1, 2. (a) Mi minthang khat a min na theih bek tawh ama thu teltakin thei cihna maw? Na gen thei diam? (b) Jesuh tawh kisai mi te’n bangci up uh hiam?

LEITUNGAH mi minthang tampi tak om hi. Tua a minthang pawlkhat ii min zong theikha ni teh. Ahih hang a min na theih bek tawh ama thu tel takin thei cihna hilo hi. Amah koi bang mi hi a, ama nuntakna a them a nengin na theih ding kul cihna zong hi tuan lo hi.

² Jesuh Khrih thu za ngei ding hi teh, tuma kum 2,000 lai-in leitungah na nungta ngei hi. Ahi zongin mi a tamzaw in Jesuh pen koi bang mi hi takpi hiam cih thei lo uh hi. Pawlkhat in mihoih khat, pawlkhatin kamsang, pawlkhat in Pasian hi ci-in um uh hi. Nang e le kua hi-in na um aa?—A Nunga Ciaptehna 12 en in.

3. Jehovah Pasian le Jesuh Khrih na theih ding nang ading ba’hang thupi mahmah a hiam?

³ Jesuh tawh kisai thuman na theih ding thupi hi. Ba’hang hiam? Lai Siangtho in: “Nang bek a man Pasian na hihna thu le nangmah in na hong sawl Jesuh Khrih hong theihna pen amaute adingin nuntak tawntung ngah nading lampi ahi hi,” ci-in na gen hi. (Johan 17:3) Jehovah le Jesuh tawh kisai thuman na theih leh leitung paradais-ah a tawntungin na nungta ding hi. (Johan 14:6) Jesuh thu theihna in zong nang hong huh thei hi. Ba’hang hiam cih leh koici nuntak ding, midangte tawh koici kizop ding cih tawh kisai-in Jesuh pen a etteh huaipen ahi hi. (Johan 13:34, 35) Khenpi 1 na-ah Pasian tawh kisai thuman i sin khin hi. Tu’n Lai  Siangtho in Jesuh tawh kisai bang thu hong hilh hiam cih sin ni.

4. “Messiah” le “Khrih” cih kammalte ii a khiatna bang a hiam?

⁴ Jesuh hong suahma kum tampi lai-in Jehovah in Messiah ahih kei leh Khrih ka sawl ding hi ci-in Lai Siangtho sungah na kamciam khin hi. “Messiah” a cih kammal pen Hebru kampau pan hi a, “Khrih” cih kammal pen Grik kampau pan ahi hi. Hih kammal gelin kamciam Messiah pen Pasian in teelin a thupi za khat pia ding cihna hi. Messiah in Pasian kamciam khempeuh hong tangtungsak ding hi. Tu hunin zong Jesuh in nang hong huh thei hi. Ahih hang Jesuh hong suah ma-in mi tampi in ‘Messiah pen kua ahi tam?’ ci-in thei nuam uh hi.

5. Jesuh pen Messiah hi cih a nungzui te’n a um uh hiam?

⁵ Jesuh’ nungzuite in Jesuh pen kamciam Messiah hi cih na muanglah lo uh hi. (Johan 1:41) Gentehna, Simon Peter in Jesuh kiang: “Nang pen . . . Khrih na hi hi,” a ci hi. (Matthai 16:16) Jesuh pen Messiah hi cih en’ koici theih ding ihi hiam?

6. Lungsim hoih mite’n Messiah a theih nading Jehovah in koi bangin na huh hiam?

⁶ Jesuh hong suahma kum sawtpi lai-in mite’n Messiah a zon theih nading Pasian’ kamsangte in ama thu tampi na at uh hi. Tua in bangci hong huh thei ding a hiam? Na muh ngei loh mi khat mi tam mahmahna mawtaw khawlna phualpi-ah a vadawn dingin kingaihsun in. Tua mi tawh kisai lim takin a mel dan hong kigen cian leh mubaih ding hi teh. Tua mah bangin Jehovah in Messiah in bang sem ding, ama tungah bang piang ding cihte hong gen dingin a kamsangte na zang hi. Tua genkholhnate khempeuh a tangtunna in  lungsim hoih mi te’n Jesuh pen Messiah hi cih a theih nading na huh hi.

