Pasian min pen Jehovah hi a, “A Suaksak Hi” ci-in khiatna nei hi. Jehovah in a vanglian pen Pasian hi a, na khempeuh a piangsak hi. A sep nop khempeuh a sep theih nadingin thahatna a nei hi.

Hebru kammalin Pasian min pen laimal li tawh kigelh hi. Mang lai-in YHWH ahih kei leh JHVH in ki-at hi. A masa pen Hebru Lai Siangtho sungah Pasian min 7,000 kim bang na om hi. Leitung bupa mi khempeuh in Jehovah min a aw lawh dan uh kibang lo uh a, amau kampau tek uh tawh kituakin na lo ciat uh hi.

▸ Khenpi 1, laikhawk 15

Lai Siangtho Thuneipi pen Pasian hi a, ahih hang a at dingin mihingte na zang hi. Tua pen mihau pa khat in ama nasem Secretary kiang ama ngaihsutnate lai a atsak tawh kibang hi. Pasian in ama ngaihsutnate a at dingin a kha siangtho tawh Lai Siangtho atte na lamlak hi. Pasian kha siangtho in nam tuamtuam tawh na lamlak a, khat veivei maangmuhna pia-in ahih kei leh mangmat sak a, tua khit ciang lai-ah na at uh hi.

▸ Khenpi 2, laikhawk 5

Hih pen Lai Siangtho sunga om thuman bulpi hong hilhna ahi hi. Gentehna, “kikholhpih hoih lote in mi siasak thei hi” cih thubul in i kikholhpih mite tung pan a sia a pha ei tungah hong lawh thei hi ci-in hong hilh hi. (1 Korin 15:33) Tua banah “mi khempeuh in ama vawh nam khaici mah ngahkik ding hi” cih thubul in i gamtatna bangin thuak kik ding cih hong hilh hi.—Galati 6:7.

▸ Khenpi 2, laikhawk 12

Hih pen Pasian kiang pan hong pai thu ahi hi. Tua sungah Pasian deihna, gamtat hoih nading thuhilhna, thupiakna leh thukhennate na hilhcian hi. Mailamah a piang ding thu khat peuhpeuh tawh kisai a gen thute zong hi thei hi. Lai Siangtho sunga genkholhna tampi tangtung khin hi.

▸ Khenpi 2, laikhawk 13

Messiah tawh kisai Lai Siangtho genkholhna tampi Jesuh in a tangtungsak hi. “ Messiah Tawh Kisai Genkholhna” cih bawm sungah en in.

▸ Khenpi 2, laikhawk 17, A Nuai-a Ciaptehna.

Jehovah in amah a it mihingte ading leitung pen paradais inn dingin na bawl hi. Ama ngimna kikhel lo hi. A sawt loin, Pasian in siatna khempeuh hemkhia-in ama mite tawntung nuntakna pia ding hi.

▸ Khenpi 3, laikhawk 1

Satan pen Pasian a langdo masa pen vantungmi ahi hi. Amah pen Satan kici a, a khiatna in “Langpang” cihna ahi hi. Ahang pen Jehovah langpang ahih man hi. Dawimangpa zong kici a, a khiatna in “Min Siasak” cihna ahi hi. Hih min a kipiakna pen Pasian tawh kisai zuaugenin mihingte kheem ahih man hi.

▸ Khenpi 3, laikhawk 4

Jehovah in leitung a bawl ma pekin vantung mite na piangsak hi. Vantungah a teng dingin a bawl ahi hi. Vantungmi awn tul tampi om hi. (Daniel 7:10) Vantung mite khatlekhat kibang lo uh a, min zong nei ciat uh hi. A citak vantungmi te’n mihingte’ biak ding kiniamkhiat takin na nial uh hi. Za a tuamtek nei uh a, nasep zong a tuamtek kipia hi. Tua nasep pawlkhat sungah Jehovah’ tokhom mai-ah nasepna, ama thugente a kamtai ding, leitunga om ama nasemte a kem ding le a lamlak ding, ama thukhenna a sem ding, tangko nasep a huh ding cihte kihel hi. (Late 34:7; Maangmuhna 14:6; 22:8, 9) Mailamah, Jesuh tawh kipawlin Armageddon gal simkhawm ding uh hi.—Maangmuhna 16:14, 16; 19:14, 15.

