Ko ii Pawlpi in kum simin Lai Siangtho le a dang laibute thenza tampi kikhenin a mawkna-in kihawm hi. Biakinnte le branch office-te lamin, puahpha in ka kemcing uh hi. Bethel innkuan mi tul tampite le Khristian missionary tampi kipanpih a, siatnapi a tun ciang siatna a thuakte huhna ka pia uh hi. ‘Hih te khempeuh ading sumlepai koi bangin vaihawm zo uh hiam?’ ci-in dong kha thei ni teh.

Sawm-ah-khat le Sumpite ka dong kei uh hi. Tangko nasepna ading sum tampi a bei hang’ sum ka dong kei uh hi. Jehovah in hong huh hi cih um ka hih manun “mihingte kiang pan cikmah hunin huhna ngen ahih kei leh hehpihna ka ngen het kei ding uh hi” ci-in a beisa kum zaval a, kipan Vilnatausang magazine a nih veina-ah kigelh hi. A man takin gen leng khatvei zong ka ngen ngei kei uh hi.—Matthai 10:8.

Ka nasepnate uh piaknopna lungsim tawh a kipia sumpite tawh kisem hi. Mi tampi in Lai Siangtho pilna ka zeekna uh lungdam ahih uh teh, tua ading sumpi hong pia uh hi. Leitungbupah Pasian deihna a kisep nading Tecite in zong amau ii hun, sumlepai, thatang le a dangte zong lungdam takin piakhia uh hi. (1 Khang Tangthu 29:9) Lungsim takpi tawh a piakhia nuamte adingin Biakinnte le khawk kikhoppite-ah sumpi bung kikoih sak hi. Ahih kei leh ko ii website ahi, jw.org pan zong sumpi kikhia thei hi. Sumlepai a tamzaw pen sum a haulo mipite piak hizaw hi. Amau pen Biakinn-ah sumpi bung sungah sumnen tang nih a khia azawng meigongnu tawh kibang hi. Tua meigongnu sepna Jesuh in na phat hi. (Luka 21:1-4) Mi kuamapeuh in “lungsim sung uh ah ngaihsutsa zah ciat” piak theih nading neihsa pawlkhat te ki “tuamkoih” thei hi.—1 Korin 16:2; 2 Korin 9:7.

Jehovah in ama deihna a tangtun’ na’ng a manpha amau “neihsa” te pan Pasian Gam nasepna ading ahuh nuam mite’ lungsim na hanthawn lai ding hi cih ka um uh hi.—Paunak 3:9.

• Ko ii pawlpi in biakna dangte ii pawlpite tawh bang in na kilamdang sak hiam?

• Lungsim takpi tawh a kipiakhia sumpite koi bangin kizang hiam?