7. Jesuh pen Messiah hi cih a kiciatna genkholhna nam nihin bang a hiam?

⁷ Tua genkholhnate lakpan nih hih lai-ah na mu ding hi. Khatna-ah, Jesuh suahma kum 700 lai-in Mikah in Messiah pen Bethlehem khuaneu-ah suak ding hi ci-in na genkhol hi. (Mikah 5:2) Tua mun mahah Jesuh suak hi! (Matthai 2:1, 3-9) A nihna-ah, Daniel in C.E 29 kumin Messiah hong kilang ding na ci hi. (Daniel 9:25) Genkholhna tampi lakah hih nihin Jesuh pen kamciam Messiah hi cih na kiciansak hi.—A Nunga Ciaptehna 13 en in.

8, 9. Jesuh tui a kiphum lai-in Messiah ahihlam a kiciansak ding bang thu piang hiam?

⁸ Jehovah in Jesuh pen Messiah hi cih siang takin na kitheisak hi. Pasian in Tuiphumpa Johan kiangah Messiah pen kua hiam cih a kitheih nading lim khat kong pia ding hi ci-in na kamciam hi. C.E 29 kumin Jordan gunah Johan kiang Jesuh tui kiphum dingin a pai lai-in Johan in tua lim na mu hi. Bang thu piang hiam cih Lai Siangtho in: “Jesuh a kituiphum khit phetin tui sung panin a paikhia pah hi. Tua lai takin vantung hong kihong a, vakhu bangin Pasian’ kha siangtho hong kumsukin ama tungah a khawl a mu hi. Tua sung mahin vantung panin aw khat hong ging a, ‘Hih pen ka it mahmah ka Tapa hi a, ama tungah ka lungkim mahmah hi,’” ci-in hong gen hi. (Matthai 3:16, 17) Johan in tua thupiang  mu a, awging a zak khit ciang Jesuh pen Messiah hi cih a thei hi. (Johan 1:32-34) Tua ni mahin Jehovah in ama kha siangtho buak ahih manin Jesuh pen Messiah hong suak hi. Amah pen Pasian in Makai le Kumpi dingin teel hi.—Isaiah 55:4.

⁹ Lai Siangtho genkholhna, Jehovah ii kammalte le Jesuh tui a kiphum lai-a Pasian in a lah limte in Jesuh pen Messiah hi cih kiciansak hi. Tua bang ahih leh Jesuh  koipan hong pai a hiam? Amah koi bang mi ahi hiam? cih thu Lai Siangtho genna en ni.

10. Jesuh leitungah hong pai ma, a nuntakna tawh kisai Lai Siangtho in bang hong hilh a hiam?

¹⁰ Jesuh leitung hong pai ma, hun sawt pekin vantungah teng hi ci-in Lai Siangtho in hong hilh hi. Mikah in Messiah pen “tangtawng pek” pan hi ci-in gen hi. (Mikah 5:2) Mihingin hong suah ma, vantungah a tenna thu Jesuh in tamveipi na gen hi. (Johan 3:13; 6:38, 62; 17:4, 5 Sim in.) Jesuh hih leitungah hong pai ma, Jehovah tawh a manpha mahmah kizopna hoih nei hi.

11. Jesuh pen Jehovah ading ba’hang manpha mahmah a hiam?

¹¹ Jesuh pen Jehovah ading manpha mahmah hi. Ba’hangin maw? Ahang pen Pasian in na khempeuh le a nungta kuamahpeuh a bawl ma-in amah na bawl hi. Tua ahih manin Jesuh pen “a kipiangsak khempeuh lakah tapa upa pen” ki ci hi. * (Kolose 1:15) Jesuh pen Jehovah ading a dang khatin zong na manpha mahmah hi. Ahang pen Jehovah in ama khut tawh a bawl lian amah bek om hi. Tua ahih manin Pasian in amah pen “Tapa neihsun” na ci hi. (Johan 3:16) Jehovah in a dang na khempeuh a piansak ciang Jesuh bek na zang hi. (Kolose 1:16) Jesuh bek “Thu” kici hi. Ahang pen Jehovah in vantung mite le mihingte kiang thu vapuak ding le thuhilh dingin amah zang hi.—Johan 1:14.

