1. Tu’n a minthang mahmah bang thungetna kikum ding ihi hiam?

LEITUNGAH a minthang mahmah thungetna ahi Kote Pa ahih kei leh Topa Thungetna mi awn tampi in thei uh hi. Jesuh in a nungzuite thunget dan ding a hilh lai-in hih thungetna na zang hi. Jesuh thunget bang a hiam? Tua thungetna pen tu hun i nuntakna-ah ba’hang thupi a hiam?

2. Jesuh hong hilh a thupi mahmah i nget ding thu thumte in bang a hiam?

² Jesuh in: “thu na nget uh ciangin hih bangin na ngen un: ‘Vantunga om kote Pa aw, na min siangtho kizahtak hen. Na ukna hun hong tung hen la, vantung bangin leitungah zong na deih bangin kigamta hen’” ci hi. (Matthai 6:9-13 Sim in.) Tua thu thumte i nget ding Jesuh in ba’hang hong hilh a hiam?—A Nunga Ciaptehna 20 en in.

3. Pasian Gam tawh kisai bang thu i theih ding kisam hiam?

³ Pasian min pen Jehovah hi cih i sin khin hi. Tua khit teh leitung le mihingte ading Pasian deihna bang hiam cih zong i kikum khin hi. Ahih hang: “Na ukna hun hong tung hen” ci-a Jesuh in a gen ciang bang a cihnopna hiam? Pasian Gam in bang a hiam, bang hong sepsak ding, Pasian min koi bangin hong siangthosak ding cih thute i sin ding hi.

4. Pasian Gam in bang hi a, tua Gam ii Kumpi in kua a hiam?

⁴ Jehovah in vantung ki-ukna phut a, Kumpi dingin Jesuh na teel hi. Lai Siangtho in tua ki-ukna pen Pasian  Gam na ci hi. Jesuh pen “Kumpite Kumpi, topate Topa” in uk ding hi. (1 Timoti 6:15) Jesuh pen mihing a uk kumpi kuamapeuh sangin na hoihzaw tham a, leitung a uk mihing khempeuhte sangin vanglianzaw hi.

5. Pasian ki-ukna in koi mun pan hong uk ding a, koi mun uk ding uh a hiam?

⁵ Jesuh a thawkik zawh ni 40 khit ciang vantungah a kahkik hi. A tawpna-ah Jehovah in Jesuh pen Pasian Gam ii Kumpi dingin na seh hi. (Sawltak 2:33) Pasian ki-ukna in vantung pan leitung khempeuh hong uk ding hi. (Maangmuhna 11:15) Tua ahih manin Lai Siangtho in Pasian Gam pen “vantung gam” na ci hi.—2 Timoti 4:18.

6, 7. Mihing kumpi kuamapeuh sangin Jesuh pen bang in na hoihsakzaw a hiam?

⁶ Lai Siangtho in mihing kumpi khempeuh sangin Jesuh pen lianzaw ci hi. Ahang pen amah “si kik ngei nawn lo ding” ahih man hi. (Rom 6:9) Leitung a uk mihing kumpi khempeuh a tawpna-ah si uh hi. Ahih hang Jesuh pen cikmah hunin si nawn lo ding hi. Ei adingin Jesuh hong bawlsak ding na hoih khempeuh bei ngei nawn lo ding hi.

⁷ Lai Siangtho genkholhna in Jesuh pen guptuam a nei lo, mi hehpih thei Kumpi hi ding hi ci-in: “Topa kha in ama tungah ama mite a ukna ding pilna, thutheihna, le siamna pia ding hi. Amah in Topa deihna thei-in Topa zahtak ding hi. Amah in Topa nasep nuamsa ding hi. Amah in a tungtham bek muhna tawh thu khen lo ding a, kam lengsawn bek zakna tawh thu khentat lo ding hi. Thumanna tawh mizawngte thu khen” ding na ci hi. (Isaiah 11:2-4) Tua bang dan pen i kumpi dingin deih hi lo na hiam?

