1. Lampi man tawnin Pasian i biak theih nading kua’n hong gen thei a hiam?

BIAKNA a tamzaw in Pasian thu man takin ka hilh uh hi, ci ngiat uh hi. Ahih hang tua pen hi thei lo ding hi. Ba’hang hiam cih leh Pasian kua hi a, amah koici biak ding cih tawh kisai biakna a tamzaw ii thuhilh dan kibang vet lo ahih man hi. En’ lampi man tawnin Pasian koici biak theih ding ihi hiam? Jehovah bek in amah i biak dan ding hong gen thei hi.

2. Pasian biak theih nading lampi man koici sin thei ding na hiam?

² Jehovah in Lai Siangtho hong pia ahih teh lampi man tawh amah i biak theih nading thu i sin thei hi. Tua ahih manin Lai Siangtho na sin banah, Jehovah in nang hong don mahmah ahih manin ama thuhilhna pan phattuamna na ngah nading hong huh ding hi.—Isaiah 48:17.

3. Pasian in bang hong semsak nuam a hiam?

³ Mi pawlkhat in biakna khempeuh Pasian in sang hi ci-in a gen uh hangin, Jesuh in tua bangin hong hilh lo hi. Ama’n: “‘Topa, Topa aw,’ hong ci mi khempeuh, vantung ki-ukna sungah lutthei kim lo ding uh a, vantungah a om ka Pa’ deihna bangin a gamta teng bek lutthei ding uh hi,” ci hi. Tua ahih teh Pasian deihna bang hiam cih i sin ding kisam a, tua i sin thute i zuih ding a kul hi. Tua pen a thupi mahmah thu khat ahi hi. Ba’hang hiam cih leh Pasian thu a mang lote pen Jesuh in “Siatna a gamta mite,” ci-in na genteh ahih man ahi hi.—Matthai 7:21-23.

4. Pasian deihna sep ding tawh kisai Jesuh in bang gen a hiam?

⁴ Pasian deihna i sepnop leh haksatna i tuak ding hi  ci-in Jesuh in i kidop ding hong hilh khol hi. Ama’n: “Kong kawcik bek tawnin lut un. Hell khuk [‘suksiatna,’ NW] tun nading kongvang pen lianin a lampi baih a, mi tampi in a zui uh hi. Ahi zongin nuntak tawntungna tun nading kong kawcikin a lampi haksa a, mi tawmno bek in a zuizo uh hi,” ci-in hong gen hi. (Matthai 7:13, 14) A kawcik lampi ahi Pasian biak theih nading lampi man in nuntak tawntungna hong tun pih ding hi. Lampi lian ahi lampi man lo tawh Pasian biakna in sihna hong tunpih ding hi. Ahih hang Jehovah in kuamah a sih ding deih lo hi. Mi khempeuh in ama thu a sin theih nading hunpha pia hi.—2 Peter 3:9.

5. Lampi man tawh Pasian a bia mite nangh koici khen theih ding?

⁵ Jesuh in lampi man tawh Pasian a bia mite tel takin i khen thei ding hi hong ci hi. Amau’ bang um a, bang sem uh hiam cihte i kanna tawh i khen thei ding hi. Jesuh in: “Amaute’ gamtatna tawh amau’ pianzia na thei ding uh hi,” ci hi. Tua khit teh ama’n: ‘Singkung cidamte in gah limci gah hi,’ ci-in na behlap hi. (Matthai 7:16, 17) Hih in Pasian a bia mite mawhna nei lo mi cingtaak cihna hi lo hi. Ahih hang Pasian nasemte in a tawntungin thuman a sep ding hanciam uh hi. Tu’n lampi man tawh Pasian a bia mite i khen theih nading bang in hong huh thei ding cih thute i mu ding hi.

6, 7. Biakna man in Lai Siangtho a bulphuhna ahang bang a hiam? Jesuh tung pan bang etteh thei ding ihi hiam?

