Lai Siangtho in Khrih a sihkhit ciangin Khristian masate sungah a man lo sia-te hong om ding a, Lai Siangtho thuman kisusia ding hi ci-in na gen khol hi. (Sawltak 20:29, 30) Tua mah bangin hong piang takpi hi. Tua mite’n Jesuh thuhilhnate sungah a man lo thuhilhnate behlap uh a, a man lo Khristian biakna hong kipan hi. (2 Timoti 4:3, 4) Tu hunah Lai Siangtho hilh takpi thute man takin theitel i hihna koi bang danin kiciansak thei ding i hi hiam?

Jehovah in thuman hong pulak ding hun hong tungta hi. Ama’n hun bei hun sungah ‘mipilte in theihtel theihna a nei ding uh hi’ ci-in na gen khol hi. (Daniel 12:9, 10) Kum 1870 kum in thuman a zong mi pawlkhat in church a tam zaw ii thuhilhte Lai Siangtho tawh a kituak loh lam na mu uh hi. Tua ahih ciang, amau Lai Siangtho thuhilh bulpite a teltheih nading thu kan na kipan uh a, Jehovah in thupha pia in kha mit na honsak hi.

Migi pasal pawlkhat in Lai Siangtho limtakin sin uh hi. Tua a thalawp Lai Siangtho Sangnaupang te’n thu a kankhop dan bangin tu ni dong ka zui uh hi. Amau Lai Siangtho thu khat khit khat kikum uh hi. A telhak Lai Siangtho munte a muh uh ciang Lai Siangtho mun dang te’n bangci gen cih na en uh hi. Lai Siangtho ii a khiatnate a kituak ciang thukhup uh a, lai-ah at pah uh hi. Tua bang mahin Lai Siangtho mah letkhia sakin Pasian min le Pasian Gam, leitung le mihingte ading Pasian ngimna, a site om zia, thawhkikna lametnate tawh kisai thuman na theisakkik uh hi. Thu a kan manun a man lo upnate le ngeina man lote pan amau suakta uh hi.—Johan 8:31, 32.

Kum 1879 kumin Lai Siangtho Sangnaupangte in mi tampite kiangah thuman theihsak ding a hun tungta hi cih na theikhia uh hi. Tua a hih manin tua kum a kipan Vilnatausang Jehovah’ Gam Tangkona magazine thohkhia uh a, tuni ciang dong kithoh hi. Tu hunin Lai Siangtho thuman pen gam 240 ah kampau 750 kiim tawh ka hawmkhia uh hi. Hih bangin thutheihna man a khangtoh semsemna omngei nai lo hi.

• Jesuh a sih khit ciangin Lai Siangtho thumanna bangci ta hiam?

• Lai Siangtho thuman koi bang danin kithei kik hiam?