1, 2. Jehovah in innkuante ading bang deihsak a hiam?

JEHOVAH PASIAN in a masa pen nupa kitenna na bawl hi. Amah in numei masa bawlin, “Mipa kiangah tua nu a paipih hi,” ci-in Lai Siangtho in hong gen hi. Adam pen lungdam lua ahih manin: “Tu petpetin hih pen keima guhte le keima sate ahi hi,” na ci hi. (Piancilna 2:22, 23) Jehovah in a kiteng nupate lungnuamsak nuam hi cih hih in hong theisak hi.

² A khasiat huai-ah, mi tampi pen a lungnuam innkuan sungah nungta kha lo uh hi. Ahi zongin Lai Siangtho sungah thuzung tampi om a, innkuan sunga mimal khat ciat in innkuan a lawhcing nading le kithutuaka a lungnuam innkuan suah theih nading tua thuzungte in hong huh ding hi.—Luka 11:28.

3, 4. (a) A pasal in a zi, itna tawh koi bangin a bawl ding kisam a hiam? (b) Nupate khatlekhat a kimaisak ding ba’hang thupi a hiam?

³ Pasal hoih in a zi, itna le zahtakna tawh a don loh phamawh hi ci-in Lai Siangtho in gen hi. Hehpihna tawh Efesa 5:25-29 na sim in. A zi, itna tawh a tawntungin a don ding kisam hi. Ama’n a zi kem a, vaakin, cikmah hunin a zi zawhthawh bawl loh ding ahi hi.

⁴ Ahih hang a zi in na a sep khialh leh a pasal in bang a cih ding kisam a hiam? Pasalte kiang: “Na zite uh it unla, amaute tungah ngongtat kei un,” ci-in a it suak ding uh na gen hi. (Kolose 3:19) Pasalte aw, no zong na nasep khialh theihlam uh kiphawk un. Tua banah Pasian in na mawhna hong maisak ding na ut leh  na zi’ mawhnate na maisak loh phamawh hi. (Matthai 6:12, 14, 15) A pasal ahi zong, a zi ahi zong a nihun lungsim takpi tawh a kimaisak uh leh, a lungnuam nupa hong suak ding uh hi.

5. A pasal in a zi ba’hang a pahtawi loh phamawh a hiam?

⁵ Pasal in a zi a pahtawi ding Jehovah in lamen hi. A zi’ kisapnate a pasal in limtaka a ngaihsutsak ding kisam hi. Tua pen nak thupi mahmah hi. Pasal in a zi hoihtaka a don kei leh Jehovah in ama thungetnate ngaihsak lo ding hi. (1 Peter 3:7) Jehovah ading mihingte a manphasak pen amah a itna uh ahi hi. Pasian in numei sangin pasal thupimuh zaw tuan lo hi.

6. Pum “khat” hi ta uh hi, a cih in nupate ading bang a cihnopna hiam?

⁶ Nupate pen “Nih hi nawn loin khat ahi ta uh hi,” ci-in Jesuh in hong hilh hi. (Matthai 19:6) Amau’ khatlekhat tung citakin cikmah hunin khatlekhat tung ciampel lo ding uh hi. (Paunak 5:15-21; Hebru 13:4) Zite le pasalte in lupkhopna-ah a kisapnate uh angsung bek en loin khatlekhat a kipiak ding uh ahi hi. (1 Korin 7:3-5) “Kuamah in ama pumpi mudah ngei lo a, hoihtakin kemin a vakzaw hi,” cih pasal in a phawk ding a kul hi. Tua ahih manin a zi pimuhin a it loh phamawh hi. A zi in na khempeuh sangin a pasal kiang pan hehpihna le amah a it ding deihzaw hi.—Efesa 5:29.

7. Innkuan sungah innkuan lutang ba’hang kisam ahi hiam?

⁷ Innkuan khempeuh in lutang kisam hi, amah in a innkuan sung lamlakin a innkuanun na hoih takin semkhawm sak hi. Lai Siangtho in 1 Korin 11:3 sungah: “Mi khempeuh’ lutang pen Khrih hi a, numei’ lutang pen pasal hi a, Khrih’ lutang pen Pasian ahihna thu ahi hi,” ci hi.