▸ Khenpi 3, laikhawk 5; Khenpi 10, laikhawk 1

I lungsim, i ngaihsutna, ahih kei leh i sep nate in Jehovah ahih kei leh ama deihna tawh kilangdo ahih leh tua pen mawhna ahi hi. Mawhna in Pasian tawh i kizopna hong susia ahih manin Pasian in mawhna i bawlkhak loh nading thukham le thuzungte hong pia hi. A kipatcilin Jehovah in na khempeuh a cingtaak in bawl hi, ahih hang Adam le Eve in Jehovah thu man loh ding a teel uh a kipan amau mawh nei-in cingtaakna nei nawn lo uh hi. Tua ahih manin teekin a si uh hi. Adam kiang pan mawhna luah ihih manin ei zong teekin i si hi.

▸ Khenpi 3, laikhawk 7; Khenpi 5, laikhawk 3

Hih pen Satan’ leitung le siatna khempeuh hong susia ding Pasian galsimna ahi hi.

▸ Khenpi 3, laikhawk 13; Khenpi 8, laikhawk 18

Pasian Gam pen Jehovah in vantungah a phut, kumpi ki-ukna ahi hi. Tua Gam’ Kumpi-in Jesuh Khrih in uk ta hi. Mailamah Jehovah in tua Gam zangin siatna khempeuh hemkhia ding hi. Tua khit teh Pasian Gam in leitung bup a uk ding hi.

▸ Khenpi 3, laikhawk 14

Jehovah in na khempeuh a bawl ma, Jesuh na piangsak hi. Mihingte ading a nuntakna a piakhia dingin leitungah Jesuh na sawl hi. Jesuh a kithah khit ciang Jehovah in na thokiksak hi. Tu’n Jesuh in vantungah Pasian Gam’ Kumpi-in uk ta hi.

▸ Khenpi 4, laikhawk 2

Messiah hong suak ding hun Lai Siangtho genkholhna ahi hi. Tua pen nipikal 69 a kici hun sunga a tawp ni hi ding a, tua pen B.C.E. 455 kumin hong kipanin C.E. 29 kumin hong bei ding hi.

Tua hun pen C.E. 29 kumin a bei lam en’ koici theih ihi hiam? Jerusalem khuapi-ah Nehemiah a tun ni le khuapi a kilam kik hun B.C.E. 455 kumin tua nipikal 69 hong kipan hi. (Daniel 9:25; Nehemiah 2:1, 5-8) Gentehna, mi’n “dazen” khat a cih uh ciang nambat 12 a kingaihsut mah bangin “nipi” khat a cih ciang ni 7 a hong phawksak hi. Hih genkholhna “nipi” khat pen kal khat a ni sagih hi loin, kum sagih ahi hi. Ahang pen “ni khat ciangin kum khat” cih genkholhnate tawh kisai-in i zuih ding thu a om man ahi hi. (Gamlak Vakna 14:34; Ezekiel 4:6) Tua nipi khat ciang kum sagih hun sawt ahih leh nipikal 69 pen (69 x 7) ci-in khangsak lehang, kum 483 kingah hi. B.C.E. 455 kum panin kum 483 sim kipan le’ng, C.E. 29 kum  hong tunpih hi. Tua kum lian mahin Jesuh tui kiphumin Messiah a hong suak hi!—Luka 3:1, 2, 21, 22.

Tua genkholhna mah in nipi adang khat na genkhol lai a, tua pen kum sagih na khengval hi. Tua hun sung pen, Messiah a kithah C.E. 33 kum le Jew minamte kiang bek hi loin minam dangte tungah Pasian Gam lungdamna thu tangko a kipat hun C.E. 36 kum ciang na huam hi.—Daniel 9:24-27.