⁶ I biakpiakna pen Lai Siangtho tung a kibulphuh ding kisam hi. Lai Siangtho in: “Pasian’ na a sem mite mi cingtaak hi-in, na hoih namkim a septheih nadingun Lai Siangtho pen Pasian’ lamlahna tawh a hong kipia hi a, thuman thutak hilh nading, a khialte taii nading, a man lote a manin puah nading, a manin nuntak theih nading thuhilh nadingin a manpha mahmah ahi hi,” ci hi. (2 Timoti 3:16, 17) Sawltak Paul in Khristiante  kiangah: “Kote’ thugente pen Pasian’ thu taktak ahih mah bangin kote’ thugenna na zak uh ciangin mihing’ thu bangin ngaihsun loin Pasian’ thu taktak mahin hong sang na hih manun,” ci-in lai na khak hi. (1 Thesalonika 2:13) Biakna man pen Pasian Kammal ahi Lai Siangtho tung bekah kibulphuh ding ahi hi. Mihingte ngaihsutna, ngeina ahih kei leh thu tuamtuam tung kibulphuh lo hi.

⁷ Jesuh thuhilhna khempeuh pen Pasian Kammal tung kibulphuh hi. (Johan 17:17 Sim in.) Ama’n Lai Siangtho siiksanin na gen den hi. (Matthai 4:4, 7, 10) Pasian nasem taktak te’n Jesuh etteh uhin amau thuhilhna khempeuh Lai Siangtho tung bulphuh uh hi.

8. Jehovah i biak ding thu tawh kisai Jesuh in bang hong hilh a hiam?

⁸ Jehovah bek i biak ding kisam hi. Late 83:18 in: “Topa [“Jehovah,” NW] a kici min nei nangmah bek leitung khempeuhah a Sangpenpa na hihna amaute theisak in,” ci hi. Jesuh in a man Pasian kua hi takpi hiam cih mi te’n a theih ding deih a, Pasian min mite na hilh hi. (Johan 17:6 Sim in.) Jesuh in: “Na Topa Pasian bek bia inla, ama na bek sem in,” ci hi. (Matthai 4:10) Tua ahih teh Pasian nasem ihihna tawh Jesuh khekhap i zui hi. Jehovah bek i bia a, ama min i zang hi. Tua banah midangte kiang Pasian’ min le ei ading hong bawlsak ding thute i hilh hi.

9, 10. Khatlekhat ki-itna koi bangin kilak uh a hiam?

⁹ Itna takpi tawh mihingte i it ding kisam hi. Jesuh in a nungzuite khatlekhat a ki-it ding uh na hilh hi. (Johan 13:35 Sim in.) I pianna koi mun ahi zong, i ngeina bangbang ahi phial zong, mihau ihi zong, mizawng ihi phial zongin tuate thupi lo hi. Khatlekhat ki-itna in unaunu le unaupate-in hong kipumkhat sak hi. (Kolose 3:14) Tua ahih manin mi that dingin gal kidona-ah ka kuan kei uh hi. Lai Siangtho in: “Hih pen Pasian tate le Dawimangpa’ tate a kilamdanna ahi hi. A manin gamta loin, a Khristian mipihte a it lo mi peuhmah, Pasian’ tate hi lo uh hi,” ci hi. Tua ahih manin: “Khatlekhat i ki-it nading  thu ahi hi. Dawimangpa’ mi ahi, a naupa mahmah a that Kain bang kei ni. Kain a gamtatna man lo a, a naupa’ gamtatna man ahih manin Kain in a naupa a that ahi hi,” ci-in na gen beh hi.—1 Johan 3:10-12; 4:20, 21.

¹⁰ Khatlekhat ka kihanthot theih nading le ka kihuh nadingun ka hun uh, ka thatang uh le neihlelamte ka zang uh hi. (Hebru 10:24, 25) ‘Midangte tungah a hoihin i gamta ding hi.’—Galati 6:10.

