1. Mihingte ading Pasian ngimna in bang a hiam?

PASIAN in mihingte ading a hoih mahmah ngimna nei hi. A et lawm huan sungah a teng dingin a masapen pasal le numei ahi Adam le Eve na bawl hi. Pasian in amau ta nei-in leitung bup paradais suaksakin ganhingte kem a, a cin ding ngimna nei hi.—Piancilna 1:28; 2:8, 9, 15; A Nunga Ciaptehna 6 en in.

2. (a) Pasian in ngimna a neih mah bangin sem ding hi cih koici theih ihi hiam? (b) A tawntunga nuntak ding tawh kisai Lai Siangtho in bang gen hiam?

² Paradais-ah a nungta dingin na kingaihsun ngei hiam? Jehovah in: “Ka geel khin a, ka sem ding hi,” ci-in hong gen hi. (Isaiah 46:9-11; 55:11) Ngimna a neih mah bangin sem ding a, kuamah in khaktan zo lo ding hi. Jehovah in leitung a piansakna thu ahang om hi ci-in gen hi. Ama’n “a awngthawl dingin bawl loin” ci hi. (Isaiah 45:18) Leitung mun khempeuhah mihingte a ten ding deih hi. Pasian in koi bang mite hih leitungah teng sak nuam a, kum bangzah nungtasak nuam hiam? Lai Siangtho in: “Thuman mi in leitung luah ding a, tua leitang tungah teng paisuak ding hi,” na ci hi.—Late 37:29; Maangmuhna 21:3, 4.

3. Tu-in mihingte cina-in si ahih teh nangh bang thu na dong nuam aa?

³ Ahih hang tu-in mite cina-in si uh hi. Mun tampi-ah mite khatlekhat kilai-in kithat uh hi. Hih pen Pasian ngimna hi lo hi cih kician hi. Tua ahih leh bang thu piang a, ba’hangin tua thute piang a hiam? Lai Siangtho bek in hong hilhcian zo hi.

4, 5. (a) Eden huanah gul zangin Eve a hopih pen kua ahi hiam? (b) Migi a, thuman mi khat koi bangin guta hong suak thei a hiam?

⁴ Pasian in “Dawimangpa ahih kei leh Satan a kici” gal khat nei hi ci-in Lai Siagtho in hong gen hi. Eden huanah Satan in Eve tawh a kiho theih nadingin gul na zang hi. (Maangmuhna 12:9; Piancilna 3:1) Satan in gul a pau danin na bawl hi.—A Nunga Ciaptehna 7 en in.

⁵ Tua ahih leh Dawimangpa Satan pen Pasian’ piansak maw? Hilo hi! Pasian in Adam le Eve ading leitung a bawl lai-in vantungah tua vantungmi om ngei a, amah hong kikhelin Dawimangpa hong suak hi. (Job 38:4, 7) Koi bang danin piang thei ahi hiam? Tua hileh migi a, thuman mi khat kikhelin guta koi bangin hong suak a hiam? Amah a suah lai-in guta khatin hong suak lo hi. Ahih hang ama neihsa ahi lo mi van khat deihin lunggulh khathei hi. Tua bek ngaihsun den ahih manin a hoih lo ngaihsutna hong khang semsem hi. Tua khit teh a lungsim hong kikhelin na hong gu hi. Amah le amah guta-in kisuaksak hi.—James 1:13-15 Sim in; A Nunga Ciaptehna 8 en in.

6. Vantungmi khat koi bangin Pasian gal hong suak a hiam?

⁶ Tua vantungmi zong tua bang mah hi. Jehovah in Adam le Eve a bawlkhit ciang ta nei unla “leitung dimin zo un” ci hi. (Piancilna 1:27, 28) Tua vantungmi in ‘Mihingte in Jehovah sangin kei hong bia uh leh hoih ding hi’ ci-in ngaihsun hi. Tua thu hong ngaihsut semsem ciang Jehovah ii neihsa hong deihgawh semsem hi. Tua vantungmi in mihingte’ biak ding ut hi. Tua khit teh Eve kiang zuau genin na khem hi. (Piancilna 3:1-5 Sim in.) Tua bangin sem ahih teh amah Pasian’ gal, Dawimangpa Satan hong suak hi.

