1, 2. (a) Letsong khat pen bang hun ciang nang ading manpha a hiam? (b) Tatkhiatna pen Pasian hong piak a manpha pen letsong ba’hang hi a hiam?

LETSONG na ngah khempeuh lakpan a manpha pen letsong in bang a hiam? Nang ading a manpha pen letsong ahih nading a tamman pen ahih ding kisam lo hi. Tua letsong in nang hong lungnuam sak ahih kei leh nang ading na kisap takpi na khat hileh tua letsong tung lungdam mahmah ding hi teh.

² Letsong khempeuh pen Pasian hong piak hi a, tuate laka letsong khat pen adangte sangin i kisap pen ahi hi. Tua pen mihingte ading Pasian hong piak a manpha pen letsong hi. Hih khenpi sungah Jehovah in a Tapa Jesuh Khrih hong sawlna i sin ding a, tua in tawntung nuntakna hong ngahsak thei hi. (Matthai 20:28 Sim in.) Tatkhiatna pia dingin leitungah Jesuh hong sawlna pen Jehovah in ei hong it takpi hi cih hong lakkhia hi.

3. Mihingte ba’hang si uh a hiam?

³ Tatkhiatna a cih pen mawhna le sihna pan mihingte a suahtak nading Jehovah’ zat lampi ahi hi. (Efesa 1:7) Tatkhiatna ba’hang kisam hiam cih i theih nadingin tu ma kum tampi lai-a Eden huana thupiang i theih ding kisam hi. A masapen i nu le pa ahi Adam le Eve in mawhna na bawl uh hi. Mawhna hangin si uh hi. Ei zong Adam le Eve kiang pan mawhna luah ihih manin sihna i thuak hi.—A Nunga Ciaptehna 9 en in.

4. Adam pen kua hi a, ama’n bang thupha nei a hiam?

 ⁴ Jehovah in a masa pen mihing ahi, Adam a piansak lai-in a manpha mahmah na khat na pia hi. Ama’n Adam pen a cingtaak mihing nuntakna pia hi. Adam in a cingtaak lungsim le a cingtaak pumpi a nei hi. Amah cina vet lo, teek vet loin zong si vet lo ding hi. Jehovah in Adam piangsak ahih manin ama ading Pasian pen pa bang ahi hi. (Luka 3:38) Jehovah in amah hopih den hi. Pasian in Adam kiang pan a lamet bang hiam cih siangtakin gen a, lungnuam taka a sep theih ding nasep a pia hi.—Piancilna 1:28-30; 2:16, 17.

5. Lai Siangtho in Adam pen “Pasian lim bangin” kibawl a cih ciang bang a cihnopna hiam?

⁵ Adam pen “Pasian lim bangin” kibawl hi. (Piancilna 1:27) Jehovah in ama neih hoihnate zong pia a, tua sungah itna, pilna, thumanna le vangliatnate kihel hi. Pasian in Adam pen ut banga teel theihna lungsim zong na pia hi. Adam pen set milim hilo hi. Adam pen Pasian in bawl ahih teh a sia a pha teel thei hi. Pasian thu man ding Adam in teel leh Paradais-ah a tawntungin nungta ding hi.

6. Adam in Pasian thu a man loh ciang ama sup bang a hiam? Koi bangin ei hong sukha a hiam?

⁶ Pasian thu mang lo a, a sih ding thu a kikhen ciang Adam in a manpha mahmah khat na piakhia hi. Jehovah tawh a thupi diaka kizopna, a cingtaak nuntakna le a tenna Paradais cihte na taan hi. (Piancilna 3:17-19) Adam le Eve in Pasian thu man loh ding teel ahih manun lametna nei nawn lo uh hi. Adam’ thuman lohna hangin, “leitungah mawhna hong om a, tua mawhna hangin sihna hong piang hi. Mi khempeuh mawh uh ahih manin tu-a bangzia-in mi khempeuh tungah sihna hong tung hi.” (Rom 5:12) Adam in mawhna a bawl ciang amah le ei, mawhna le sihna ii sila-in a hong  “zuak” hi. (Rom 7:14, ZSV) Tua hileh ei ading lametna om lai ding maw? Om mah hi.

7, 8. Tatkhiatna a cih in bang a hiam?

⁷ Tatkhiatna a cih in bang a hiam? Tatkhiatna a cih pen a thu-in thu nam nih kihel hi. Khatna-ah, tatkhiatna pen mikhat peuhpeuh suahtak nading ahih kei leh kileikik nadinga a kipia sum manzah ahi hi. Nihna-ah, tatkhiatna in na khat peuhpeuh ii a manzah pia ahih kei leh khuhcip cihna hi.

⁸ Adam in a bawl mawhna le hong tunsak sihna ahi, tua siatna lianpi ading a man a piazo mi kuamah ki om lo hi. Ahih hang Jehovah in mawhna le sihna pan i suahtak theih nading lampi hong vaihawmsak hi. Tu’n tatkhiatna in bangci na hong sem a, tua pan phattuamna bangci ngah thei cihte sin ni.