8. Jesuh bek in uk lo ding hi cih en’ koi bangin theithei ihi hiam?

⁸ Pasian in vantung ki-ukna ah Jesuh tawh a uk  khawm dingin mi pawlkhat na teel hi. Gentehna, sawltak Paul in Timoti kiangah: “Eite in gimna i thuak paisuakzawh leh amah tawh i ukkhawm ding hi,” na ci hi. (2 Timoti 2:12) Jesuh tawh mi bangzah in kumpi-in uk khawm ding uh hiam?

9. Jesuh tawh a ukkhawm ding mi bangzah pha hiam? Pasian in bang hun a kipan na teel hiam?

⁹ Khenpi 7 ah i sin mah bangin sawltak Johan kiang a kipia maangmuhna-ah vantungah Kumpi ahi Jesuh tawh adang kumpi 144,000-te na mu hi. Tua 144,000 te in kuate a hiam? Johan in “Tua mite taltangah Tuuno [Jesuh] le a pa min kigelh hi,” ci-in hong hilh hi. Tua khit teh ama’n: “Amaute in Tuuno [tua, Jesuh] a paina peuhpeuhah zui uh a, midang khempeuh sung panin a kitankhiasa” te na ci hi. (Maangmuhna 14:1, 4 Sim in.) Tua 144,000-te pen a citak Khristiante hi a, Pasian in “kumpi za na pia a” Jesuh tawh “amaute in leitung uk” ding uh hi. Amau a sih uh ciang vantungah a nungta dingin thokik ding uh hi. (Maangmuhna 5:10) Sawltakte hun lai pek a kipan Jehovah in kumpi 144,000 te sungah a kihel dingin a citak Khristiante na teel khin hi.

10. Mihingte a uk dingin Jesuh le 144,000 te Jehovah in hong vaihawmsak pen itna tawh vaihawmna ba’hang kici thei a hiam?

¹⁰ Jehovah in ei hong don mahmah ahih manin Jesuh tawh a ukkhawm dingin mihingte mah hong vaihawmsak hi. Jesuh in ei hong theisiam ahih manin ukpa hoih khat ahi ding hi. Jesuh in mihing khat ii nuntakzia le gentheih haksatnate na thei hi. Jesuh in ei tungah hong lunghihmawhna Paul in gen a, ama’n “i ginat lohna-ah eite a hong hehpih” in “eite mah bangin ze-etna khempeuh a thuak hi” na ci hi. (Hebru 4:15; 5:8) Tua 144,000 te in mihingte nuntakzia zong na thei uh hi. Amau zong kicinlohna le natna a tuamtuam  na nawk uh hi. Tua ahih manin ei ii ngaihsutnate bek tham loh i haksatnate zong Jesuh le 144,000 te in hong theihpih cih i lungmuang thei hi.

11. Jesuh in Pasian deihna vantungah tungta hen ci-in a nungzui te’n thu a nget ding ba’hang hilh a hiam?

¹¹ Jesuh in Pasian deihna vantungah tungta hen ci-in a nungzui te’n thu a nget ding na hilh hi. Ba’hangin maw? Khenpi 3 ah i sin mah bangin Dawimangpa Satan in Jehovah langpangin na do hi. Tua banga a langpan khit teh Jehovah in Satan le a citak lo vantung mite ahih kei leh dawite tawlkhat sung vantungah na tengsak lai hi. Tua ahih manin vantungah Pasian deihna kisem kim nai lo hi. Khenpi 10 ah Satan le dawite’ thu i sin beh lai ding hi.

12. Maangmuhna 12:10 ah a thupi mahmah thupiang nih in bang a hiam?

¹² Lai Siangtho in Jesuh pen Pasian Gam ii Kumpi hong sep khit a sawt loin Satan tawh gal hong kido ci hi. (Maangmuhna 12:7-10 Sim in.) A neu 10 ah a thupi mahmah thupiang nih hong hilh hi. Pasian Gamah Kumpi-in Jesuh Khrih hong uk kipatna thu le Satan pen vantung pan leitungah a kilawtkhiatna thute ahi hi. Tu-a i sin mah bangin tua thute hong piang khin hi.

