1, 2. Mi tampi in bang thu theinuam uh a hiam?

TSUNAMI in khuano khat susia hi. Thau tawi pa khat in biakinn sungah mite kap ahih manin mi tampi liamin si uh hi. Cancer natna tawh nupi khat si-in a ta nga nusia hi.

² Tua banga tuahsiatna ahih kei leh khasiathuai thute a pian ciang mi tampi in, “Ba’hang hiam?” ci-in thei nuam uh hi. Kimuhdahna le gimnate tawh leitung a kidimna thu a dong mi na tam hi. Nang e le, tua bangin na dong ngei hiam?

3, 4. (a) Habakkuk in bang thu dong a hiam? (b) Jehovah in koi bangin na dawngkik hiam?

³ Tua bang thute a theinuam Pasian a um mahmah khatpa thu Lai Siangtho sungah i sin ding hi. Gentehna, kamsang Habakkuk in Jehovah kiang: “Bang hangin hih bang siatnate le lungkhamnate hong musak na hi hiam? Kisuksiatna le kisukgawpna in hong umcih a, kitotna le kiselna, mun citengah om hi,” na ci hi.—Habakkuk 1:3.

⁴ Habakkuk 2:2, 3 ah, Habakkuk theihnop thute Pasian in a dawnkikna le a muh thute Pasian in a siansak ding kamciamte i sim hi. Jehovah in mihingte it mahmah hi. Lai Siangtho in: “Pasian in note hong kem” hi ci hi. (1 Peter 5:7) A man takin gen le’ng, eite sangin Pasian in gimna mudahzaw hi. (Isaiah 55:8, 9) Tua bang ahih leh, Leitungah gimna ba’hang hihzah takin tam a hiam? cih thu kikum ni.

5. Gimnate a pian ciang biakna sia a tamzaw in bangci gen uh a hiam? Lai Siangtho hilhna in bang a hiam?

⁵ Pastor-te le biakna siate in mihing te’n gimna a thuak uh pen Pasian deihna hi, ci-in gen zel uh hi. Mi pawlkhat in mi khat tunga a piang thu khempeuh, khasiathuai thute ahi zongin tuate pen Pasian in gelsa-in nei khin a, tua pen ba’hang piang hiam cih cikmah hunin i theizo ngei kei ding hi ci uh hi. Pawlkhat leuleu in naupangte a kipan, mihingte a sih uh ciang vantungah Pasian tawh om khawm hi, ci-in gen lai uh hi. Ahih hang tua pen man lo hi. Jehovah in cikmah hunin siatnate piangsak ngei lo hi. Lai Siangtho in: “A taktakin ci lehang, Pasian a man loin gamta ngei lo a, thutang kimlai a khialin heisak lo hi,” na ci hi.—Job 34:12.

6. Leitunga gimna khempeuh pen Pasian hang hi ci-in mi tampi in ba’hang Pasian mawhsak uh a hiam?

⁶ Leitunga gimnate khempeuh pen Pasian hang hi, ci-in mi tampi in Pasian mawhsak uh hi. Ba’hang hiam cih leh hih leitung pen Pasian in uk hi, ci-in ngaihsun uh ahih man hi. Ahih hang Khenpi 3 ah i sin mah bangin leitung a uk takpi pen Dawimangpa Satan ahi hi.

7, 8. Leitungah gimna ba’hang hihzah takin tam a hiam?

⁷ Lai Siangtho in “Leitung buppi ahih leh gilopa khutnuai-a om” hi ci hi. (1 Johan 5:19, ZSV) Hih leitung a ukpa ahi, Satan pen tatsia-in gilo mahmah hi. Satan pen “leitung mi khempeuh a khem pa” ahi hi. (Maangmuhna 12:9) Mi tampi takin amah etteh uh hi. Tua hangin zuaukhemna, kimuhdahna le gitlohnate leitungah kidim hi.

⁸ Leitungah gimna a tamna ahang adang tampi na om lai hi. Adam le Eve in a langpan khit ciang amau tate tungah mawhna piasawn hi. Tua mawhna hang-in mihingte in midang tungah gimna tungsak uh hi. Amau’  midangte sangin kithupi muh ding utzaw den uh hi. Tua banah amau kilai-in, galdona-ah kihel uh a, midangte simmawh uh hi. (Thuhilhna 4:1; 8:9) Khat veivei mihing te’n “lamet loh hun laitak” a thupiangte hangin gimna thuak uh hi. (Thuhilhna 9:12) Om loh nading mun le om loh nading hunah a om khak uh ciang tuahsia-in a dang siatnate zong amau tungah piang thei hi.