12. Jesuh le Pasian a kibat lohna en’ koici theih ihi hiam?

¹² Mi pawlkhatin Jesuh le Pasian pen kibang hi ci-in um uh hi. Ahih hang tua pen Lai Siangtho hilhna  na hilo hi. Lai Siangtho in Jesuh pen kipiangsak hi ci hi. A cihnopna-ah Jesuh in kipatna nei cihna hi. Ahih hang Jehovah pen na khempeuh a bawl pa hi a, amah in kipatna nei lo hi. (Late 90:2) Pasian tapa ahih mah bangin Jesuh in cikmah hunin Pasian tawh kibat ding ngaihsun ngei lo hi. Tapa sangin Pa lianzaw hi ci-in Lai Siangtho in kician takin hong hilh hi. (Johan 14:28 Sim in; 1 Korin 11:3) Jehovah bek “Vanglian Pasian” ahi hi. (Piancilna 17:1) Amah bek khuavannuai-ah a lianpen le a thahat pen Pa ahi hi.—A Nunga Ciaptehna 14 en in.

13. Jesuh pen “a kimu thei lo Pasian’ lim” ci-in Lai Siangtho in ba’hang gen hiam?

¹³ Van le lei a kibawl mapek lai-a kipan Jehovah le a Tapa Jesuh pen kum awn tampi kilungtuak takin na semkhawm uh hi. Khatlekhat na ki-it mahmah uh hi. (Johan 3:35; 14:31) Jesuh in a pa ii hoihnate etteh ahih manin Lai Siangtho in “a kimu thei lo Pasian’ lim” ci hi.—Kolose 1:15.

14. Jehovah ii a manpha mahmah a Tapa pen mihing khatin koi bangin hong suak thei a hiam?

¹⁴ Jehovah ii a manpha mahmah a Tapa in lungkim takin vantung pan paikhia-in mihing khatin leitungah hong suak hi. Tua pen koi bangin piang thei ding ahi hiam? Jehovah in vantunga a Tapa’ nuntakna pen Mary min a nei nungak siangtho ii naubu sungah lamdang takin na tuah hi. Tua bang dan ahih teh Jesuh in pa mihing kisam lo hi. Tua ahih manin Mary in a cingtaak tapa hong nei a, a min dingin Jesuh a phuak hi.—Luka 1:30-35.

15. Jehovah thu na theih semsem na’ng bang na sep kul hiam?

¹⁵ Lai Siangtho sunga Matthai, Marka, Luka le Johan laibute na simna pan Jesuh thu, a nuntakna le a hoihna  tampi sin thei ding hi teh. Hih laibute pen Lungdamna Thu zong ki ci hi. Tua thute na sim leh Jehovah thu hong theih behsak ding hi. Ahang pen Jesuh in a Pa sun ahih man hi. Tua ahih manin Jesuh in: ‘Kei a hong mu khinte in Pa a mu khin hi’ ci-in gen hi.—Johan 14:9.

16. Jesuh in bang thu hilh a hiam? Jesuh ii thuhilhte kua kiang pan a hiam?

¹⁶ Mi tampi in Jesuh pen “Sia” ci-in sam uh hi. (Johan 1:38; 13:13) Ama thuhilh lakpan a thupipen khat in “vantung ki-ukna hangin lungdamna thu” ahi hi. Vantung ki-ukna a cih in bang a hiam? Tua pen Pasian gam ki-ukna hi a, vantung pan leitung khempeuh ukin Pasian thu a mang mite thupha ngahsak ding hi. (Matthai 4:23) Jesuh ii thuhilhna khempeuh Jehovah kiang pan ahi hi. Jesuh in: “Ka thugente pen keima thu hi lo a, kei a hong sawl Pasian kiang panin a hong pai thu ahi hi,” ci hi. (Johan 7:16) Pasian Gam in leitung bup uk ding cih tua a lungdamhuai thu mi te’n a zak ding Jehovah in deih hi cih Jesuh in thei hi.

17. Jesuh in koi mun tengah thu hilh a hiam? Midangte kiang thuhilh ding Jesuh in ba’hang hizah takin hanciam a hiam?

¹⁷ Jesuh in koi mun tengah thu hilh a hiam? Mi a muhna mun khempeuhah thu a hilh hi. Khuapi, khuaneu, van kizuakna, kikhopna mun, mi innte le khuakiim khuapamte-ah zong thu na hilh hi. Ama kiang mite hong zuat ding lamen lo hi. Mite kiang vapai denzaw hi. (Marka 6:56; Luka 19:5, 6) Jesuh in hun le thatang khempeuh piakhia-in hanciam takin thu hilh hi. Ba’hang hiam? Tua bangin a sep ding Pasian in deih hi cih thei ahih man le a tawntungin a Pa thu mang ahih man hi. (Johan 8:28, 29) Jesuh mahmah in zong mite hehpih ahih manin thu a hilh ahi hi. (Matthai 9:35, 36 Sim in.) Biakna makaite in Pasian Gam le Pasian tawh kisai thuman a hilh lohna uh Jesuh in mu hi. Tua ahih  manin a lungdamhuai thu mi a tam theithei-in a zak theih nadingun Jesuh in na huh nuam hi.