9. Tatkhiatna thaman koi bangin kipia zo ding a hiam?

⁹ Adam in a taan a cingtaak nuntakna ading tatkhiatna a piazo ding khat beek i om kei hi. Ba’hangin maw? I vekpi-in a cingtaak lo mi ihih man hi. (Late 49:7, 8) Tatkhiatna ading a cingtaak mihing nuntakna mah piak ding kisam hi. Tua pen “a kikim tatkhiatna” a kicihna ahi hi. (1 Timoti 2:6, NW) Tatkhiatna pen Adam in a taan nuntakna tawh a manzah a kikim ding kisam hi.

10. Jehovah in tatkhiatna koi bangin hong vaihawmsak hiam?

¹⁰ Jehovah in tatkhiatna koi bangin hong vaihawmsak hiam? Jehovah in a manphapen a Tapa leitungah hong sawl hi. A Tapa Jesuh pen a piansak masapen ahi hi. (1 Johan 4:9, 10) Jesuh in a tenna vantung le a Pa kiang pan lungkim takin paikhia nuam hi. (Filippi 2:7) Jehovah in vantung pan leitungah Jesuh suankhia-in mawhna a nei lo a cingtaak mihingin Jesuh hong suak hi.—Luka 1:35.

11. Pasal khatin koi bangin mi khempeuh ading tatkhiatna pia thei a hiam?

 ¹¹ A masapen pasal Adam in Jehovah thu a man loh a kipan mi khempeuh ading a cingtaak nuntakna supsak hi. Adam tate khempeuh adingin sihna a hemkhia zo ding adang mi khat a om ding hiam? Om mah hi. (Rom 5:19 Sim in.) Jesuh in cikmah hunin mawhna bawl ngei lo a, tatkhiatna-in a cingtaak ama nuntakna a piakhia hi. (1 Korin 15:45) Adam tate khempeuh ading sihna a hepkhiatsak nading a cingtaak ama nuntakna zang ding hi.—1 Korin 15:21, 22.

12. Ba’hangin Jesuh in hizah takin gimna thuak a hiam?

¹² Lai Siangtho in Jesuh a sih ma genthei takin gimna a thuakna hong gen hi. Khauhual tawh kisatin sing khuam tungah sik tukilh tawh kikhenin damdamin na sa-in a si hi. (Johan 19:1, 16-18, 30) Ba’hangin Jesuh in hizah takin gimna thuak a hiam? Mihing te’n nakpi takin ze-etna thuak leh Pasian tung a citak khat beek om ken teh, ci-in Satan in hang takin to ahih man hi. A cingtaak mi khat in nasia takin gimna a thuak zongin Pasian tungah citak zo hi cih Jesuh in na lakkhia hi. Jesuh tung Jehovah bangzah takin kipak ding a hiam cih ngaihsun in!—Paunak 27:11; A Nunga Ciaptehna 15 en in.

13. Tatkhiatna koi bangin piakhia a hiam?

¹³ Tatkhiatna koi bangin piakhia a hiam? Jesuh in a manpha ama nuntakna a Pa kiang a pia hi. C.E. 33, Jew-te ii calendar Nisan kha 14 ni-in Jesuh pen a galte’n a thah ding Jehovah in na phal hi. (Hebru 10:10) Ni thum khit ciang Jehovah in Jesuh hingkiksak hi. Ahih hang mihingin hi loin kha pumpi-in hingkiksak hi. Tua khit teh Jesuh vantungah a Pa kiang a tunkik ciang a manpha a cingtaak ama nuntakna pen tatkhiatna-in Jehovah tung a pia hi. (Hebru 9:24) Tu’n tatkhiatna kipia khinta ahih teh mawhna le sihna pan suahtak theihna hunpha i ngahta hi.—Rom 3:23, 24 Sim in.

14, 15. I mawhna hong kimaisak nading bang i sep loh phamawh a hiam?

¹⁴ Pasian hong piak a manphapen letsong pan hamphatna i ngah khin hi. Tu hun le mai lamah en’ koi bangin hamphatna ngah ding cih en ni.

¹⁵ I mawhnate hong kimaisak. Nisimin thuman sep ding haksa hi. En’ mawhna i bawl a, khat veivei i kampau le i sepnate-ah i khial hi. (Kolose 1:13, 14) Koi bangin hong kimaisak thei ding a hiam? I sep khialh mawhna tung lungsim takpi tawh khasia a, kiniamkhiatna tawh Jehovah kiang ngen le’ng mawhmaina i ngah ding hi. Tua khit teh i mawhna hong kimaisak khin hi cih i lungmuang thei hi.—1 Johan 1:8, 9.

