Kristian Greek Lai Siangtho sungah Barnabas le sawltak Paul-te’ thu na gen den hi. Hih pasalte in khawk makaipi-in na hong semin pawlpi masa te kiang na vaan uh hi. Ba’hang in maw? Kha lama unaute’ ngah ding thuphate deihsak uh ahih man hi. Paul in “i sanggamte kiangah va hawhkikin bang a cici uh hiam cih va en ni” ci hi. Paul in gamla pi a, om unaute kiang zinin hawh nuam a, tha pianuam hi. (Sawltak 15:36) Tu hun a, khawk makaipi te’n zong tua bang lungsim nei uh hi.

Amau hong pai-in tha hong pia hi. Khawk makaipi khatin pawlpi sawmnih kiim kum khat a, nihvei vaanin pawlpi khatah nipi kal khat sung taam uh hi. Khawk makai unaupate le zi a neih leh a zite ii tuahkhaknate pan hamphatna ka ngah thei uh hi. Khangno le khangham kuamapeuh tawh kitheih ding hanciam uh a, tangko nasepna le Lai Siangtho sinpihnate-ah hong zui nuam uh hi. Hih makaipite in upate tawh tuucing vaanna-ah paikhawm uh a, kikhopna le kikhoppite-ah thu a genna uh pan tha hong ngahsak hi.—Sawltak 15:35.

Kuamapeuh tung’ hong lunglut uh hi. Khawk makaipi te’n pawlpi dinmun koi bang hiam cih lunglut mahmah hi. Pawlpi’ khantohnate kikupkik theih nadingin upate le pawlpi nasemte tawh kimu khawmin amau tavuante hoih taka a sep theih dan ding uh thu hilh hi. Pioneer-te ii Pasian nasepna-ah a lawhcin nading na huhin mithakte tawh zong kitheih ding hanciam uh a, kha lamah koici khangto hiam cih za nuam uh hi. Tua unaupate khat ciatin kote’ phattuam nadinga a kipiakhia “naseppih” te ahi uh hi. (2 Korin 8:23) Amau upna le Pasian tunga lungsim khempeuh tawh a kipiakkhiatnate i etteh ding kul hi.—Hebru 13:7.

• Khawk makaipi te’n pawlpite kiang bang ngimna tawh vaan uh hiam?

• Amau hong vaanna pan nangh bang hamphatna ngah thei ding?