18. Jesuh ii hoihnate lakpan bang deihpen na hiam?

¹⁸ Jesuh pen mite a it, a don pasal khat ahi hi. Amah pen lungduai-in hopih nuam hi. Naupangte nangawn amah tawh om ding ut uh hi. (Marka 10:13-16) Jesuh pen a tawntungin thuman hi. Thumanlohna le guk neknate mudah hi. (Matthai 21:12, 13) Numeite kizahtak bawl loin a kithusim khol loh hun lai-in Jesuh nungta hi. Ahih hang Jesuh in numeite zahtakin thupibawl tawntung hi. (Johan 4:9, 27) Jesuh pen kiniamkhiat takpi hi. Gentehna, nitak khat, a nungzuite’ khe na silsak hi. Hih banga a sep pen sila khat ii nasep ahi hi.—Johan 13:2-5, 12-17.

19. Jesuh in mite kisap takpi bang hiam cih thei-in mite huh nuam hi cih bang thupiang om hiam?

¹⁹ Jesuh in mite a kisap taktak bang hiam cih thei-in amau na huh nuam hi. Tua pen Pasian’ vang zanga mi a damsak ciang hong kilang hi. (Matthai 14:14) Gentehna, miphak khat Jesuh kiang hong pai-in: “Hong damsak nuam peuh lecin nong damsak thei ding hi,” ci hi. Tua pa ii natna le a gimna in Jesuh ii lungsim na khoih hi. Tua pa tung a lung nuam loin na huh nuam hi. Tua khit teh Jesuh in a khut zanin tua pa lawng a: “Nang kong damsak nuam hi” a ci hi. Cina pa hong dam pah hi! (Marka 1:40-42) Tua pa ii lungdam dan ding na mitkha tawh na mu thei hiam?

20, 21. Jesuh pen Pasian tungah a thumang, a hoihpen etteh ding lim ba’hang na hi a hiam?

²⁰ Jesuh pen Pasian tungah a thumang, a etteh huaipen ahi hi. Ama tungah bang thu a piang zongin ahih kei leh a galte in bangbang a bawl zongin a Pa’ tungah  citak hi. Gentehna, Satan in hanciamin a ze-et ciang zong Jesuh na mawh baang lo hi. (Matthai 4:1-11) Jesuh ii sanggam pawlkhat in amah Messiah hi cih um lo uh a, Jesuh “mihai suakta” na ci uh hi. Ahih hang Jesuh in Pasian’ na na sem veve hi. (Marka 3:21) A galte in nasia takin a bawlsiat hangin Jesuh pen Pasian tungah na citak suakin cikmah hunin thukkik ding na hanciam lo hi.—1 Peter 2:21-23.

²¹ Jesuh in nasia takin bawlsiatna thuakin a sih dongin gimna a thuak hang Jehovah tung na citak hi. (Filippi 2:8 Sim in.) Tua a sihni-in a thuakzawhna na mitkha tawh na mu thei hiam. A mah kimanin a man lo tecite ii mawhsakna, a thuman lo thukhente ii mawhsaka thukhenna, mihonte ii zahpihna le galkapte bawlsiatna  thuakin sing khuamah sik tawh khen uh hi. A sih ma deuhin: “Man khinta hi,” ci-in na gen hi. (Johan 19:30) Jesuh a sih khit ni thum a phak ciang Jehovah in hingkiksak a, kha pumpi a pia hi. (1 Peter 3:18) Tua zawh ni 40 khit ciang Jesuh vantungah kahkik a, “Pasian’ taklam ah tu” in Pasian in Kumpi za a piak ding hun na ngak hi.—Hebru 10:12, 13.

22. Jesuh in a Pa tungah citak ahih manin tu-in en’ bang hunpha ngah i hiam?

²² Jesuh in a Pa tungah citakin a kip suakna hangin Jehovah ngimna ahi leitung Paradais-ah a tawntunga i nuntak theih nading hunpha tu’n i nei hi. A zom khenpi-ah Jesuh sihna in a tawntunga i nuntak theih nading hong bawlsak theihna i sin ding hi.