7. (a) Adam le Eve ba’hang si a hiam? (b) Ei ba’hang teekin si ihi hiam?

⁷ Adam le Eve in Pasian thu mang loin singgah na ne  uh hi. (Piancilna 2:17; 3:6) Amau Jehovah langpangin do ahih teh Jehovah in a gensa mah bangin tua hun mahin a si uh hi. (Piancilna 3:17-19) Adam le Eve tate zong mawhnei mi-in suak ahih uh teh si uh hi. (Rom 5:12 Sim in.) Adam le Eve tate ba’hang mawhnei mi hi uh hiam cih i theih nadingin thu khat tawh genteh ni. Moh bawlna kuang a dep khat tawh moh bawlin kingaihsun le teh. Kuang a dep mah bangin tua moh zong na dep hi. Adam in Pasian thu a man loh a kipan mawhnei mi hong suak hi. Adam tate ihih manin i vekpi-in mawhnei mi ahih kei leh Adam mah bangin a kibang a “dep” i nei hi. Tua ahih teh i vekin mawhnei mi kihi a, teekin i si hi.—Rom 3:23; A Nunga Ciaptehna 9 en in.

8, 9. (a) Satan in Adam le Eve bang um sak nuam a hiam? (b) Tua a langpangte Jehovah in ba’hang na that pah lo a hiam?

⁸ Satan in Adam le Eve in Pasian thu a man loh na’ng a khem a kipan Jehovah langpanna na makai hi. Adam le Eve in Jehovah pen zuaukhempa hi a, amau tungah na hoih a pia nuam lo, a hoih lo ukpa-in a up ding Satan in deih hi. Pasian in mihingte’ gamtat dan ding a gen kul kei, Adam le Eve in a sia a pha amau thu-in a khensat ding hi ci-in Satan in gen hi. Tua bang ahih leh Jehovah in bang cih ding? Tua a langpangte thatin tua langpanna beisiangsak thei hi. Ahih hang tua bangin hih leh Satan pen zuaukhempa ahihlam a kithei ding hiam? Kithei lo ding hi.

⁹ Tua bangin Jehovah in tua a langpangte na that pah lo hi. Tua sangin mihingte amau le amau ki-uk dingin hun na piazawsop hi. Tua in Satan pen zuaukhempa ahihna le Jehovah in mihingte ading a hoihpen thei hi cih siangtakin hong theisak ding hi. Tua thu pen Khenpi 11 ah sin beh lai ni. Ahih hang Adam le Eve te ii thu khensat pen nangh bangci sa na hiam? Satan thu umin Pasian thu a man loh uh pen amau ading hoih ding maw? Adam le Eve te ii neihlelam khempeuh  Jehovah piak hi. A cingtaak nuntakna, teen nading mun hoih le amau’ a lungnuamsak nasep zong na pia hi. Ahih hang Satan in cikmah hunin amau ading na hoih bawlsak ngei lo hi. Tua takah a om hi lecin, nang e bang na ci tam?

10. Ei mimal khat ciat in a thupi mahmah bang thu i teel ding om a hiam?

 ¹⁰ Tu hunin zong ei mimal khat ciat in tua bang mah in thu i teel kul a, i nuntakna pen i teel thu tungah kinga hi. Tua mah bangin Jehovah pen ei hong Ukpa-in a thu i man ding i teelthei a, Satan pen zuaukhempa hi cih a kitheih nading Pasian i huh thei hi. Ahih kei leh Satan pen ei hong ukpa-in i teel thei hi. (Late 73:28; Paunak 27:11 Sim in.) Leitungah mi tawmkhat bek in Pasian thu na mang uh hi. A manin gen le’ng, hih leitung a ukpa pen Pasian hilo hi. Pasian hilo ahih leh kua hi ding hiam?

11, 12. (a) Jesuh tung Satan’ kamciamna in bang hong theisak a hiam? (b) Satan in leitung uk hi cih bang Lai Siangtho munte in hong lak a hiam?