9. Gimna a pian suak ding Jehovah in a phalna ahang thuhoih khat nei hamtang ding hi, cih ba’hang muang thei ihi hiam?

⁹ Jehovah in gimna cikmah hunin piangsak ngei lo hi. Gal kidona, gitlohna le kibawlsiatnate hangin amah mawhsak ding hi lo hi. Zinlinna, huihpite le tuiciin cih banga siatnate Pasian piansak hi lo hi. Ahih hang, ‘Jehovah pen khuavannuai-ah vanglian pen ahih leh, tua a lauhuai thute a pian loh nading ba’hangin khaktan lo a hiam?’ ci-in theinuam ding hi teh. Pasian in ei hong don mahmah lam i thei hi, tua ahih manin gimna a pian suak ding Pasian in a phalna ahang thuhoih khat na nei hamtang ding hi.—1 Johan 4:8.

10. Satan in koi bangin Jehovah na to a hiam?

¹⁰ Eden huanah Dawimangpa in Adam le Eve na khem hi. Satan in Pasian pen a hoih lo Ukpa hi, ci-in na gensia hi. Pasian in Adam le Eve kiang pan na hoih khat kemcip hi ci-in na gen hi. Satan in Jehovah sangin amah a hoihzaw ukpa hi, amau’ ading Pasian kisam kei ci-a a up ding a deih hi.—Piancilna 3:2-5; A Nunga Ciaptehna 27 en in.

11. Bang dotna i dawn ding kisam a hiam?

¹¹ Adam le Eve in Jehovah thu mang loin na langpang uh hi. Bang hoih a, bang hoih lo cih pen amau thu-in a khensat ding uh hi ci-in ngaihsun uh hi. Jehovah in tua a langpangte a khialhna le ei ading bang hoihpen hiam cih a theihna koi bangin lakkhia ding a hiam?

12, 13. (a) Tua a langpangte Jehovah in ba’hang na susia pah lo a hiam? (b) Hih leitung a uk dingin Satan le amau le amau a ki-uk dingin mihingte Jehovah in ba’hang na phal a hiam?

 ¹² Jehovah in Adam le Eve na susia pah lo hi. Tua sangin ta a neih ding uh na phal hi. Tua khit teh Jehovah in Adam le Eve ta te’n amau’ a uk ding kua deih uh hiam cih a teel theih nading na bawlsak hi. Leitungah a cingtaak mihingte tawh a kidim ding pen Jehovah ii ngimna hi a, tua pen Dawimangpa in bangbangin a khaktan zongin hong piang veve ding hi.—Piancilna 1:28; Isaiah 55:10, 11.

¹³ Satan in vangtungmi awn tampi mai-ah Jehovah na to hi. (Job 38:7; Daniel 7:10) Tua ahih manin Jehovah in Satan ii ngawhna man maw, man lo cih pen a kitheih nading Satan hun na pia hi. Mihingte in Pasian huhna kihel loin lawhcing zo ding uh maw, lawhcing zo lo ding cih pen a kitheih nading Satan’ lamlahna nuai-ah mihingte amau le amau a ki-uk dingin Pasian in hun na pia hi.

14. Hun in bang thu na kilangsak a hiam?

¹⁴ Kum tampi sung mihingte in amau le amau ki-uk zawh nading hanciam uh a, ahih hang ki-uk zo lo uh hi. Satan pen zuaukhempa ahihlam na kilang hi. Mihingte in Pasian huhna kisam takpi hi. Kamsang Jeremiah in: “TOPA aw, mihing omdan ama uk theih ahih lohna ka theita a, ama kalsuanna ding ama geeltheih hi lo hi,” a cih pen man mahmah hi.—Jeremiah 10:23.

15, 16. (a) Gimnate hun sawtpi tak a pian ding Jehovah in ba’hang phal a hiam? (b) Jehovah in Satan hanga a piang buainate a hoihkik nading ba’hang huh lo a hiam?

¹⁵ Jehovah in gimna hun sawtpi tak a pian ding ba’hang phal a hiam? Thusiate a piang lo dingin  ba’hang khaktan lo a hiam? Satan’ ukna a tangtun lohna a kitel nading hun a kicing takin na pia hi. Mihing te’n ki-ukna a tuamtuam hanciam uh a, lawhcing tuan lo uh hi. Science pilna le set lama pilnate a kikhantoh mahmah hang thumanlohna, zawnna, gitlohna le gal kidonate nidang sangin hong tam semsem hi. Pasian tawh loin ei le ei i ki-uk zo kei ding hi.