11. Jesuh pen Pasian kiang tun nading lampi hi ci-in ba’hang sang ihi hiam?

¹¹ Jesuh pen Pasian kiang tun nading lampi ahih manin ama thu i man ding kisam hi. Lai Siangtho in: “Ama hang bek tawh hotkhiatna kingah thei ding hi. Bang hang hiam cih leh eite in hotkhiatna i ngahtheih nadingin leitung khempeuhah Pasian in hong piak min dang khat zong om lo hi,” ci hi. (Sawltak 4:12) Hih laibu Khenpi 5 ah Jesuh in a thumang mihingte tatkhiat nading ama nuntakna a piakhia dingin Jehovah in a sawlna thu i sin khin hi. (Matthai 20:28) Jehovah in leitung a uk ding Kumpi-in Jesuh na teel hi. Tua ahih manin Lai Siangtho in tawntung nuntakna i ngahnop leh Jesuh thu i man loh phamawh hi ci hi.—Johan 3:36 Sim in.

12. Leitung gamvaite-ah ba’hang kihel lo ihi hiam?

¹² Leitung gamvaite-ah i kihel kei ding hi. Jesuh pen leitung gamvaite-ah na kihel lo hi. Khat vei, amah thu a kisit lai-in ama’n Rom ukpa Pilat kiangah: “Keima ukna pen hih leitung gam hi lo hi,” na ci hi. (Johan 18:36 Sim in.) Jesuh mah bangin en’ zong Pasian ii vantung Kumpi Gam tung i citak a, tua manin koi gamah i teng zongin leitung gamvaite-ah i kihel kei hi. Ahih hang Lai Siangtho in “ukna thu nei” ahi, leitung kumpite thu i mang ding thu hong pia hi. (Rom 13:1) Koi munah i teng zongin i tenna gam ii thukhamte i zuih ding ahi hi. Ahih hang Pasian thukhamte le leitung thukham a kitukalh ciang: “Mite’ thu sangin Pasian’ thu ka mangzaw ding uh hi,” ci-a, a gen sawltakte i etteh hi.—Sawltak 5:29; Marka 12:17.

13. Pasian’ Gam tawh kisai bang thu tangko ihi hiam?

 ¹³ Leitung buainate a siangsak zo ding Pasian’ Gam bek hi, ci-in i um hi. Jesuh in “Pasian hong ukna hangin a lungdamhuai thu” leitung khempeuhah kitangko ding hi na ci hi. (Matthai 24:14 Sim in.) Mihing kumpite in hong sepsak zawh lohte Pasian’ Kumpi Gam in ei ading hong sepsak ding hi. (Late 146:3) Jesuh in: “Na ukna hun hong tung hen la, vantung bangin leitungah zong na deihna bangin kigamta hen,” ci-in a gen lai-in Pasian’ Gam ading thu i nget ding hong hilh hi. (Matthai 6:10) Lai Siangtho in mihing kumpi khempeuh Pasian’ Gam in susia ding a, tua Pasian gam bek ‘a kip tawntung ding hi,’ ci-in hong gen hi.—Daniel 2:44.

14. Lampi man tawh Pasian a bia kuate hidingin um na hiam?

¹⁴ Hih thute na sin khit ciang nang le nang na kidong in: ‘Kuate in amau thuhilhnate Lai Siangtho bulphuh uh a hiam? Midangte kiang Pasian’ min a gen kuate a hiam? Itna takpi tawh khatlekhat tung itna a kilak kuate hi a, ei hong honkhia dingin Pasian in Jesuh hong sawlna a um kuate a hiam? Leitung gamvaite-ah a kihel lo kuate a hiam? I haksatnate a hemkhia zo ding Pasian’ Kumpi Gam bek hi, ci-in a tangko kuate a hiam?’ Jehovah Tecite ahi hi.—Isaiah 43:10-12.

15. Pasian in i biakna hong san ding i deih leh bang i sep loh phamawh a hiam?

¹⁵ A nungta Pasian om hi, ci-a up bek tawh kicing lo hi. Dawite nangawn in a nungta Pasian a om lam um uh hi, ahih hang Pasian thu na mang lo uh hi. (James 2:19) Pasian in i biakna hong san ding i deih leh, amah a nungta Pasian in i up bek tham loh ama hong gen thute zong i sep loh phamawh hi.