▸ Khenpi 4, laikhawk 7

Lai Siangtho in Jehovah Pasian pen Piangsakpa hi ci-in, adang na khempeuh a bawl ma, Jesuh na piangsak hi ci-in hong hilh hi. (Kolose 1:15, 16) Jesuh pen Vanglian pen Pasian hi lo hi. Jesuh in cikmah hunin Pasian tawh kikim ing, ci ngei lo hi. Man takin gen le’ng, Jesuh in: “Kei sangin a lianzaw Pa Pasian,” ci-in na gen hi. (Johan 14:28; 1 Korin 15:28) Ahih hang biakna pawlkhat in Thum Gawm Pasian ci-in hilh uh a, Pasian pen: Pa, Tapa le kha siangtho tawh a kigawm mi khatin hilh uh hi. “Thum Gawm Pasian” cih kammal pen Lai Siangtho sungah na om lo hi. Hih pen a man lo thuhilhna ahi hi.

Kha siangtho pen a gamtang Pasian thahatna hi a, Pasian in ama deihna a sep ciang a zat, a kimu thei lo thahatna ahi hi. Tua pen mi hi lo hi. Gentehna, Khristian masate “Kha Siangtho tawh kidim uh a,” Jehovah in: ‘Mi khempeuh tungah ka Kha ka sung ding hi’ na ci hi.—Sawltak 2:1-4, 17.

▸ Khenpi 4, laikhawk 12; Khenpi 15, laikhawk 17

Khristian man te’n Pasian a biak uh ciang singlamteh zang lo uh hi. Ba’hang zang lo uh a hiam?

1. Biakna manlo te’n singlamteh a zat zawh uh sawt mahmah ta hi. Tanglai pekin mi te’n nulepa vai tawh dawi biakna le bawlsa nate biakna-ah singlamteh na zang uh hi. Jesuh a sih khit zawh kum 300 lai-in Khristiante in biakna sungah singlamteh na zang lo uh hi. Tua zawh kum tampi khit ciang, Rom Kumpipa Constantine in Khristian biakna kiciapteh nadingin singlamteh na bawl hi. Mite mai-ah Khristiante a minthan nading tua singlamteh lim na zang uh hi. Ahih hang singlamteh le Jesuh Khrih bangmah kisaina om lo hi. New Catholic Encyclopedia laibu in: “Khristiante a om ma pek le Khristian ahi lo mite ii ngeinate-ah singlamteh kimu hi” ci-in hong hilh hi.

2.   Singlamteh tung Jesuh na si lo hi. “Singlamteh” ci-a a kiletkhia Grik kammal pen “sing khuam tang,” “sing” ahih kei leh “singkung” ci-in khiatna a nei hi. The Companion Bible in: “Grik laibu [Thuciam Thak] sungah sing tawn nih cih kammal khat beek om lo hi” ci-in hong hilh hi. Jesuh pen sing khuam tungah a si hi.

3. I biakna-ah milim ahih kei leh ciaptehna lim i zat ding Jehovah in deih lo hi.—Paikhiatna 20:4, 5; 1 Korin 10:14.

▸ Khenpi 5, laikhawk 12

Jesuh in ama nungzuite kiang ama sih Phawkna Pawi a bawl ding uh na vaikhak hi. Israel minam te’n Paisan Pawi a bawl ni mah ahi, Nisan kha 14 ni simin a nungzuite in Phawkna Pawi na bawl uh hi. Anlum le leenggahzu pen Jesuh pumpi le a sisan tang hi a, Phawkna Pawi-ah a kikhawmte in a banbanin khatlekhat kipia sawn uh hi. Vantungah Jesuh tawh a ukkhawm dingte in tua anlum le leenggahzu ne-in dawn uh hi. Leitungah a tawntunga nuntak ding lametna a neite in Phawkna Pawi thupisakna tawh kikhawm uh a, ahih hang anlum ne loin leenggahzu zong dawn lo uh hi.