8. A pasal a zahtak mahmahna a zi in koici lak thei ding ahi hiam?

 ⁸ Pasal khempeuh in na semkhial thei tek hi. Ahih hang a zi in a pasal ii khensatnate panpihin lungsim takpi tawh na a sepkhop ciang innkuan bupin phattuamna ngah uh hi. (1 Peter 3:1-6) Lai Siangtho in: ‘Zite in zong amau pumpi zah mahin a pasalte uh a it [“zahtak mahmah,” NW] ding kisam hi,’ ci hi. (Efesa 5:33) A pasal in a zi’ upna a panpih kei le e? A zi in a pasal a zahtak mahmah ding kisam veve lai hi. Lai Siangtho in: “Zite aw, na pasalte uh Pasian thu um lo ahihkhak leh na gamtatna hangun Pasian thu a uptheih nadingun na pasalte uh thu na mang un. Kampau kul sese loin, na gamtat hoihna [“zahtakna,” NW] uh a muh uh ciangin Pasian thu hong um ding uh hi,” ci hi. (1 Peter 3:1, 2) Pasal in a zi upna zahtak a, a theih siampih nading a zi’ gamtat hoih in na huh thei hi.

9. (a) A pasal tawh a kithukim lohna a om leh a zi in bang a sep ding kisam a hiam? (b) Titus 2:4, 5 sungah zite ading bang lamlahna om a hiam?

⁹ A pasal tawh a kithukim loh ciang a zi in bang cih ding a hiam? Ama ngaihsutna zahtakna tawh a lahkhiat  ding kisam hi. Gentehna, Sarah ii thugen khat Abraham lungkim lo a, ahih hang Jehovah in Abraham kiangah: “Ama hong gen bangin gamta in,” a ci hi. (Piancilna 21:9-12) Khristian pasalte ii Lai Siangtho tawh a kilangpang lo khensat tawpna pen a zi in a panpih ding kisam hi. (Sawltak 5:29; Efesa 5:24) Zi hoih in a innkuan sung hoihtakin kem hi. (Titus 2:4, 5 Sim in.) A pasal le a tate ading hanciam taka a sepna a muh uh ciang, amah zahtakin it semsem ding uh hi.—Paunak 31:10, 28.

10. Nupa kikhenna le a tuam tuaka omna tawh kisai Lai Siangtho in bang gen a hiam?

¹⁰ Khat veivei nupate in a tuam tuaka om ding ahih kei leh kikhen ding manlang takin khensat pahthei uh hi. Ahih hang Lai Siangtho in “Zi in a pasal ciahsan kei tahen,” ci-a tua ciang zong “Pasal in a zi ma kei tahen,” ci hi. (1 Korin 7:10, 11) Innkuan sung buaina pawlkhat hangin nupate a tuam tuakin om thei uh hi, ahih hang tua bang thu pen lim ngaihsut mahmah kul hi. Nupa kikhenna tawh kisai-in e le? Zi ahi zong pasal ahi zong midang khat peuhpeuh tawh a mawh ciang bekin nupa kikhen theihna hi ci-in Lai Siangtho in gen hi.—Matthai 19:9.

11. Na khempeuh sangin tate’ kisap pen bang a hiam?

¹¹ Nu le pate aw, ahih theih leh na tate uh tawh om khop ding, hun a tam theithei na pia un. Na khempeuh sangin amau kisap pen no na hi uh a, Jehovah thu a hilh dingin na nupa-un a kisam uh hi.—Thu Hilhkikna 6:4-9.

12. Nu le pate in a tate a cin zawh nading bang a sep loh uh phamawh a hiam?

¹² Satan’ leitung hong sia semsem a, mi pawlkhat in i naupangte buanin, bawlsia nuam uh hi. Nu le pa pawlkhat in tua bang vaite a gen ding uh haksa sa uh hi. Ahih hang tate in tua bang mite thu thei a, a kidop nading le  limtaka a pelh theih nading na hilh ding uh kisam hi. Nu le pate aw, na tate uh na cin loh phamawh hi. *—1 Peter 5:8.

