1. Mailam hun tawh kisai koi-ah sin thei ding ihi hiam?

LEITUNG thupiangte ngai a, na et ciang, ‘Na khempeuh tu-a sang sia semsem lai ding maw’ ci-in na ngaihsun kha hiam? Thusia lasia le hiamtatnate hong tam semsem ahih manin mi pawlkhat in hih leitung bei kuanta-in um uh hi. Tua pen man takpi ding maw? Mailam huna thupiang dingte i theih nading dan a om tam maw? Om mah hi. Mihing te’n mailam thupiang ding i genkholh theih loh hang Jehovah Pasian in genkhol thei hi. Ama’n leitung le ei ii mailam thute Lai Siangtho sungah na gen hi.—Isaiah 46:10; James 4:14.

2, 3. Jesuh’ nungzui te’n bang thu theinuam uh a, Jesuh in koici dawng a hiam?

² Leitung beina thu Lai Siangtho sungah i sim ciang hih i tenna Leitung beina hi loin, siatnate a beina a cihnopna ahi hi. Pasian Gam in hih leitung hong uk ding hi ci-in Jesuh in mite na hilh hi. (Luka 4:43) A nungzui te’n Pasian Gam hong pai ding hun theinuam uh ahih teh Jesuh kiang: “Hih thute cik ciangin hong piang ding a, nang na hong pai ding hun le hun bei nading bang lim hong om ding ahi hiam, hong gen in,” ci-in dong uh hi. (Matthai 24:3) Jesuh in a ni lian a gen loh hang hih leitung bei ma-a thupiang dingte na gen hi. Jesuh in a gen thupiang dingte tu’n hong piang takpi hi.

³ Hih khenpi sungah leitung a bei madeuh hun sungah i nuntak lam a kiciatna thu i sin ding hi. Amasa-in vantunga a piang gal kidona thu i sin ding kisam hi. Tua hileh hih leitungah siatna ba’hang hihzah takin tam hiam cih i tel ding hi.

4, 5. (a) Jesuh Kumpi a suahzawh a sawt loin vantungah bang thu piang hiam? (b) Maangmuhna 12:12 ah a gen mah bangin Satan a kilawtkhiat khit ciang leitungah bang thu piang a hiam?

⁴ Khenpi 8 ah 1914 kumin vantungah Jesuh Kumpi a suahna thu i sin khin hi. (Daniel 7:13, 14) Maangmuhna laibu in: “Vantungah gal kidona hong om a, Mikhael [Jesuh] le a vantung mite in gulpi [Satan] le a vantung mite a do uh hi,” ci-in a thupiang hong gen hi. * Satan le ama dawite in gallelin leitungah hong kilawnkhia suk hi. Vantung mite lungdamna na mitkha tawh na mu thei hiam! Ahih hang leitunga a teng mihingte e le bangci uh a hiam? Lai Siangtho in mihingte ading gentheihna hun hi ding ci-in gen hi. Ba’hangin maw? Ahang pen Dawimangpa in “hun tomno bek a neilai ahihlam thei” ahih teh nak heh mahmah ahih man hi.—Maangmuhna 12:7, 9, 12.

⁵ Dawimangpa in leitung pen ahih theih zahin a siasak hi. Pasian in a hepkhiat ding hun a tun ma, hun tomno bek nei ahih manin nak heh mahmah hi. Jesuh’ gen nitawp ni hun sunga thupiang dingte tu’n en ni.—A Nunga Ciaptehna 24 en in.

6, 7. Tu hun-a kialpi le gal kidonate tawh kisai bang gen thei i hiam?

⁶ Gal kidona. Jesuh in: “Gam khat le gam khat, kumpi khat le kumpi khat hong kido ding,” ci hi. (Matthai 24:7) Mihing tangthu en le’ng nidang lai sangin ei hunah gal kidona hangin a si tamzaw hi. Leitung Encikte ii ciaptehna khat sungah kum 1914 kum a kipan gal kidona-ah mi awn 100 val kithat hi, ci hi. Kum 1,900 kum ma-in gal kidona hangin a kithat mi phazah sangin kum  1900 le 2000 kikal kum 100 sunga gal kidona hangin a kithat mi a zah thumin tamzaw hi. Gal kidona hangin mi awn tampite ii lunggimna le a thuak lungsim natnate ngaihsun in!

⁷ Kialpi. Jesuh in: ‘Mun tuamtuamah kialpi hong tung ding,’ ci hi. (Matthai 24:7) An nek tuidawn ding nidang sangin a kithoh khia a tamzawk hang an a kham-un a nekha lo mi tampi na om veve hi. Ba’hang ahi tam? An ciing nading lo ahih kei leh an lei nading sum a kicingin nei lo uh ahih man hi. Leitungah mi awn tampi pen ni tha dollar pek khat sang a tawmzaw tawh nungta uh hi. The World Health Organization-in kum simin leitungah naupang awn tampi si hi ci a, ahang pen a cidam suak nadingun an a kicingin nek ding nei lo ahih man uh hi, na ci hi.