▸ Khenpi 5, laikhawk 21

Lai Siangtho sunga Hebru kammal ne’phesh le Grik kammal psy·kheʹ cih kammalte in (1) mihing, (2) ganhing, (3) mihing nuntakna ahih kei leh ganhingte’ nuntakna ci-in hong hilh hi. Hihte pen i genteh thu pawlkhat hi:

• Mihing. “Noah . . . hun laitakin . . . Teembaw sungah a om mi giat [Grik, psy·kheʹ] bek, tui in a suaktasak hi.” (1 Peter 3:20) Hih teng a, Grik kammal “psy·kheʹ” in mi—Noah le a zi, a tapa thum, le a tapate’ zite a cihna ahi hi.

•  Ganhing. “Pasian in, ‘Tuite in a nungta ganhing [Hebru, ne’phesh] honpite piangsak hen la, vantung kantanin leitungah vasate [Hebru, ne’phesh] leeng ta hen,’ ci hi.” Pasian in, “Nuntakna a nei ganhingte [Hebru, ne’phesh] amau nam ciatin leitung in piangsak hen: Innsa, gamsa, le a bokvak ganhingte [Hebru, ne’phesh] amau nam ciatin piang ta hen,” a ci hi. Tua mah bangin a piang pah hi.”—Piancilna 1:20, 24.

• Mihing nuntakna ahih kei leh ganhingte’ nuntakna. Jehovah in Moses kiang: “Nang [Hebru, “Nang ii ne’phesh”] a hong that nuam mi khempeuh si khinta uh hi, a ci hi.” (Paikhiatna 4:19) Leitungah Jesuh a om lai-in, ama’n: “Keimah in tuucing hoih ka hi hi. Tuucing hoihpa in a tuute aa dingin a nuntakna [Grik, psy·kheʹ] a pia hi.”—Johan 10:11, ZSV.

  Hih kammal ne’phesh le psy·kheʹ in lungsim ahih kei leh a nungta kuamapeuh ii lunggulhna ci-in zong kizang hi. Misi ahih kei leh siluang hawm zong ne’phesh le psy·kheʹ ci-in kigen thei hi.—Gamlak Vakna 6:6; Paunak 23:2; Isaiah 56:11; Haggai 2:13.

▸ Khenpi 6, laikhawk 5; Khenpi 15, laikhawk 17

Tedim Lai Siangtho sunga “kha” a cih kammal in khiatna tampi nei hi. Gentehna, a tamzaw-in mihingte muh theih lohin kithei zaw a, huih ahih kei leh mihing le ganhingte’ husanna ci-in zong kithei hi. Tua kammal pen Pasian banga kha pumpi a neite le kha siangtho ahi, Pasian ii a gamtang thahatna zong kici thei hi. Ahih hang mi khat a sih khit ciang ama pumpi pan a nungta suak khat om lai hi ci-in Lai Siangtho in hong hilh lo hi.—Paikhiatna 35:21; Late 104:29; Matthai 12:43; Luka 11:13.

▸ Khenpi 6, laikhawk 5; Khenpi 15, laikhawk 17

Grik kammal “Gehenna” pen Tedim Lai Siangtho sungah “Hell” ci-in kiletkhia hi. Gehenna cih pen Jerusalem khuapi gei-a om niinhalna le na kisuksiatna mun ahi, kuam ii min ahi hi. Jesuh hun lai-in tua kuam sungah ganhing ahi a, mihing ahi zong a hing tangin kihal a, kibawlsia cih thu khat beek kimu lo hi. Tua ahih teh Gehenna a cih pen mi khat a sih khit ciang a kimu thei lo mun khatah a tawntungin mei tawh kihal ahih kei leh kibawlsiatna mun na hi lo hi. Jesuh in Gehenna sungah a kilawnkhiate ci-a a gen ciang ama cihnopna pen a vekin kisusia cihna ahi hi.—Matthai 5:22; 10:28.

