1-3. Mi te’n sihna tawh kisai-in bang thu thei nuam uh a, biakna a tamzaw in koi bangin hilh uh a hiam?

LAI SIANGTHO in ni khat ni ciang, “sihna, . . . om nawn lo ding hi” ci-in hong kamciam hi. (Maangmuhna 21:4) Khenpi 5 ah tatkhiatna in tawntung nuntakna i ngah nading hong bawlsak thei hi cih i sin khin hi. Ahih hang tuni ciang dong mite si uh hi. (Thuhilhna 9:5) Tua ahih manin, i sih ciang bang piang ihi hiam? ci-in a thupi mahmah thu khat i dong hi.

² Tua thu pen i it i ngaih khat a sih ciang i thei nuam mahmah hi. ‘Amah koi munah tung a hiam? Ei hong cing tam maw? Ei hong huh thei tam? Amah tawh i kimukik thei diam?’ ci-in thei nuam hi hang.

³ Biakna a tamzaw in tua thute a tuam tekin hilh uh hi. Pawlkhat in mi hoih na hih leh vantung na kah ding a, migi lo na hih leh hell khuk sungah hong kikhul ding hi ci-in hilh uh hi. Pawlkhat leuleu in na sih ciang kha mi na suak dinga a si khinsa na innkuanpihte tawh na nungta khawm ding uh hi ci-in gen uh hi. Pawlkhat in zong na sih khit ciang thukhenna thuakin sunglutkik, ahih kei leh pumpi dang tawh nungtakik, gentehna midang khatin ahih kei leh ganhingin kisuakkik ci uh hi.

4. Sihna tawh kisai biakna a tamzaw ii thuhilhna pen bang thu khat tung kibulphuh a hiam?

⁴ Biakna a tamzaw in a kibang vet lo thute a hilh uh tawh kibang hi. Ahih hang a vek phialun upmawh khat tung bulphuhin hilh uh hi. Mihing khat a sih khit ciang a pumpi pan a nungta suak khat om lai hi ci-in amau hilh uh hi. Tua pen man takpi ding a hiam?

5, 6. I sih ciang bang piang i hiam?

⁵ Jehovah in i sih khit ciang bang suak ihi hiam cih thei a, mi khat a sih khit ciang ama nuntakna bei hi ci-in hong gen hi. Sihna pen nuntakna tawh kilehngat hi. Tua ahih manin mi khat a sih ciang a ngaisutna le a ciaptehnate kemin nungta nawn lo hi. * I sih khit ciang bangmah kimuthei nawn lo, thu zong kiza thei nawn lo a, bangmah zong kingaihsun thei nawn lo hi.

⁶ Kumpi Solomon in “a sisate in bangmah thei nawn lo uh hi” ci-in at hi. A site in it ahih kei leh mudah thei nawn lo a, “sihna gam sungah nasepna le thungaihsutna, pilna le theihna cihte om lo hi.” (Thuhilhna 9:5, 6, 10 Sim in.) Tua khit teh Late 146:4 ah Lai Siangtho in mi khat peuhpeuh a sih ciang “a ngaihsutnate” zong beita hi ci hi.

7. Sihna tawh kisai-in Jesuh in bang gen a hiam?

⁷ Jesuh lawm hoih Lazaras a sih lai-in ama’n a nungzuite kiang: “I lawmpa Lazaras ihmu zo hi,” ci-in gen hi. Ahih hang Jesuh in Lazaras ihmu takpi a cihna hi lo hi. A sawt loin Jesuh in: “Lazaras si khinta hi,” a ci hi. (Johan 11:11-14) Tua ahih manin Jesuh in sihna pen ihmut tawh na genteh hi. Ama’n Lazaras pen vangam tung ahih kei leh a si khinsa a innkuanpihte tawh om khawm hi ci-in na gen lo hi. Tua banah Lazaras pen hell sungah gimna thuak, ahih kei leh midang khatin, ahih kei leh ganhingin sunglutkik hi ci-in na gen lo hi. Lazaras pen khuaphawk lo-a a ihmu tawh kibang hi. Lai Siangtho mun a dangah zong sihna pen ihmut tawh na genteh hi. Hun khat lai-in Jesuh in sihna pen ihmut tawh na genteh kik hi. Jesuh in Jairas  tanu a hinkiksak lai-in “amah a si hi lo hi; a ihmu bek ahi hi, a ci hi.”—Luka 8:52.