¹⁶ Ahih hang, Jehovah in Satan hanga a piang buainate a hoihkik nading na huh lo hi. Tua bangin huh hileh Satan’ ukna a panpih suak ding hi. Tua ahih manin Pasian in cikmah hunin tua bangin huh ngei lo ding hi. Tua banah mihing te’n zong amau le amau a ki-uk zo dingin ki-um uh hi. Ahih hang tua zong zuaukhemna mah hi a, Jehovah in na panpih lo ding hi. Cikmah hunin Pasian in zuaugen ngei lo hi.—Hebru 6:18.

17, 18. Satan hanga a piang siatna khempeuh tawh kisai-in Jehovah in bang hong sepsak ding a hiam?

¹⁷ Jehovah in mihingte le Satan ii langpan hanga a piang siatna khempeuh a bawlphat sakkik thei ding hiam? Bawl thei mah hi. Pasian ading na khempeuh piang thei hi. Satan’ tonate khempeuh kicing taka a kidawnkik ding hun Jehovah in thei hi. Tua khit ciang a gelsa mah bangin leitung pen paradais-in hong bawl ding hi. “Han sungah a om” misi khempeuh hong thokik ding uh hi. (Johan 5:28, 29) Mihingte cikmahin cina ahih kei leh si nawn lo ding hi. Satan hanga a piang siatna khempeuh Jesuh in a hoihin hong bawlsak tading hi. Jehovah in Jesuh zangin “Dawimangpa’ nasepna a beisak ding” hi. (1 Johan 3:8) Ei tungah Jehovah lungduai-in hun hong pia ahih manin i lungdam mahmah kul hi. Tua ahih manin amah i thei kha a, amah i Ukpa dingin deih ihihlam i khensat thei hi. (2 Peter 3:9, 10 Sim in.) Gentheih haksatna i thuak ciang, i thuakzawh nading Pasian in hong huh ding hi.—Johan 4:23; 1 Korin 10:13 sim in.

 ¹⁸ Jehovah in ei hong Ukpa-in amah i teel ding hong sawl tantan lo hi. Ama’n mihingte ut banga teel theihna lungsim letsongin na pia hi. Hih a manpha letsong pen ei ading bang khiatna om hiam cih sin ni.

19. Jehovah in a manpha bang letsong hong pia a hiam? Hih letsong tung ba’hang i lungdam loh phamawh a hiam?

¹⁹ Jehovah’ hong piak a manpha letsong ahi, ut banga teel theihna lungsim in ganhingte tawh hong kilamdangsak mahmah hi. Ganhingte pen amau pianpih theihna bek tawh gamta uh hi. Ahih hang eite in i nuntakna-ah koi bangin kinungta nuam cih kikhensat thei a, Jehovah deihna sem nuam maw, sem nuam lo cih zong i teel thei hi. (Paunak 30:24) Tua ciang na khat bek a sem dinga a kibawl set tawh zong i kibang kei hi. I nuntakna-ah bang sem nuam a, kua tawh kilawmta nuam cih le koi bang mi i suak nuam hiam cih thute ut bangin i teel thei hi. Lungnuam taka i nuntak ding Jehovah in deih hi.

20, 21. Tu’n na teel theih ding a hoihpen teelna in bang a hiam?

²⁰ Jehovah in amah i it ding deih hi. (Matthai 22:37, 38) A pa sawl tantanna tawh hi loin a lungsim takpi tawh “Hong ngai ing,” ci-a a ta’ gen a zak ciang a lungdam mahmah pa khat tawh Pasian kibang hi. Jehovah Pasian in ama na sem ding maw, sem lo ding cih pen i deih bangin hong teelsak hi. Satan, Adam le Eve in Jehovah nial ding na teel uh hi. Ut banga teel theihna letsong pen nangh bangci zat ding na hiam?

²¹ Nang ii ut banga teel theihna zangin Jehovah na, na sem in. Pasian deihna banga nuntak ding a khensat, Satan a nial mi awn tampi tak na om hi. (Paunak 27:11) Gimna khempeuh a kihepkhiat khit Pasian leitung thakah na om nop leh, tu’n bang sem ding na hiam? Tua thu pen a zom khenpi-ah i thei ding hi.