¹¹ Jesuh in leitung kua’n uk takpi hiam cih thei hi. Khatvei, Satan in “leitung kumpi gam khempeuh le a hoihna teng” lak hi. Tua ciangin Satan in Jesuh kiangah: “Ka mai-ah kunin kei hong bia lecin hihte khempeuh nangma tungah kong pia ding hi,” ci-in kamciam hi. (Matthai 4:8, 9; Luka 4:5, 6) Ngaihsun in, ‘Leitung kumpi gam khempeuh Satan’ neihsa hi kei leh Jesuh kiang kong pia ding, a ci thei ding hiam?’ Ci thei lo ding hi. Leitung kumpi gam khempeuh Satan’ neihsa ahi hi.

¹² ‘Satan pen leitung ukpa koi bangin hi thei ding? Van le lei a bawl pen a Vanglian Jehovah Pasian hilo a hiam?’ ci-in ngaihsun khathei ni teh. (Maangmuhna 4:11) Hi mah, Jehovah hi. Ahih hang Jesuh in Satan pen “hih leitung a ukpa” hi ci-in kician takin na gen hi. (Johan 12:31; 14:30; 16:11) Sawltak Paul in Satan Dawimangpa pen “hih leitung pasian” na ci hi. (2 Korin 4:3, 4) Sawltak Johan in zong ‘Leitung, . . . khempeuh Dawimangpa khut sungah a om hi’ ci hi.—1 Johan 5:19.

13. Leitung thak ba’hang kisam ihi hiam?

¹³ Hih leitung pen hong lauhuai semsem hi. Gal kidonate, thumanlohna, mihoih kineihna le hiamtatnate i kiim i pamah kimu hi. Mihing te’n bangzah takin a hanciam uh hang hih buainate khempeuh beisak zo lo uh hi. Ahih hang Pasian in a sawt loin hih siatna tawh a kidim leitung pen Armageddon galdona-ah susia ding a, thumanna tawh a kidim leitung thak tawh hong laih ding hi.—Maangmuhna 16:14-16; A Nunga Ciaptehna 10 en in.

14. Pasian in ama’ Gam Kumpi dingin kua teel a hiam? Jesuh thu Lai Siangtho in bang genkhol hiam?

¹⁴ Jehovah in ama vantung ki-ukna ahih kei leh Gam Kumpi dingin Jesuh Khrih na teel hi. A beisa kum tul tampi lai-in Lai Siangtho in Jesuh pen “Nopsakna Kumpi” hi ci-in na genkhol a, ama ukna bei ngei lo ding ci hi. (Isaiah 9:6, 7) Jesuh in “Na ukna hong tung hen la, vantung bangin leitungah zong na deih bangin kigamta hen,” ci-in a gen lai-in tua Gam ki-ukna ading thu a nget ding uh a nungzuite na hilh hi. (Matthai 6:10) Khenpi 8 ah Pasian Gam in leitung ki-uknate khempeuh a hepkhiat dan ding i sin ding hi. (Daniel 2:44 Sim in.) Tua banga a hepkhiat khit ciang Pasian Gam in leitung pen a hoih mahmah paradais-in hong bawlsak ding hi.—A Nunga Ciaptehna 11 en in.

15. “Leitung thak” a cih in bang hiam?

¹⁵ Lai Siangtho in: “Midikte a teenna van thak le lei thak i lamen hi,” ci-in hong kamciam hi. (2 Peter 3:13, ZSV; Isaiah 65:17) Khat veivei Lai Siangtho in “leitung” a cih ciang leitunga a nungta mihingte a cihnopna ahi hi. (Piancilna 11:1) Tua ahih manin thumanna “leitung thak” a cih in Pasian thu mang a, ama thupha a ngah mite ahi uh hi.

16. Ama leitung thakah a nungtate Pasian in a manpha bang letsong pia ding a, tua letsong i ngahnop leh bang i sep ding kul hiam?

 ¹⁶ Pasian ii leitung thakah a nungtate “nuntak tawntungna” kipia ding hi ci-in Jesuh in kamciam hi. (Marka 10:30) Tua letsong i ngahnop leh bang sep ding kisam hiam? Hehpihna tawh Johan 3:16 le 17:3 na sim inla, na sep ding bang hiam cih na en in. Lai Siangtho gen leitung Paradais-a nuntakna pen koi bang hiam cih tu’n en ni.