16. Lungsim sianthona i ngah nading bang i sep loh phamawh a hiam?

¹⁶ Lungsim sianthona kingah thei. Na khat semkhial a, mawhna nei-in lametna zong nei nawn keng, kimang nawn ke’ng ci-in i lungsim in hong gen khathei hi. Ahih hang i lungkiat ding kul lo hi. Mawhmaisak nading Jehovah kiang thu i nget leh i thungetna hong ngai-in i mawhna hong maisak ding hi cih i lungmuang thei hi. (Hebru 9:13, 14) Jehovah in i haksatnate le i thanemnate ama kiang i gen ding deih hi. (Hebru 4:14-16) Hamphatna in Pasian tawh kilemna i ngah ding hi.

17. Ei ading Jesuh a hong sih manin bang thuphate kilamen thei hiam?

¹⁷ Tawntung nuntakna lametna kinei. “Mawhna in thaman hong piak pen sihna hi a, ahi zongin i Topa Jesuh tawh i kipawl manin Pasian hong piakkhong pen nuntak tawntungna ahi hi.” (Rom 6:23) Ei adingin Jesuh a hong sih manin cidam sitsetna tawh nuamsa-in tawntung nuntakna zong i ngah thei hi.  (Maangmuhna 21:3, 4) Ahih hang tua thuphate i ngahnop leh bang i sep loh phamawh hiam?

18. Jehovah in hong it hi cih en’ koici theih ihi hiam?

¹⁸ Khat peuhpeuh in a hoih mahmah letsong khat hong piak ciang na lungsim koi bangin hong sukha hiam cih ngaihsun in. Tatkhiatna pen letsong khempeuh lakpan a manpha pen hi a, Jehovah tung nak lungdamhuai mahmah hi. Johan 3:16 in “Pasian in leitung mite hong it mahmah ahih manin . . . a Tapa neihsun a hong piak dongin a hong itna a hong lak hi” ci hi. Hi mah hi, Jehovah in ei hong it mahmah ahih manin a manpha mahmah a Tapa, Jesuh hong pia hi. Jesuh in zong ei ading a nuntakna lungkim takin hong piakhia nuam ahih manin ei hong it hi cih i thei hi. (Johan 15:13) Jehovah le Jesuh in nang hong it takpi hi cih tatkhiatna letsong in hong lungmuangsak ding hi.—Galati 2:20.

19, 20. (a) Jehovah’ lawm koici suak thei ding na hiam? (b) Jesuh’ piakkhiat tatkhiatna pen sang na hihlam nangh koici lakkhia ding na hiam?

¹⁹ Tu’n a lian mahmah Pasian’ itna thu na sin khin a, ama lawm koici suak thei ding na hiam? I theih ngeiloh khat it ding cih pen haksa hi. Johan 17:3 in Jehovah thu i theithei ding hi ci hi. Tua bangin na theih nadinga na sep leh amah na itna hong thuk zaw-in ama deihbang na sem nuam ding a, tua khit teh ama lawm na suak ding hi. Tua ahih manin Lai Siangtho sinna pan Jehovah thu na sin suak in.—1 Johan 5:3.

²⁰ Jesuh’ piakkhiat tatkhiatna na sang in. Lai Siangtho in “Tapa a um mi peuhmah nungta tawntung ding” hi ci hi. (Johan 3:36) Upna lak in, a cih ciang bang a cihnopna hiam? Jesuh hong hilh banga i sep ding cihna hi. (Johan 13:15) Jesuh ka um hi ci-a genziau tawh kingah  lo hi. Tatkhiatna sang ihih leh i upna tawh kizui-in na i sep loh phamawh hi. James 2:26 ah, “Sepna tawh a kizom lo upna zong a si ahi hi,” ci-in i sim hi.

21, 22. (a) Kum sima Khrih Sih Phawkna Pawi-ah ba’hang na kikhop ding kul hiam? (b) Khenpi 6 le 7ah bang thu sin ding ihi hiam?

²¹ Khrih’ Sih Phawkna Pawi-ah na kikhawm in. Jesuh a sihma nitakin ama sih phawkna pawi i bawl ding hong hilh hi. Tua pen kum simin kibawl a, Phawkna Pawi ahih kei leh “Topa Nitak Nekkhawm Pawi” zong ki ci hi. (1 Korin 11:20, NW; Matthai 26:26-28) Jesuh in a cingtaak ama nuntakna pen ei ading tatkhiatna-in hong piakkhiatna pen i phawk ding deih hi. Ama’n: “Keimah nong phawk nadingun na ne un,” ci hi. (Luka 22:19 Sim in.) Phawkna pawi-ah na kikhop pen Jehovah le Jesuh te ii itna lianpi le tatkhiatna na phawk lam, a lak na hi hi.—A Nunga Ciaptehna 16 en in.

²² Tatkhiatna pen i ngah letsong khempeuh lakpan a manphapen ahi hi. (2 Korin 9:14, 15) Tua a manpha letsong in a si khinsa mi awn tampite nangawn zong thupha na ngahsak ding hi. Tua pen koi bangin hong piang thei ding hiam cih khenpi 6 le 7 ah i sin ding hi.