▸ Khenpi 7, laikhawk 20

Jesuh in a nungzuite kiang thunget dan ding a hilh lai-in hih thungetna na pia hi. Kote Pa thungetna ahih kei leh etteh ding thungetna zong kici hi. Gentehna, Jesuh in hih bangin thu i nget ding hong hilh hi:

• “Na min siangtho kizahtak hen”

  A min a kigensiatna khempeuh pan a siantho nading Jehovah ading thu i ngetsak hi. Tua bangin ngen le’ng vantung le leitung a om kuamapeuh in Pasian’ min zahtakin pahtawi ding uh hi.

• “Na ukna hun hong tung hen”

  Pasian’ kumpi in siatna tawh a kidim Satan’ leitung a suksiat nading, leitung bup hong ukin leitung pen paradais-in hong bawlsak nading thu i ngen hi.

• “Leitungah zong na deih bangin kigamta hen”

  Leitungah Pasian ngimna hong kicin nading thu i ngen hi. Tua hileh Jehovah in mihingte a bawl lai-a ama deihna mah bangin Paradais-ah a thumang, a cingtaak mihingte a tawntungin nungta thei ding uh hi.

▸ Khenpi 8, laikhawk 2

Jehovah in mawhna le sihna pan mihingte a hotkhiat nading tatkhiatna hong vaihawmsak hi. Tatkhiatna pen a masa pen pasal ahi, Adam sup a cingtaak mihing nuntakna leikik nadinga a kisam thaman hi a, Jehovah le mihingte kizopna a kisia pen a hoihkik nadinga a kipia thaman ahi hi. Pasian in Jesuh leitungah sawl ahih manin mawhnei mi khempeuh ading ama nuntakna hong pia thei hi. Jesuh hong si ahih manin mihing khempeuh cingtaak kikin a tawntunga nuntak theihna hunpha ngah ding uh hi.

▸ Khenpi 8, laikhawk 21; Khenpi 9, laikhawk 13

Daniel a lian 4 sunga genkholhna in 1914 kumin Pasian in a Gam phut hi ci-in hong hilh hi.

Genkholhna: Jehovah in Kumpi Nebukhadnezzar mangah singkung lianpi a kiphukna genkholhna mang na mangmatsak hi. Tua mang sunga singkung a khan loh nading “kum sagih” sung sik le sumngo kual tawh kivialcip ding ci hi. Tua khit zawh teh tua singkung hong khangkik ding ci hi.—Daniel 4:1, 10-16.

Tua genkholhna ei ading a khiatna: Singkung in Pasian thuneihna a gennopna ahi hi. Kum tampi sung Jehovah in Jerusalem panin Israel minamte a uk dingin kumpite na zang hi. (1 Khang Tangthu 29:23) Ahih hang tua kumpite hong citak nawn lo uh a, amau thuneihna zong hong bei hi. B.C.E. 607 kumin Jerusalem khuapi kisusia hi. Tua kumin “kum sagih” hun hong kipan hi. (2 Kumpi 25:1, 8-10; Ezekiel 21:25-27) Jesuh in, “Gentail mite uk hun a bei matengin Jerusalem khuapi a siacipin om ding hi” a cih ciang “kum sagih” thu a genna ahi hi. (Luka 21:24) Tua ahih teh Jesuh leitungah a om lai-in tua “kum sagih” na bei nai lo hi. Jehovah in tua “kum sagih” a bei ciang  Kumpi khat ka seh ding hi ci-in kamciam hi. Tua hong uk ding Kumpi thak pen Jesuh hi a, leitung bupa om Pasian mite tungah thupha tampi hong tunpih ding a, tua pen bei ngei lo ding hi.—Luka 1:30-33.

“Kum sagih” ii a sawtna: Tua “kum sagih” pen kum 2,520 sawt hi. Kum 2,520 pen B.C.E. 607 kum a kipan sim le’ng, 1914 kumin bei hi. Tua kumin Jehovah in vantungah Pasian’ Gam Kumpi-in Messiah ahi Jesuh pen Kumpi za na pia hi.