8. Pasian in mihingte a si dingin a bawl ahih loh lam en’ koici theih ihi hiam?

⁸ Pasian in Adam le Eve pen ni khat ciang a si ding veve in a bawl maw? Hi lo! Jehovah in a cingtaak cidamna tawh a tawntungin lungnuam taka a nungta dingin na bawl hi. Jehovah in mihingte a bawl lai-in mailam thu theihnopna lungsim, ahih kei leh a tawntunga nuntak nopna lungsim na guan hi. (Thuhilhna 3:11) Nu le Pate in a tate uh hong gola teekin a sih ding uh mu nuam lo uh hi. Tua mah bangin Jehovah in zong mu nuam lo hi.  Tua bangin Pasian in a tawntunga a nungta dingin hong bawl ahih leh ba’hangin si ihi hiam?

9. Jehovah in Adam le Eve tung thu a piak pen ba’hang kilawm ahi hiam?

⁹ Eden huanah Jehovah in Adam kiang: “Na ut utin huan sung singkung gah khempeuh na ne thei ding hi. Ahih hangin a pha le a sia theihna singkung gah pen na ne kei ding hi. Bang hang hiam cih leh tua na nek ni-in na si ding hi, a ci hi.” (Piancilna 2:9, 16, 17) Hih siang taka a kipia thupiak pen zuih ding haksa lo a, Adam le Eve tungah bang hoih a, bang hoih lo hiam cih pen Jehovah in genkhuan nei hi. Jehovah thu a manna uh tawh Pasian thuneihna a zahtakna uh a lah ding kisam hi. Amau tungah a kipia na khempeuh tungah a lungdamna uh Pasian kiang a lah ding uh zong kisam hi.

10, 11. (a) Satan in Adam le Eve koici khem hiam? (b) Adam le Eve te sepna tungah ba’hang paulap ding om lo a hiam?

¹⁰ A khasiat huai-ah Adam le Eve in Jehovah thu man loh ding na teel uh hi. Satan in Eve kiang: “Pasian in, ‘Huan sung singgah khat peuhpeuh ne lo ding,’ hong ci ahi hiam?” ci a, Eve in: “Huan sung singgahte ka ne thei ding uh hi. Ahih hangin Pasian in, ‘Huan laizang a om singgah na ne kei ding uh hi, zong na lawng kei ding uh hi. Tua bang hih le-uhcin na si ding uh hi,’ hong ci hi, a ci hi.”—Piancilna 3:1-3.

¹¹ Tua khit teh Satan in: “Na si kei ding uh hi. Bang hang hiam cih leh tua singgah na nek ciangun na mitte uh hong vak ding a, a pha le a sia thei-in, Pasian tawh na kibat ding lamtak uh Pasian in thei hi, a ci hi.” (Piancilna 3:4-6) Eve in bang hoih a, bang hoih lo cih ama thu-in a khensat thei hi ci-a a ngaihsut ding Satan in deih hi. Eve in thu a man kei leh a piang ding thute tawh kisai Satan in tua hun mahin na khem hi. Satan in Eve aw, si kei ni teh  ci ahih manin Eve in singgah pawl khat ne-in a pasal zong a pia hi. Jehovah in singgah ne kei un ci-a a gen pen Adam le Eve in thei hi. Amau’ tua singgah a nek a kipan siangtaka le a kilawm taka a kipia tua thupiak pen man loh ding na teel uh hi. Itna tawh kidim vantunga a Pa a zahtak lohna, singgah a nekna uh tawh na lakkhia uh hi. Tua banga a sepna tungah paulap ding bangmah om lo hi!

12. Adam le Eve in Jehovah thu a man loh uh pen ba’hang khasiat huai mahmah a hiam?

¹² I nu le pa masapente in amau a Piangsakpa a zahtak lohna pen bangzah takin khasiathuai hiam! Hanciama na vaak na pattah na tanu le na tapa in nang hong langpang in hong do a, sawl bang loin hong lehtat le uh na lungsim bang a ci diam? Na lungsim kitam ding hilo a hiam?

13. Jehovah in “leivui mah na suakkik ding hi” a cih ciang bang a cihnopna hiam?

¹³ Thu a man loh uh a kipan Adam le Eve in a tawntunga nuntak theihna thupha taan uh hi. Jehovah in Adam kiang: “Leivui na hih manin, leivui mah na suakkik ding hi, a ci hi.” (Piancilna 3:19 Sim in.) A cihnopna in Adam pen a kipiansak ma, mah bangin leivui mah suakkik ding cihna hi. (Piancilna 2:7) Adam in mawhna a bawl khit ciang amah si-in a om nawn kei hi.

14. Ba’hang si ihi hiam?

¹⁴ Adam le Eve in Pasian thu na mang le uh tuni ciang dong amau nungta lai ding hi. Ahih hang Pasian thu a man loh a kipan amau mawhin a tawpna-ah si uh hi. Mawhna pen i nu le pa masapente’ kiang pan i  luah hi a, a kilawh thei a lauhuai natna tawh kibang hi. I vekpi-in mawhnei sa-in i suak a, tua hangin i si hi. (Rom 5:12) Ahih hang tua pen mihingte ading Pasian’ ngimna hi lo hi. Pasian in mihingte cikmah hunin a sih ding deih lo a, Lai Siangtho in sihna pen “gal” na ci hi.—1 Korin 15:26.

