Jehovah Tecite khat tawh Lai Siangtho sinkhawm na hih leh na sin ding thute simkhol dingin hong lamen ung. Tua bang mahin pawlpi kikhopna-ah na kikhop ma-in kigingkhol lecin hoih hi. Hoih takin hun gel a, kiginkholhna in a hoih pen phattuamna hong ngahsak ding hi.

Na sin theih nading amun le ahun khensat in. Bang hunah hoih takin ngaihsun a, sin thei ding na hiam? Nikhat nasep na kipat ma zingsang lam maw? Ahih kei leh naupangte lup khit zan hun lamah maw? Hun sawtpi na sin theih kei leh nai bangzah sung sin thei ding cih na khensat in. Tua hun pen thu khat peuhpeuh hangin na kipelhsak kei in. Gam daihna mun zong inla lungsim hong nawngkaisak thei Radio, Television le phone-te na khak in. Thusin na kipat ma thungetna in nikhat sunga lunghihmawhnate kiamsakin Pasian Kammal na lunglut na’ng hong huh ding hi.—Filippi 4:6, 7.

Na sin thute ciamteh inla kihel a, na dawn’ kik theih na’ng kiging khol in. Thu a vekpi-in sim masa inla thu paizia theih sawm in. Thu khat ahih kei leh khenpi thulute ngaihsun in. Thulu neu in khenpi thulu tawh koi cih kizopna nei hiam cih na ngaihsun in, limte limtakin ngaihsun inla ngaihsutkik theih nading thudotnate in a thu bulpi in a gennop pen koici kilangsak hiam cih na ngaihsun in. Lai khawkte na sim khit ciangin thu kidotna sim inla lai khawk in a gennop thu na zong in. A ki-at Lai Siangtho munte sim inla tua in na sin thute koi bangin panpih hiam cih ngaihsun in. (Sawltak 17:11) A gennop thu na theih khit ciang a thupi kammalte le kamlomte laikhawk sungah git inla na ciamteh in, tua in kikhopna-ah thudotnate na dawn’ nop ciang na phawkkik na’ng hong huh ding hi. Kikhopna-ah na dawn’ nop leh na khut laamin nang ii theih dan tawh dawnna tomno khat piathei hi teh.

Kalsim kikhopna a, thu kikup a tuamtuamte na kantel kikna in nang ii Lai Siangtho theihna a thak tampi hong kibehlap ding hi.—Matthai 13:51, 52.

• Kikhopna ading na kiginkholh na’ng bang hun gelna neithei ding na hiam?

• Kikhopna-ah dawnna napiak theih nading, koi bangin kigingkhol thei na hiam?