Tua kum 2,520 pen koi tak pan ngah ihi hiam? Lai Siangtho in kum thum le alang pen ni 1,260 tawh kikim na ci hi. (Maangmuhna 12:6, 14) Tua nambat nih vei gawm pen “kum sagih” ahih kei leh ni 2,520 kingah hi. Ni 2,520 pen kum 2,520 tawh kikim hi, ahang pen “ni khat ciangin kum khat” cih genkholhna tawh kisai zuih ding thu a om man ahi hi.—Gamlak Vakna 14:34; Ezekiel 4:6.

▸ Khenpi 8, laikhawk 23

Vantung mite lakah a lianpen khat bek om hi ci-in Lai Siangtho in hong gen a, a min pen Mikhael na ci hi.—Daniel 12:1; Jude 9, ZSV.

Mikhael pen a citak vantung mite ahi, Pasian galkapte ii Makai ahi hi. Maangmuhna 12:7 in: “Mikhael le a vantung mite in gulpi le a vantung mite a do uh hi,” na ci hi. Maangmuhna laibu in Pasian galkapte ii Makai pen Jesuh ci ahih manin Mikhael pen Jesuh ii a min dang khat ahi hi.—Maangmuhna 19:14-16.

▸ Khenpi 9, laikhawk 4

Hih thu pen Pasian Gam in Satan’ leitung a suksiat madeuhin leitung bupah a thupi mahmah thute a pian ding hun kikal khat a gennopna ahi hi. Lai Siangtho genkholhna in a zat ahi, “hun bei nading bang lim” le  “Mihing Tapa hong pai ciang” cihte in tua hun kikal khat a gennopna ahi hi. (Matthai 24:3, 27, 37) 1914 kumin vantungah Pasian’ Gam uk a kipat a kipan “nitawp ni hun” hong kipan a, Armageddon-ah Satan’ leitung a suksiat ciang tua hun hong bei ding hi.—2 Timoti 3:1; 2 Peter 3:3.

▸ Khenpi 9, laikhawk 5

Pasian in a sisa mi khat a hinkiksak ciang, tua pen thawhkikna kici hi. Lai Siangtho in sihna pan a hingkik mi 9 te ii thu hong gen hi. Elijah, Elisha, Jesuh, Peter le Paul-te in mi site na hingkiksak uh hi. Tua banga na lamdangte pen Pasian vangliatna bek tawh piang thei hi. Jehovah in leitungah a nungta dingin “miphate le misiate a kibangin sihna panin hingkiksak khawm ding hi” ci-in kamciam hi. (Sawltak 24:15) Lai Siangtho in vantungah nungta dingin a thokik ding zong om na ci hi. Tua pen teelna ahih kei leh sathau nilhna a ngahte ading hi a, Jesuh tawh vantungah a nungta dingin Pasian in a thokiksak hi.—Johan 5:28, 29; 11:25; Filippi 3:11; Maangmuhna 20:5, 6.

▸ Khenpi 9, laikhawk 13

Dawisiamna le kau siamna cih pen a kimu thei lo khate tawh kizop theih nading a hoih hetlo hanciamna khat ahi hi, tua sungah mi bum thei dawisiamte le lungsim vang a neite zangin kizopna ahih kei leh direct-in kizom uh hi. Dawi siamna a zui mi te’n tua bangin gamta uh hi. Ba’hang hiam cih leh mihing a sih khit ciang a kha paikhia a, a vanglian sikha suak hi cih a man lo thuhilhnate um uh ahih man ahi hi. Mihing te’n Pasian thu a man loh nading dawite in a thuzawh nading hanciam uh hi. Mailam thu etna, ni kha aksite enin mailam thu etna, mitphial, kau siamna, zeksakna, mailam thu theih nading  mihingte hih zawh loh siamna tawh hanciamnate pen dawisiamnate tawh a kizom ahi hi. I lungsim hong la a laihuai lo tawh a kibang mitphial ahih kei leh dawite tawh kisai laibute, magazine-te, suah ni suah kha enin mailam thu etna, video-te, limte le late kihel hi. A site ading biakpiakna, sihvui pawi, kumcin sihvui pawi ahih kei leh kawsah [hanken] cih banga sihvui ngeina a tamzaw pen dawite tawh kizom hi. Mihing te’n dawite’ vang a zatnop uh ciang guihtheih khamtheih zang uh hi.—Galati 5:20; Maangmuhna 21:8.