16. Biakna manlo pawlpi ba’hang i nial loh phamawh a hiam?

¹⁶ Pasian i biakna ama’n hong san ding i deih leh biakna manlo pawlpi i nial loh phamawh hi. Kamsang Isaiah  in: “Khuasung panin paikhia unla, nomau kisiansuah tawm un,” hong ci hi. (Isaiah 52:11; 2 Korin 6:17) Tua ahih manin biakna manlo tawh nasep khopna khempeuh i nial ding kisam hi.

17, 18. “A Lian Babylon Khuapi,” a cihin bang a hiam? Ba’hang manlang takin i nial ding kisam a hiam?

¹⁷ Biakna manlo pawlpi i cih in bang a hiam? Tua pen Pasian Kammal tawh a kituak lopi-a Pasian i biak ding a hong hilh biakna pawlpi khempeuh a cihna ahi hi. Lai Siangtho in biakna manlo pawlpi khempeuh “A Lian Babylon Khuapi,” na ci hi. (Maangmuhna 17:5) Ba’hang hiam? Noah’ hun Tuiciin a tun khit zawh ciang Babylon khuapi-ah biakna manlote thuhilhna tampi hong kipan hi. Tua a manlo thuhilhnate leitung bupah hong kizel hi. Gentehna, Babylon khuapi a, a teng mite in pasian thum tawh a kigawm pasiante bia uh hi. Tu hunin zong pawlpi tampi in Pasian pen Thum Gawm Pasian hi ci-in hilh uh hi. Ahih hang Lai Siangtho in a man Pasian Jehovah khat bek ahi hi ci-in kician takin hong hilh a, Jesuh pen a Tapa hi ci-in hong hilh hi. (Johan 17:3) Babylon khuapi a, a teng mi te’n mi khat a pumpi a sih khit ciang a nungta suak khat om hi ci-in um uh a, tua pen hell sungah gimna a thuak hi ci uh hi. Tua pen man lo hi.—A Nunga Ciaptehna 14, 17 le 18 en in.

¹⁸ Pasian in biakna man lo pawlpi khempeuh a sawt loin kisusia tading, ci-in genkhol hi. (Maangmuhna 18:8) Biakna manlo pawlpi sung pan manlang takin na paikhiat ding ahang na tel ta hiam? A zekai ma, tua banga na sep ding Jehovah Pasian in a hong deih hi.—Maangmuhna 18:4.

19. Jehovah Pasian na sem dinga na khensat leh ama’n koi bangin hong kem ding a hiam?

¹⁹ Biakna man lo pawlpi pan paikhiat ding sawm a, Jehovah Pasian na a sem dingin na khensat ciang na lawmte ahih kei leh na innkuanpih te’n tua banga na khensatna  hong tel zo lo kha ding a, na nuntakna zong hong haksasak khathei ding hi. Ahih hang Jehovah in nang hong nusia lo ding hi. Nang pen khatlekhat itna takpi tawh a ki-it mi awn tampite ii leitung bup innkuan sunga innkuanpih na suak ding a, tua banah Pasian’ leitung thakah a tawntunga nuntak theihna lametna hoih zong na nei hi. (Marka 10:28-30) Jehovah Pasian na sem dinga na khensatna a hong langpang na innkuanpihte ahih kei leh na lawm pawlkhatte in a nung ciangin Lai Siangtho sin ding hong khensat thei kha ding uh hi.

20. Lampi man tawh Pasian i biak ding ba’hang thupi mahmah a hiam?

²⁰ A sawt loin Pasian in siatna khempeuh susia ding a, leitung khempeuh ama Gam kumpi in a hong uk ding hi. (2 Peter 3:9, 13) Tua hun pen a thalawp huai hun hi ding hi! Jehovah ii deih lampi bangin mihing khempeuh in Jehovah bia tading uh hi. Tua ahih manin nangh lampi man tawh Pasian bia a, tu mahin na nuntakpih ding thupi mahmah hi.