8, 9. Zinlinna le natna tawh kisai Jesuh’ genkholhna tangtung takpi hi cih bangin na lak hiam?

⁸ Zinlinna. Jesuh in: ‘Mun khempeuhah nakpitakin zin hong ling ding hi,’ ci-in na genkhol hi. (Luka 21:11) A thakhauh mahmah zinlinnate kum simin hong piang thei hi ci-in kilamen ta hi. Kum 1900 a kipan zinlinna  hangin mi awn nih val si khinta hi. Set lama mi siamte huhna tawh zinlin ding nidang sangin a kitheihkholh hang zinlinna hangin mi tampi na si veve lai hi.

⁹ Natna. Jesuh in “pulnatna” zong hong piang ding hi ci-in genkhol hi. Natna lauhuaite manlang takin kilawhin mi tampi sisak hi. (Luka 21:11) Siavuante in natna tuamtuam a damsak theih nading a muhkhiat uh hang mite cina lai veve uh a, tua natnate kidam siangsak thei lo hi. Tua banah leitung thu ciaptehna khatah kum simin T.B. natna, malaria natna le sungtholh natnate hangin mi awn tampi si hi, ci-in gen hi. Tua bek tham loh siavuante in a kilawh thei natna a thak 30 bang mukhia uh a, natna pawlkhatte a damsak theih nading zatui om nai lo hi.

10. 2 Timoti 3:1-5 pen tu hunah koi bangin hong tangtung takpi hiam?

¹⁰ Lai Siangtho in 2 Timoti 3:1-5 ah: “Nitawp ni hun pen a lauhuai hun ahih ding lamtak phawk in,” ci hi. Nitawp ni hun sunga mi tampite ii gamtat zia  sawltak Paul in hong hilh hi. Paul in mite hih bangin na ci hi,

• angsung bek a en

• sum bek a it

• nu le pa thu a mang nuam lo

• a citak lo

• innkuanpihte a it lo

• kidop zawhna a nei lo

• gilo-in a hiamtat

• Pasian sangin pumpi nopsakna a itzaw

• Pasian a it tawh a kibat uh hang ama thu man ding a nialte hi ding uh hi.

11. Late 92:6-8 a, a gen bangin migilote tungah bang thu piang ding a hiam?

¹¹ Na tenna mun na kiim na pama om mite tua bangin a gamta uh naa? Leitung munkimah mi tampi in tua bangin gamta uh hi. Ahih hang Pasian in a sawt loin na khat hong sepsak ding hi. Ama’n: “Migilote, lopa bangin selkhia-in, siatna bawl khempeuh a pun mahmah hangun, a tawntungin siatna [ahih kei leh, suksiat] a thuak ding uh ahi hi,” ci-in kamciam hi.—Late 92:6-8.

12, 13. Nitawp ni hun thu Jehovah in bang hong hilh a hiam?

¹² Lai Siangtho in nitawp ni hun sungin leitungah lunggimna le gentheih haksatnate kidim ding hi, ci-in na genkhol hi. Ahih hang Lai Siangtho in thuhoihte zong hong piang ding hi na ci hi.

¹³ Lai Siangtho theihtelna. Kamsang Daniel in nitawp ni tawh kisai thu na at hi. Ama’n: “Mipilte in theihtel theihna a nei ding uh hi,” ci hi. (Daniel 12:9, 10) Pasian mi te’n ni dang sangin Lai Siangtho siang takin a teltheih nading Pasian in theihtelna lungsim na pia ding hi. A diakin kum 1914 a kipan Jehovah in tua pen na pia hi. Gentehna, ama min a thupina, leitung ading ama ngimna, tatkhiatna tawh kisai thuman, i sih khit ciang bang piang i hiam cih thute le thawhkikna thute hong hilh hi. Pasian Gam bek in i haksatnate khempeuh hong siangsak thei hi cih pen i sin khin hi. Tua khit teh Pasian deihna bangin koici nuntak ding cih le lungnopna koici ngah thei ding cih zong i sinkhin hi. Ahih hang Pasian nasem te’n a sin thute tawh kizui-in bang sem uh hiam? Tua thu pen a dang genkholhna in hong thei sak ding hi.—A Nunga Ciaptehna 21 le 25 en in.

14. Pasian’ hong ukna hangin a lungdamhuai thu koi munah kitangko a, kuate in tangko uh hiam?

¹⁴ Leitung bup tangko nasepna. Nitawp ni hun tawh kisai a gen ciang Jesuh in: “Pasian’ hong ukna hangin a lungdamhuai thu, leitung khempeuhah kihilh ding hi,” ci hi. (Matthai 24:3, 14) Pasian’ hong ukna hangin a lungdamhuai thu pen gam 230 val le kampau nam 700 val tawh kitangko ta hi. Hi mah hi, leitung bupa om “mi namkim, pau namkim” pana Jehovah Tecite in Pasian Gam pen bang hi a, mihingte ading bang hong bawlsak ding hiam cih mite in a theih nading na  huh uh hi. (Maangmuhna 7:9) Amau thaman la loin kipiakhia uh hi. Jesuh in a genkholh mah bangin muhdahna le bawlsiatna tampi a thuak uh hang tangko nasep pen bangmah in na khaktan zo lo hi.—Luka 21:17.

