gimnate A Maimang Ding Hiam? cih le Misite A Hingkik Ding Hiam? cih laihawmte pen Online-ah pau nam 600 val tawh zong mu ding hi teh. New World Translation Lai Siangtho pen pau nam 130 valin kimu thei a, Lai Siangtho sin theih nading Lai Siangtho In Bang Hong Sinsak A Hiam? laibu le kha simin a kihawm Vilnatausang le Khanghlo In! cih magazine a tuamtuamte zong mu ding hi teh. Tua banga laibu tampi internet tungah sim thei ahih kei leh kingai thei a, MP3, PDF, EPUB-in zong ki download thei hi. A lunglut mi khat peuhpeuh na theihsaknop leh ama kampau tawh laimai tawm thoh khiathei hi teh. Khutlimlah pau tawh akilak thute Video-in zong ki-en thei hi. Na tawlngak ciang na ngaihnop leh tangthu gen dan Lai Siangtho simna, a zaknop tumgingte zong Internet pan download thei hi teh.

Jehovah Tecite tawh kisai thu a man theihna. Internet tungah a kikoih thu pawlkhat pen ko ii leitungbup nasepnate, Jehovah Tecite tawh kisai thupiangte, mihing kihehpihna hangin siatna a thuakte ka huhna uh thute, a nunung thupiangte le Video tomte ahi hi. A kibawl ding kikhoppite ii thute, ko ii branch office-te tawh kizop theih nading address-te zong na muthei ding hi.

Tua danin thuman ii khuavak leitung mun gamlapi dongah a taan’ nading ka sem uh hi. Antarctica gama kipan khawmualpi khempeuh a, om mi tampi in hamphatna ngah uh hi. Pasian minthan nading le Jehovah’ kammal leitung bupah “manlang takin kizel” nading thu ka ngen uh hi.—2 Thesalonika 3:1.

• Mi te’n Lai Siangtho thuman a theih na’ng jw.org in koi bangin na huh hiam?

• Kote ii website nong en nuam hiam?