▸ Khenpi 10, laikhawk 10; Khenpi 16, laikhawk 4

Jehovah pen Vanglian pen Pasian hi-in, khuavannuai khempeuh ama piansak ahi hi. (Maangmuhna 15:3) Tua ahih manin na khempeuh a Neipa le tuate tungah thunei pen pa hi-in, ama bawlsate tungah a uk dingin a za lianpen ahi hi. (Late 24:1; Isaiah 40:21-23; Maangmuhna 4:11) Ama bawlsa na khempeuh tungah thukham na pia hi. Tua banah Jehovah in mite a uk ding za piaktheihna zong nei hi. Pasian it a, a thu i mang ciang Pasian’ thuneihna a panpih i suak hi.—1 Khang Tangthu 29:11.

▸ Khenpi 11, laikhawk 10

Nau bawlsiatna cih pen a suak nai lo naungek a sih nadinga bawlna ahi hi. Hih thu pen mihing pumpi pan ngeina man lo a, nausia ahih kei leh tuahsiatna hangin nausiatna hi lo hi. A nu gil sungah nau a paii a kipan tua naungek pen a nu pumpi hi nawn lo hi. Tua naungek pen mihing khat hi ta hi.

▸ Khenpi 13, laikhawk 5

Hih thu pen cidam nading zatui tawh kisai-in sisan ahi  zong tua sisan sung pana a kikhen khiakik sisan them nam lite lakpan khat pen mihing pumpi khat panin midang khat tungah thunna leh sisan kholna ahi hi. Tua a kikhenkhia sisan them nam lite pen plasma, sisan cell a san, sisan cell a kang le platelet-te ahi hi.

▸ Khenpi 13, laikhawk 13

Lai Siangtho sungah “thuhilhna” a cih kammal pen daan pia cih kammal tawh kibang lo hi. Thu hong kihilh ciang thu hong theisak a, thu zong i sin thei a, i khialhna zong hong kipuahphasak hi. Jehovah in a thuhilh ciang kuamah tungah cikmah hunin gilo loin, zong bawlsia ngei lo hi. (Paunak 4:1, 2) Jehovah in nu le pate ading a etteh huai lim hoih na koih hi. Ama thuhilhna phattuampih ahih manun mi te’n a thuhilh ding ut uh hi. (Paunak 12:1) Jehovah in ama mite itin a pantah hi. Ama mite ngaihsutna hoih lote a kikhel nading thuhilhin, ama deihna bangin a sep theih nading le a ngaihsut theih nadingun thu a sin theih nading na huh hi. Nu le pate aw, na tate thu na hilh uh ciang na ta te’n thuman ding a thupina ahang a teltheih nadingun na huh ding uh zong kisam hi. Tua sungah Jehovah a it nading, ama Kammal ahi Lai Siangtho le Lai Siangtho’ thuzungte a theihtel nading thuhilhna a cihna zong ahi hi.

▸ Khenpi 14, laikhawk 13

I mit tawh a kimu thei lo, mihingte sang a vanglian zaw kha gilote ahi hi. Dawite pen a gilo vantung mite ahi uh hi. Pasian thu a man loh uh a kipan amau le amau Pasian gal hong suakin a gilo vantung mite hong suak uh hi. (Piancilna 6:2; Jude 6) Jehovah a langpang Satan tawh hong kipawl uh hi.—Thu Hilhkikna 32:17; Luka 8:30; Sawltak 16:16; James 2:19.

▸ Khenpi 16, laikhawk 4