15. Sihna tawh kisai thuman theihna in koi bangin hong suaktasak a hiam?

¹⁵ Sihna tawh kisai thuman theihna in a man lo ngaihsutna tampite pan hong suaktasak hi. A sisate in khasiatna ahih kei leh gimna thuak nawn lo uh hi ci-in Lai Siangtho in hong hilh hi. En’ zong amau hopih thei lo a, amau in zong ei hong hopih thei lo hi. A sisate i huh thei kei a, amau zong ei hong huh thei lo hi. Amau’ hong bawlsia thei nawn lo ahih teh i lau kul nawn lo hi. Ahih hang biakna a tamzaw in a site pen mun khat peuhpeuhah nungta lai hi ci uh a, siampi ahih kei leh mi te’n misiangtho-a a ngaihsut mite kiang sum pia lehang a site i huh thei ding ci uh hi. Ahih hang sihna tawh kisai-in thuman i theih ciang tua zuau thute hangin khemna i thuak nawn kei hi.

16. Biakna a tamzaw in sihna tawh kisai bang zuauthu hilh uh a hiam?

¹⁶ Satan in ei hong khem nading biakna man lo zangin a site nungta lai uh hi, ci-a i ngaihsut nading a bawl hi. Gentehna, biakna pawlkhat in i sih khit ciang i pumpi pan a nungta lai khat om hi, ci-in hilh uh hi. Tua bangin na pawlpi in hong hilh a hiam ahih kei leh sihna tawh kisai Lai Siangtho gen bangin hong hilh uh a hiam? Satan in Jehovah kiang pan mite lam a pial nading zuau na gen lai hi.

17. Hell khuk sungah mite kikhul ding cih thuhilhna in ba’hang Jehovah Pasian gensiatna ahi hiam?

¹⁷ Biakna a tamzawte ii thuhilhna in hong linglawngsak hi. Gentehna, pawlkhat in migilote hell khuk sungah  a tawntungin kikhul ding hi, ci-in hilh uh hi. Tua zuauthu pen Jehovah gensiatna ahi hi. Pasian in tua bang danin mite gimna a thuak ding cikmah hunin phal ngei lo ding hi! (1 Johan 4:8 Sim in.) Naupang khat ii khut mei tawh halin a bawlsia mi khat pen nangh bangci muh na hiam? Tua bang mi pen a gilo mahmah mihingin ngaihsun ding hi teh. Ama thu zong thei nuam nawn kei ni teh. Tua bang mahin Jehovah pen a gilo mahmahin i ngaihsut ding Satan’ deih mahmah thu khat ahi hi!

18. A sisate ba’hang i lau ding kul lo a hiam?

¹⁸ Biakna pawlkhat in mi a sih ciang sikha suak hi ci-in hong gen uh hi. Tua pawlpite in tua sikhate pen vang a nei i lawm ahih kei leh a lauhuai i gal hong suak thei ahih manin tua sikhate i zahtak ding le i lau loh phamawh hi ci uh hi. Mi tampi-in tua zuau thu um uh hi. Amau’ misite lau-uh ahih manin Jehovah biak ding sang misite biazaw uh hi. I phawk dingah a sisate in bangmah ngaihsun thei lo, theih theihna nei nawn lo ahih manin i lau ding kul lo hi. Jehovah pen ei hong Piangsakpa ahi hi. Amah pen a man Pasian hi a, amah bek i biak ding ahi hi.—Maangmuhna 4:11.

19. Sihna tawh kisai thuman i theihna in bang thu i teltheih nading hong huh ding a hiam?

¹⁹ Sihna tawh kisai thuman i theih ciang biaknate’ zuaukhemna pan hong suaktasak hi. Tua banah i nuntakna le i mailam tawh kisai-in Jehovah hong bawlsak ding a lamdang mahmah kamciamte i teltheih nading tua thuman in hong huh ding hi.

20. A zom khenpi-ah bang thu sin ding ihi hiam?

²⁰ A beisa kum tampi lai-in Pasian sila ahi Job in: “Mi a sih ciang, a hingkik thei ding hiam?” ci hi. (Job 14:14, NW) A sisa mi khat hong hingkik ding cih pen hi thei takpi ding hiam? Lai Siangtho sunga Pasian hong dawnkikna pen thalawphuai mahmah hi. Tua thu pen a zom khenpi-ah i mu ding hi.