15. (a) Nitawp ni hun sungah a nungta ihihlam na um hiam? Ba’hang um na hiam? (b) Pasian thu a mangte le a mang lo mite tungah bang thu piang ding hiam?

¹⁵ Nitawp ni hun sungah i nuntak lam na um hiam? Nitawp ni tawh kisai Lai Siangtho genkholhna tampi hong tangtung takpi hi. A sawt loin Jehovah in lungdamna thu tangko nasepna pen khawlsak tading a, tua khit ciang “beina” hong tung ding hi. (Matthai 24:14) Beina a cih in bang a hiam? Tua pen Pasian in gitlohna khempeuh a hepkhiat ding hun Armageddon a cihna ahi hi. Jehovah in ama thu le a Tapa thu man ding a nial kuamapeuh a susia dingin Jesuh le a vanglian vangtung mite a zang ding hi. (2 Thesalonika 1:6-9) Tua khit teh Satan le ama dawite in mite khem nawn lo ding uh hi. Tua ciang Pasian thu a mang nuam mite le ama Gam a sang mite khempeuh in Pasian kamciam a tangtunna a mu ding uh hi.—Maangmuhna 20:1-3; 21:3-5.

16. Hun bei ding nai mahmah ta ahih teh bang nasep ding kisam a hiam?

¹⁶ Hih leitung a uk Satan ukna pen a sawt loin bei tading hi. Tua ahih manin ‘Bang ka sep ding kul hiam?’ ci-in ei le ei i kidot ding thupi mahmah hi. Jehovah in Lai Siangtho pen na sintheih zah a na sin ding hong deihsak hi. Lai Siangtho pen thupi ngaihsutna tawh na sin ding kisam hi. (Johan 17:3) Mi te’n Lai Siangtho a teltheih nadingin Jehovah Tecite in kalsimin kikhopna nei uh hi. Tua kikhopna-ah na kikhop den ding hanciam in. (Hebru 10:24, 25 Sim in.) Kikhel ding na kisap lam, thu na sin khak leh tua banga na kikhel ding lau  kei in. Tua bangin na kikhel leh Jehovah tawh na kilawmtakna hong kip ding hi.—James 4:8.

17. Nitawp ni hong tun ciang mi a tamzaw in ba’hang lamdangsa ding uh a hiam?

¹⁷ Sawltak Paul in gitlohna a kisuksiat hun ding pen “zan a gutate bangin” mi a tamzaw ii up mawh loh lai takin hong tung ding hi ci-in gen hi. (1 Thesalonika 5:2) Nitawp ni hun sungah nungta ihihlam hong lak ciaptehnate mi a tamzaw in awlmawh lo ding uh hi ci-in Jesuh in na genkhol hi. Ama’n: “Noah hun lai-in up hun lohpi khatin tuiciin a tun bangin Mihing tapa [ahih kei leh, nitawp ni hun] zong up hun lohpi khatin hong pai ding hi. Tuiciin a tun ma hunin, teembaw sungah Noah a tum ni ciang dong, mite in anne zune in om uh a, mo kipi, mo kikha-in nuntak ngeina bangin om uh hi. Tuiciin hong tungin tui in mi khempeuh a tupcip hun ciang dong, kuamah in bangmah a theih loh mah bangin Mihing Tapa hong pai ciangin zong kuamah in theikhol lo ding uh hi,” ci hi.—Matthai 24:37-39.

18. Jesuh in i kidop ding bang thu hong hilh a hiam?

¹⁸ Jesuh in “Zune anne le leitung nuntakna lunghimawhin thamang kei un,” ci-in i kidop ding hong gen hi. Ama’n nitawp ni pen, “thang kisai bangin” thakhat thu-in hong tung ding ci hi. “Leitung mi khempeuh tungah hih thu hong piangvat ding hi,” ci-in zong gen hi. Tua khit teh ama’n: “Hih thupiang khempeuh thuakzawh nading thahatna na neih nading uh, le Mihing Tapa mai-ah na din theih nadingun a tawntungin thu ngenin vil niloh un,” ci hi. (Luka 21:34-36) I kidop ding Jesuh in thu hong hilhna i ngaih ding ba’hang thupi mahmah a hiam? A hang pen siatna tawh a kidim Satan’ leitung a kisuksiat ding hun nai mahmah ta ahih man hi. Jehovah le Jesuh ii maipha a ngah mite bek a tawpna-ah hotkhiatna ngahin leitung thakah a tawntungin nungta ding uh hi.—Johan 3:16; 2 Peter 3:13.