13. Satan vantung pan a kilotkhiat khit ciang vantungah bang thupiang a hiam?

¹³ Lai Siangtho in Satan le ama dawite vantung pan a kilotkhiat khit ciang a citak vantung mite lungdam uh ci hi. “Vantungte le tuate sungah a teng mi khempeuh aw, lungdam un!” ci-in i sim hi. (Maangmuhna 12:12) Tu’n vantunga a nungta khempeuhin Pasian deihna sem ta uh ahih manin vantungah kilemna le daihna om ta hi.

14. Vantung pan Satan hong kilawnkhia suk ahih manin leitungah bang thu piang hiam?

 ¹⁴ Ahih hang leitung nuntakna leuleu ciang kilamdang mahmah hi. “Dawimangpa hong tuaksuk” ahih manin mihingte tungah thu hoih lo tampi hong piang a, ama’n “hun tomcik bek a neilai ahihlam thei ahih manin lungso” mahmah hi. (Maangmuhna 12:12, ZSV) Satan pen nak heh mahmah hi. Vantung pan amah a kilotkhiatna le a sawt loin amah a kisuksiat ding thei hi. Tua ahih manin leitung bupah buaina, lunggimna le gentheih haksatnate a pian nading a sep theih khempeuh tawh a sem hi.

15. Leitung ading Pasian deihna in bang ahi hiam?

¹⁵ Ahih hang leitung ading Pasian deihna pen kikhel tuan lo hi. Leitung Paradais-ah a cingtaak mihingte a tawntungin a nuntak ding Pasian in deih lai veve hi. (Late 37:29) Tua bangin a pian theih nading Pasian Gam in koi bangin hong bawlsak ding a hiam?

16, 17. Daniel 2:44 in Pasian Gam tawh kisai bang hong gen a hiam?

¹⁶ Daniel 2:44 a, genkholhna-ah: “Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo ding a, tua gam in gamdang khempeuhte zogawpin a kip tawntung ding hi” na ci hi. Hih genkholhna in Pasian Gam tawh kisai ei bang hong hilh a hiam?

¹⁷ A masa-in, “tua kumpite a maan laitakun” Pasian Gam ukna hong kipan tading hi cih hong gen hi. A cihnopna pen Kumpi-in uk a kipat ciang leitungah kumpi dangte om lai ding cihna hi. A nihna, Pasian Gam pen kip tawntung ding a, kumpi dangte in cikmah hunin tua gam la zo lo ding uh hi ci-in hong gen hi. A thumna, Pasian Gam le hih leitung kumpite kido ding uh hi.  Pasian Gam in zo ding a, leitung bup a uk ding kumpi khat bek hong om tading hi. Tua khit teh mihingte in a neih ngei loh a hoihpen kumpi nei tading uh hi.

18. Pasian Gam le hih leitung kumpite a kido ding a nunung pen gal kidona ii min pen bang a hiam?

¹⁸ Pasian Gam in leitunga ki-ukna khempeuh koi bangin hong uk ding a hiam? Armageddon galpi a kici a nunung galsimna hong tun ma, “A Vanglian Pasian Ni hong tun ciangin gal a do dingin” dawite in “leitung gam khempeuhah a om kumpite” khemin na kaikhawm ding hi. Hi mah hi, leitung kumpi te’n Pasian Gam hong do ding uh hi.—Maangmuhna 16:14, 16; A Nunga Ciaptehna 10 en in.

19, 20. Leitung bup a uk ding Pasian Gam ba’hang kisam ihi hiam?

¹⁹ Pasian Gam ba’hang kisam ihi hiam? A tawmpen ahang thum om hi. Khatna-ah, ei mawhnei mi ihi a, tua ahih manin cina-in i si hi. Ahih hang Lai Siangtho in Pasian Gam ukna nuai-ah a tawntungin i nungta ding hi na ci hi. A manin gen le’ng Johan 3:16 in: “Pasian in leitung mite hong it mahmah ahih manin ama Tapa a um mi khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi,” na ci hi.