13. Nu le pate in a tate uh koi bangin thu a hilh ding kisam a hiam?

¹³ Nu le pate in a tate ii gamtat dan ding thu a hilh ding uh tavuan nei hi. Na tate uh koi bangin thu hilh thei ding na hiam? Na tate na pattah ding kisam hi, ahih hang ngongtatna ahih kei leh gitloh gamtatna tawh cikmah hunin thuhilh kei in. (Jeremiah 30:11) Tua ahih manin na hehsuak laitakin cikmah hunin thu  hilh kei in. “Tem hiam bangin mi liamsak thei” ahih kei leh amau lungsim a nasak thei kampaunate pau nuam lo ding hi teh. (Paunak 12:18) Thumang ding a kisapna ahang a teltheih nadingun na tate uh thu na hilh un. —Efesa 6:4; Hebru 12:9-11; A Nunga Ciaptehna 30 en in.

14, 15. Naupangte in nu le pate thu a man ding ba’hang kisam a hiam?

¹⁴ Jesuh in a tawntungin a Pa thu mang hi, thumang ding a ol loh ciang zong na mang veve hi. (Luka 22:42; Johan 8:28, 29) Naupangte in zong nu le pate’ thuman ding Jehovah in lamen hi.—Efesa 6:1-3.

¹⁵ Naupangte aw, nu le pate thu na mang ding haksa na sak lezong, na phawk ding khatah tua banga thu na mang ciang, Jehovah le na nu le na pate nang tungah lungdam uh hi. *—Paunak 1:8; 6:20; 23:22-25.

16. (a) Khangno te’n na hoih lo a sep khak nading Satan in koi bangin hanciam a hiam? (b) Jehovah a it lawmte na teel ding ba’hang thupi mahmah a hiam?

¹⁶ Dawimangpa in na hoih lo na sep nading na lawmte le khangnote zangin hong zol thei hi. Tua hong kizolna na nialkik ding haksa mahmah ding ahihlam ama’n thei hi. Gentehna, Jakob’ tanu Dinah in Jehovah a it lo lawmte a nei hi. Tua ahih manin a innkuanpihte le ama tungah buaina tampi tung hi. (Piancilna 34:1, 2) Na lawmte pen Jehovah a it lo mite ahih leh Jehovah ii a muhdah thute na sep nading hong zol khathei ding uh a, tua bangin na sep khialh leh nang bek tham loin na innkuanpihte le Pasian zong a lungsim na mahmah  ding hi. (Paunak 17:21, 25) Tua ahih manin Jehovah a it lawmte na muh ding thupi mahmah hi.—1 Korin 15:33.

17. Innkuan sunga mimal khat ciat in bang tavuan nei tek uh hiam?

¹⁷ Innkuan sunga mimal khat ciat in Pasian thuhilhna a zuih uh teh haksatna le buaina tampi na peel zo uh hi. Tua ahih manin zi nei pasal na hihleh, na zi itin itna tawh na don ding kisam hi. Nang pen pasal a nei zi na hihleh, na pasal’ mai-ah kiniamkhiat-in zahtak inla, Paunak 31:10-31 sunga a kigelh zite ading gamtatna hoihte na etteh in. Nu le pate na hih uhleh, na tate’n Pasian a it nading thu na hilh un. (Paunak 22:6) Pate aw, na “innkuan sung hoihtakin” ukin na lamlak un. (1 Timoti 3:4, 5; 5:8) Tate aw, na nu le na pate thu na mang un. (Kolose 3:20) I phawk ding khatah i vekpi-in na sem khial thei ihih manin innkuan sungah kiniamkhiatin khatlekhat i kimaisak nading i kithum ding zong kisam hi. Hi mah hi, Lai Siangtho sungah innkuan sunga mimal khat ciat ading Jehovah ii lamlahna om hi.