17, 18. Leitung mun khempeuhah lungnuamin lungmuang takin ki nungta ding hi cih bangci theih i hiam?

¹⁷ Gitlohna, gal kidona, tatsiatnate le hiamtatnate maimang tading hi. Leitungah migilo khat zong om nawn lo ding hi. (Late 37:10, 11) Pasian in “leimong dongah gal beisak hi.” (Late 46:9; Isaiah 2:4) Leitung pen Pasian it a, ama thu a mang mite tawh kidim ding hi. Kilemna om tawntung ding hi.—Late 72:7.

¹⁸ Jehovah’ mite lungmuang takin om ding uh hi. Lai Siangtho hun lai-a Israel mite’n Pasian thu a man uh ciang Pasian in kem ahih manin lungmuang takin om thei uh hi. (Siampi Laibu 25:18, 19) Paradais-ah mi ahih kei leh bangmah i lau nawn kei ding hi. Lungmuang takin i nungta tawntung ding hi!—Isaiah 32:18; Mikah 4:4 Sim in.

19. Pasian ii leitung thakah annek tuidawn kicing ding hi cih ba’hang lungmuang thei i hiam?

¹⁹ Annek tuidawn kicing takin om ding hi. “Gam sung khempeuhah an tampi tak piang hen la, mual liante dawnah dim mema” ding hi. (Late 72:16) Jehovah, “eima Pasian in eite thupha hong pia” in “leitang in ama hauhna gahkhia” ding hi.—Late 67:6.

20. Leitung pen paradais hong suak ding hi cih koi bangin thei ihi hiam?

²⁰ Leitung bup paradais hong suak ding hi. Mihing te’n inn hoih le huan hoih nei tading uh hi.  (Isaiah 65:21-24; Maangmuhna 11:18 Sim in.) Leitung bup pen Eden huan mah bangin hong hoih ding hi. Jehovah in i kitangsapna khempeuh a tawntungin hong pia ding hi. Lai Siangtho in Pasian pen: “Nangmah in na khut na hong a, nuntak husanna a nei khempeuhte’ deihna a kicingin na pia hi,” ci hi.—Late 145:16.

21. Mihingte le ganhingte kilem tading hi cih koici theih ihi hiam?

²¹ Mihingte le ganhingte kilem tading uh hi. Ganhing te’n mihingte bawlsia nawn lo ding hi. Tu huna a lauhuai ganhingte naupangte nangawn in lau nawn lo ding hi.—Isaiah 11:6-9; 65:25 Sim in.

22. Jesuh in cinate ading bang sepsak ding a hiam?

²² Kuamah cina nawn lo ding. Jesuh leitungah a om lai-in mi tampi na damsak hi. (Matthai 9:35; Marka 1:40-42; Johan 5:5-9) Pasian Gam’ Kumpi-in Jesuh in mi khempeuh damsak tading hi. Kuamahin: “Ka ci na hi, ci nawn lo ding uh” hi.—Isaiah 33:24; 35:5, 6.

23. Pasian in mi site ading bang sepsak ding hiam?

²³ Mi site hong nungtakik ding hi. Pasian in a si mi awn tampi ka hingkiksak ding hi ci-in kamciam hi. “Miphate le misiate a kibangin sihna panin hingkiksak khawm ding hi.”—Johan 5:28, 29 Sim in; Sawltak 24:15.

24. Paradais-ah na ten ding bangci na ngaihsut aa?

²⁴ I vekpi-in teel ding nei hang. Jehovah thu sin ding le ama na sep ding i teel thei a, ahih kei leh ei ut bang peuh sep ding zong i teel thei hi. Pasian na sem dingin i teel leh a angtang huai mailam thupha i ngah ding hi. Jesuh kiang pasal khatin ka sih khit ciang hong phawk in ci-a a gen lai-in Jesuh in: “Paradais-ah kei tawh na om khawm ding hi,” ci-in na kamciam hi. (Luka 23:43) Tu’n Jesuh Khrih thu le Jesuh in Pasian ii a lamdang mahmah kamciamte koi bangin hong tangtung sak ding hiam cih sin beh ni.