²⁰ A nihna-ah, Pasian Gam i kisapna ahang pen i kiim i pamah migilote tawh tengkhawm ihih man hi. Mi tampi in zuau gen a, mi kheemin gamtat hoih lo uh hi. Tuate i hepkhiat nop hang bangmah i sepzawh om lo hi. Ahih hang Pasian in hemkhiazo hi. Thusia a sem suak mite Armageddon hong tun ciang suksiat thuak ding uh hi. (Late 37:10 Sim in.) A thumna-ah, Pasian Gam i kisapna ahang pen mihing kumpite in mi ukzo nawn loin gilo, tatsia ahih kei leh thuman loin guk ne uh ahih man hi. Mi te’n Pasian thu a man nadingun  amau’ huh nuam lo uh hi. Lai Siangtho in “Mi khat in midang tungah vangliatna nei-in, a uk sung mite a gimsak gawp hun a om hi,” ci hi.—Thuhilhna 8:9.

21. Leitungah Pasian deihna hong kicin ding Pasian Gam in koi bangin kiciansak ding a hiam?

²¹ Armageddon khit ciang Pasian Gam in Pasian deihna leitungah a kicin nading hong sem takpi ding hi. Gentehna, Satan le ama dawite hong hemkhia ding hi. (Maangmuhna 20:1-3) A tawpna ciang kuamah a na, a si om nawn lo ding hi. Ba’hang hiam cih leh tatkhiatna hangin a citak mi khempeuh Paradais-ah a tawntungin nuntak theihna ngah ding uh hi. (Maangmuhna 22:1-3) Pasian Gam in Pasian min hong siangthosak ding hi. A cihnopna in bang a hiam? Pasian kumpi in leitung a uk ciang a nungta mi khempeuh in Jehovah min pahtawi ding uh a cihnopna ahi hi.—A Nunga Ciaptehna 21 en in.

22. Jesuh leitungah a om lai-in ahih kei leh a hinkik zawh phetin Kumpi na suak pah lo hi cih en’ koici theih ihi hiam?

²² Jesuh in a nungzuite kiang: “Na ukna hun hong tung hen” ci-in thunget ding na hilh hi. Tua ahih manin mailamah Pasian ukna hong tung ding cih kician hi.  Jehovah in ama gam kumpi phut masa a, tua Kumpi dingin Jesuh a koih hi. Jesuh vantungah a kahtoh phetin Kumpi suak pah a hiam? Suak pah lo hi. A ngak ding kul hi. Jesuh a hinkik zawh hun khat lai-in Peter le Paul in a nihun Late 110:1 a, genkholhna pen Jesuh tung a tangtunna thu a gen uh ciang tua thu kitel hi. Genkholhna-ah Jehovah in: “Na galte nangma khengakna-in ka bawl matengin ka taklamah tu in” ci hi. (Sawltak 2:32-35; Hebru 10:12, 13) Jehovah in Jesuh Kumpi za a piak ma, bang tanvei a ngak ding kul hiam?

23. (a) Jesuh in Pasian Gam Kumpi-in bang hunin uk kipan a hiam? (b) A zom khenpi-ah bang thu sin ding ihi hiam?

²³ Kum 1914 kum a tun ma, kum tampi lai-in lungsim hoih Khristian pawlkhat in tua kum pen Lai Siangtho genkholhna sunga a thupi mahmah kum ahihlam na theitel uh hi. Kum 1914 kum-a leitunga thupiangte in amau’ theihtelna man hi cih na lak hi. Tua kum mahin Jesuh Kumpi-in uk kipan ta hi. (Late 110:2) Tua khit a sawt loin leitungah Satan kilawnkhia suk a, tu’n “hun tomno bek a neilai” hi. (Maangmuhna 12:12) A zom khenpi-ah tua hun laitakin a nungta ihih lam a kitheihna thu i sin ding hi. Tua khit teh Pasian Gam in a sawt loin leitungah Pasian deihna hong sem takpi ding hi cih zong i sin ding hi.—A Nunga Ciaptehna 22 en in.