Jehovah Tecite-in Theocratic Sang a bawl zawh kum tampi hi ta hi. Pasian Gam tangko nasepna-ah hun bita a kipiakhia nuamte ading Sang thupite kivaihawm saka, tua in amau Pasian “nasepna-ah maa na tun” zo ding uh hi.—2 Timoti 4:5.

Pioneer Service Sang. Regular pioneer kum khat a sem khinte in a ten’na khua a, om Biakinnah a kibawl ni guk sung, a kikah Sangah numei ahi zong pasal ahi zong kah thei hi. Sang ii a ngimna pen pioneer-te Jehovah tawh a kinaih semsem nading, Pasian nasepna khempeuhah bun taka a sep zawh nading le Pasian nasepna-ah citakin a sepsuak theih nading ngimna hi.

Lungdamna Thu Tangkote ading Sang. Kha nih sung a sawt, hih Sang in inn le lo nusia a, a kisapna munte-ah Pasian na a sem dingin apai nuam kum tampi a semkhin pioneer-te ading pattahna Sang hi. A mantakin gen leng a lianpen Thu Tangkopa Jesuh etteh in “Hih lai-ah kei om ing! Kei hong sawl in” a cite hi uh hi. (Isaiah 6:8; Johan 7:29 ) Inn tawh a kigamla khua-ah pai uh ahih manin nuntakzia a ol thei thei-in bawl uh hi. Ngeina, khuahun le annek tuidawnte kibang lo ahih teh, zong kiseknai lo ding uh hi. Kampau thak zong sin kul hi. Hih Sang in kum 23 pan 65 kikal nungakte le tangvalte, nupa-te amau nasep nading munah a kisam kha lama thahat nading le Jehovah le ama pawlpi ading a kizang thei mi na suaksak hi.

Gilead Vilnatausang Lai Siangtho Sang. “Gilead” a kici Hebru kammal in “teci hon” cih na hi. Kum 1943 a kipan Gilead Sang pan Khristian mission 8,000 val ki pantah a, “leimong dongin” teci pan’na-ah maa na tun’ uh hi. (Sawltak 1:8) Gentehna in Sang mante Peru gamah a tun’ cilin tua lai-ah pawlpi khat zong om nailo hi. Tun ahih leh pawlpi 1,000 val bang om ta hi. Kote ii missionary-te Japan gamah a kisawl tungin tua lai-ah Teci mi 10 zong pha nailo uh hi. Tun mi 200,000 val bang phata hi. Kha nga sung kikah Gilead Sangah Pasian Kammal kician takin sin uh hi. Special pioneer ahih kei leh missionary-in na a semte, branch office-ah na a semte, khawk makai-in na a semte tua Sangah a kah dingin kisam hi. Amau leitungbup tangko nasep a huh zawh nading hoih taka thu sinpihna ngah uh hi.

• Pioneer Service Sang ii a ngimna in bang ahiam?

• Lungdamna Thu Tangkote Ading Sang pen kuate adingin kibawl hiam?